Kūshokeela 10 - Bibilia Ilagano Lya Kale 2015

Mawe gangī ga shilagīlo

¹ Ī likanza lyenīlo ū SEEBA ūniwīla, “Beejaga mabalala gangī abīlī ga mawe gītī a ga kwandya, hanuma wize hangī ū kūlī nene ū kū lūgūlū; ūbeeje n'isandīko lya mbawa.

² Nakūyandīka hangī ha mabalala ī mihayo īyo yalī a ha mabalala a ga kwandya, ayo wagabelagūlile. Hūna ūkūgatūūla ū ng'wisandīko.

³ Na lūūlū nūbeeja isandīko lya mbawa ja ng'wininga, hūna nūbeeja mabalala gangī abīlī ga mawe, ūmo gaalī a ga kwandya. Nūlinha ū mu lūgūlū nagabūkije a mabalala ga mawe būbīlī wago mu makono gane.

⁴ Ū SEEBA wandīka a ha mabalala ga mawe genaya ī mihayo īyo walī wayandīka ī kwandya, a malange ikūmi ga shilagīlo ayo walī wamuwīla aho akayomba ning'we mu lūgūlū kūfuma mu moto, ū mu lūshikū ūlo ng'walī ng'wibilinga. Hūna ū SEEBA ūninha a mabalala genayo.

⁵ Hanuma ya henaho nika kūfuma ū mu lūgūlū, a mabalala genayo nūgatūūla ū ng'wisandīko īlo naalī naabeeja, gīt'ūmo SEEBA akanilagīīlīla; h'ūmo galī nī haha.

⁶ A Baisilaeli būshimīza kūfuma Be-eloti Benejakani, kūshisha Mosela. Ū Alooni ūzumalīkīla kwenūko, ūjīkwa; Elieza ng'witūnja wakwe wingīla a ha nīmo gwa būgabīji būtaale a ha ng'wanya gwakwe.

⁷ Ū kūfuma a henaho būshimīza kūshisha būshika Gudigoda, būlūmbūlīla kūshisha Yotibatani, sī ya mahululu ga minzī.

⁸ Ī likanza lyenīlo ū SEEBA ūbakomanya a banhū ba lūganda lwa Lawī kūlwa nīmo gwa kūlībūūcha ī lisandīko ly'ilagane lya ng'wa SEEBA, kwīmīīla kū būtongi bo ng'wa SEEBA kūlwa būtūmami, na kūbafuuha a banhū mu lina lyakwe, gīt'ūmo bataalī bakwītīlaga kūshisha lelo īyī.

⁹ Hī nguno yene a Balawī batī na ngabo nūūlū wingīji ū mu baana ba ng'wabo; ū SEEBA hū ng'wene ūyo alī wingīji wabo, gīt'ūmo SEEBA Mulungu wing'we akabawīlīla.

¹⁰ Nakikala ū mu lūgūlū shikū makūmi anè līīmi na būjikū gīt'ūmo naalī nīītīla ū lūgendo ū lwa kwandya. Nū lūkangala lwenūlū ū SEEBA ūniigwa hangī, nguno jalī jitī ng'hūmbū jakwe ū kūmukenaagūla.”

¹¹ Hūna ū SEEBA ūniwīla, “Būūkaga ūje kūjūbatongeela a banhū ū mu lūgendo lwabo, baje bakīdime ībize yabo ī sī īyo nabilahīlīla bakūlūgenji babo gīkī nakūbinha.”

Kūng'ogoha SEEBA

¹² Alilūūlū bebe Isilaeli, ū SEEBA Mulungu wako atogilwe kī ū kūfuma ū kūlī bebe, ūlū ītī kūng'ogoha SEEBA Mulungu wako, kūshimīzīla mu nzīla jakwe jose, kūntogwa we, na kūntūmamīla SEEBA Mulungu wako na ng'holò yako yose na būpanga wako bose;

¹³ kūshimīzīla mu kahelele na malange gakwe ayo nalīkwinha lelo īyī kūlwa solobo yako?

¹⁴ Managa gīkī ī ligūlū līlī lya ng'wa SEEBA Mulungu wako, na a mapandī ga ng'wigūlū ayo galī higūlya no no no; pyī nī sī hamò nī shose īsho shilīmo.

¹⁵ Alīyo ū SEEBA akabalolegeja būtogwa wakwe a bakūlūgenji bako, ūbatogwa hūna ūmusola a bing'we ba shibyalīlwe shabo, ūmutogwa kūtinda pye a banhū ba mahanga a gangī gīt'ūmo īlī lelo īyī.

¹⁶ Na lūūlū jisaalagi ī ng'holò jing'we, nī mitwe ying'we yaya ū kwikala midiimu.

¹⁷ Nguno ū SEEBA Mulungu wing'we alī Mulungu wa bamulungu na Seeba wa baseeba; hū ng'wene ū Mulungu ū ntaale, wa būdūla na wa lyogohya, ūyo atasolanhyaga banhū nūūlū atanukūlaga būhongwa.

¹⁸ Akabalwīlīīlaga a bapīna na a bachīlwa; nū ngeni akandīlīlaga na kūng'winha shilīwa na shizwalo.

¹⁹ Na a bing'we shing'wigeleelilwe kūbatogwa a balobeji ba mu sī ying'we; nguno na a bing'we ng'walī balobeji ū mu sī ya Misili.

²⁰ Ng'ogohagi ū SEEBA Mulungu wing'we, na muntūmamīle we; dimanagi nang'hwe gwa, nū mu kwilahīla kwing'we ng'wilahīla mu lina lyakwe.

²¹ Hū ng'wene shiigelile munkumīlīje, ū wei alī Mulungu wing'we ūyo akīīta mihayo mitaale ya kūkamaaja na ya kogohya kūlwa nguno ying'we, īyo mukībona na miso ging'we.

²² A bakūlūgenji bing'we abo bakaja mu sī ya Misili baalī banhū makūmi mpungtī dūhū; alīyo ī haha ū SEEBA Mulungu wing'we wang'wītile kwibyalana na kūkwīla gītī sonda ja ng'wigūlū.