Kukundulwa 4 - Bibilia Ilagano Lya Kale 2015

Isumbī lya būtemi lya ng'wigūlū

¹ Yūbīta ī yenīyo; alīyo aho nataalī nalolile, nahayimanīla nabona mita gūlugūkile ū ng'wigūlū. Nūliigwa hangī ī lilaka ī lya kūbiza gītī ly'ipembe, īlo naalī naliigwa a ha wandījo. Lyūniwīla gīkī, “Linhaga wize kūūnū nakoolekeje mihayo īyo yigelile ībize ho ūlū yabīta ī yenīyī.”

² Haho na haho ningījiwa mu nguzu ja ng'wa Moyo; nūbona Isumbī lya būtemi lītūūlilwe ū ng'wigūlū, na ūmò aligasīgije.

³ Ūyo walī aligasīgije waali gītī iwe ilabagīzu lya yaspi na kalinelio, n'ita lya baashi lya kwikola na zumalidi lyalī līlīpīndije ī Lisumbī lya būtemi.

⁴ Na masumbī gangī makūmi abīlī na ane g'ikūjo gaalī galīpīndije ī Lisumbī lya būtemi lyenīlo; a ha masumbī genayo baalī bigashije ho Banamhala makūmi abīlī na bane, bazwalile shizwalo shape na ngikili ja zahabu ū kū mitwe yabo.

⁵ A hī Isumbi lya būtemi henaho jafumaga ho ndabi na mihilimo na būpalalūki; hama ū kū būtongi wī Isumbī lya būtemi jalīho tala mpungatī jabakaga, ī yenīyo Myoyo mpungatī ya ng'wa Mulungu.

⁶ Na nyanza ya kūng'weka ng'weka gītī ilole yalīho ū kū būtongi walyo ī Lisumbī lya būtemi. A ha gatī gatī shalīho Shiseeng'wa shipanga shine shilīpīndije ī Lisumbī lya būtemi; shalī na miso mingī ū kū būtongi nū kū numa.

⁷ Ī Shiseeng'wa shipanga ī sha kwandya shaali gītī shimba; ī Shiseeng'wa shipanga ī sha kabīlī shaali gītī ndama, ī Shiseeng'wa shipanga ī sha kadatū shalī na būshū gītī bo munhū, ī Shiseeng'wa shipanga ī sha kane shalī gītī mbeshi īkūlalaga.

⁸ Ū Shiseeng'wa shipanga shine shenīsho būlī shene shalī na manana atandatū, nīyo shalī shokalile miso hose hose, pyī nū mu gatī ya manana; hama shitifuulaga līīmi na būjikū, shikikalaga shilīhaya gīkī, “Ng'wela, Ng'wela, Ng'wela; Seeba Mulungu Ndūji wa shose, ūyo walīho, ūyo alīho, na akwiza!”

⁹ Ī Shiseeng'wa shipanga ūlū shilīngongoola na kūnkumīlīja na kūnūmba ūyo igashije hī Isumbi lya būtemi, ūyo alī mpanga kūshisha welelo bose,

¹⁰ a Banamhala abo makūmi abīlī na bane bakagwaga ū kū būtongi bokwe ūyo igashije a hī Isumbi lya būtemi, kūnū balīnamya, ū wei ūyo alī mpanga kūshisha welelo bose. Hama ī ngikili jabo bakajiponejaga ha sī ū kū būtongi wī Isumbī lya būtemi, ū kūnū bakūhayaga gīkī,

¹¹ “Ū bebe Mulungu na Seeba wise wigeleelilwe kwanukūla ikūjo na kūkumīlījiwa, na būdūla. Nguno hū bebe ūyo ūkashibeeja pyī ī shikolo, nīyo shibeejiwe na shilīho kūlwa nguno ya būtogwa wako!”