Kukundulwa 16 - Bibilia Ilagano Lya Kale 2015

Nzweso ja būpelanu bo ng'wa Mulungu

¹ Hanuma niigwa ilaka itaale kūfuma ū mu hekalu līlībawīla a bamalaika abo mpungatī benabo gīkī, “Jagi mukashipumunhīle mu sī īsho shilīmo ū mu nzweso ja būpelanu bo ng'wa Mulungu!”

² Ū wa kwandya ūja ūūkashipumunhīla mu sī īsho shalī ū mu lweso lokwe; pye abo baalī na lūmeng'ho lwa shiinū na a babo bashilamyaga ī shiikolile shayo būgulumūkīlwa malonda mabi no, hama masaatu kīngī nasho!

³ Ū wa kabīlī ūūkashipumunhīla mu nyanza īsho shalī ū mu lweso lokwe; a minzī gūgalūka gūbiza gītī mininga ga mfu! Pye ī shiseeng'wa shipanga ī sha mu nyanza shūshila kūcha.

⁴ Ū wa kadatū ūūkashipumunhīla īsho shalī ū mu lweso lokwe mu myongo na mu nzwīlo ja minzī; gūbiza mininga!

⁵ Nūng'wigwa ū malaika ū ntaale wa minzī wahaya gīkī, “Watūngīlīja ū bebe ng'wela, ūyo ūlīho, na walīho kwīngīīla kale; Īkī ū wenūbū hū būlamuji wako!

⁶ Nguno a benaba bitagūla mininga mingī no ga beela na ga bahangi, h'ī nguno yene ūlībinha nabo mininga bang'we; ū mhayo gwenūyū gūbigeleelilwe!”

⁷ Hūna nūgwigwa ū ng'walīlo gūlīhaya gīkī, “Alichene Seeba Mulungu wa būdūla bose, ū būlamuji wako būlī bo ng'hana, hangī būtūngīlīgije!”

⁸ Ū malaika wa kane ūshipumunhīla ha līīmi īsho shalī ū mu lweso lokwe, linhwa būdūla bo kūbabbisha a banhū.

⁹ A banhū būbbishiwa būsebu būtaale no, bandya kūlīdūkagūla ī lina lya ng'wa Mulungu ūyo akalagīla shibize ho ī sha kūluhya luhya shenīsho; na batagalūkile nūūlū hado, gīkī bandye kūng'winha ikūjo!

¹⁰ Ū wa katanò ūshipumunhīla īsho shalī ū mu lweso lokwe h'isumbī lya būtemi lyayo ī shiinū; ū būtemi wa shiinū būbiza mu giiti; būyiluma ndīmi a banhū kūlwa makoye ayo gakabilongela.

¹¹ Bandya kūndūkagūla ū Mulungu wa ng'wigūlū kūlwa nguno ya makoye gabo, nū būbi wa malonda gabo ayo gabakoyaga. Alīyo batagalūkile gīkī booye ī shītīle shabo!

¹² Ū wa katandatū ūshipumunhīla īsho shalī ū mu lweso lokwe mu līmongo ī litaale, ī Līfulati; gūkama a minzī gamò gīkī ībeejiwe nzīla ya batemi ba kūfuma kīya.

¹³ Hama nūbona myoyo idatū misoso ya kwikola gītī madanga; yūfuma ū mu nomo gwa Līshing'weng'we, nū mu nomo gwa shiinū, na mu nomo gwa ng'hangi nomolomo.

¹⁴ Ū yoi īlī myoyo ya mashetani īyo īkabeejaga mihayo ya kūgekemaja; īkajaga hose hose ū kū batemi ba mu sī, īkūbalaalīkaga kūja kwilwisha būlūgū ū mu lūshikū lūtaale lo ng'wa Mulungu wa būdūla bose.

¹⁵ “Managa gīkī, naliza gītī ng'wibi, alī na lubango ū wa kūsangwa alī miso ashilang'hanile ī shizwalo shakwe, atizūsangwa alī dūūhū manyegu, bakībona ī minala ya dūūhū yakwe!”

¹⁶ Ī myoyo yenīyo īkababilingīla kwipandī īlo līkitanagwa ū mu lūlīmi lwa Shihebulania gīkī Alimagedoni.

¹⁷ Ū malaika wa mpungatī ūshipumunhīla kū lūyaga īsho shalī ū mu lweso lwakwe; lyūfuma ilaka itaale ū mu hekalu līlīhaya gīkī, “Yashila!”

¹⁸ Hūna jūbiza ho ndabi na mihilimo na kūpalalūka, yūding'hima na nyahīnga nhaale, ītaalī kūbiza ho hangī nyahīnga nhaale gīko kūfuma aho banhū bandīja kwikala mu sī.

¹⁹ Ū nzengo ū ntaale gūgabanīka mapandī adatū, ī mizengo ya mahanga nayo yūkenaagūka gete; ū Mulungu ūgwizūkwa kūgwinha shikombe sha mvinyo ya būpelanu bokwe ū nzengo ū ntaale ū gwa Babeli.

²⁰ Pye a majinga gūjimīīla, nī ngūlū jūūjimila.

²¹ Mbula ya mawe yidīka kūfuma ng'wigūlū; gaalī mataale ga kūbiza na būdito bo kilo gītī makūmi atanò būlī lyene. Yūbatūla a banhū, nabo būyūndūkagūla ū Mulungu kūlwa nguno ya kūluhiwa nī mbula ya mawe yenīyo. Ī sha kūluhya luhya shenīsho shalī shabūbi no!