Kukundulwa 14 - Bibilia Ilagano Lya Kale 2015

Lyīmbo lya basolwa

¹ Aho naalola hangī nūmona ū Ng'wana wa Ng'holo wīmīīlaga ha lūgūlū lo Sayuni; hamò na banhū shihūmbī igana na makūmi ane na shine (144,000) abo baalī bandīkilwe a ha būshū wabo ī lina lyakwe nī lina lya ng'wa Ise.

² Niigwa n'ilaka kūfuma ng'wigūlū, gītī lya ng'huutumo gwa minzī mingī, na gītī lya ng'hilimo ntaale gwa mbula. Ī lilaka īlo nakaliigwa lyenīlo lyalī gītī lya batūji ba ndono bakūtūlaga ndono jabo.

³ Bīmbaga lyīmbo ipya ū kū būtongi wī Isumbi lya būtemi, nī Shiseeng'wa shipanga ī shine, na a Banamhala. Atīho nūūlū ūmò ūyo adūgije kūlīmana ī lyīmbo lyenīlo, ūlū ītī abo shihūmbī igana na makūmi ane na shine (144,000) dūhū, abo bagūlilwe kūfuma mu sī.

⁴ A benaba hū bene abo batisosohagije na bakīma, nguno balī beela; hama hū bene abo bakanondeelaga ū Ng'wana wa Ng'holo būlī kwene ūko alīja. Hū bene abo bagūlilwe kūfuma mu banhū gīkī babize matwajo ga kwandya kūlī Mulungu na kūlī Ng'wana wa Ng'holo.

⁵ Balī banhū abo būtilongile būlomolomo nūūlū hado ū mu milomo yabo; nguno batī na shilingo.

Bamalaika badatū na būlomeeji wabo

⁶ Hama nūmona malaika ūngī alīlala kwigūlya mu malunde; walī na Ng'hūlū Jawiza ja welelo bose kūlwa kūbalomeela pye a bikaji ba mu sī; banhū ba mahanga gose, na ng'anda jose, na ndīmi jose.

⁷ Walomeelaga alīhaya gīkī, “Ng'ogohagi Mulungu, na nkūjagi we; nguno ī likanza lya būlamuji bokwe lyashikaga. Namyagi we ūyo alī meeja w'igūlū na sī na manyanza, pyī nī nzwīlo ja minzī.”

⁸ Na malaika ūngī wa kabīlī ūkūūbīja; wiza alīhaya gīkī, “Yagwaga, yagwaga ī Babeli ī nhaale, īyo yalī yang'wisha mahanga gose mvinya ya būjingi wayo bo kūpelanya!”

⁹ Na malaika ūngī hangī, wa kadatū; ūbakūūbīja, wiza alīhaya n'ilaka itaale gīkī, “Būlī ng'wene ūyo alayīlamye ī shiinū nī shiikolile shayo; nū lūmeng'ho lwayo ūzunya kūtūūlīlwa ha būshū nūūlū ha nkono gokwe,

¹⁰ nang'hwe akwīng'wa ī mvinya ya būpelanu bo ng'wa Mulungu, īyo ītatūjiwe minzī nūūlū hado; īyo īswīzilwe hūna yūtūūlwa mu shikombe sha būpelanu bo ng'wa Mulungu! Akūluhiwa mu moto gwa būgota bo shibiliti, kū būtongi bo bamalaika beela na Ng'wana wa Ng'holo.

¹¹ Abo bakwīlamyaga ī shiinū nī shiikolile shayo, pyī nū wa kwanukūla lūmeng'ho lwayo, batī na kwifuula na hado yaya līīmi na būjikū; ī lyochi lyabo līkwinunga ng'wigūlya welelo bose!

¹² Ū mu mhayo gwenūyū būlīgongwa wiyūmīlīja ū kū beela abo bashidimile ī shilagīlo sha ng'wa Mulungu, na kwīmīīla ha kūzunya kwa ng'wa Yesu.”

¹³ Hūna niigwa ilaka kūfuma ng'wigūlū līlīhaya, “Andīkaga gīkī, ‘Balī na lubango a bafu abo balīchīla mulī Seeba kwīngīīla haha: Alichene, alīhaya Moyo; gīkī bifuule ū mu milīmo yabo ī ya makoye, nguno ī shītwa shabo shikūbiza hamò nabo!’”

Kūgeswa kwa sī

¹⁴ Aho nataalī nalolile gīko kwimanīla nabona ilunde lyape; a h'ilunde lyenīlo walī wigasha ho wa kūbiza gītī Ng'wana wa Munhū. Ū kū ntwe walī na ngikili ya zahabu, ū mu nkono gwakwe walī n'igeselo lyūgī.

¹⁵ Wiza na malaika ūngī alīfuma mu hekalu, ūng'hamukīla n'ilaka itaale ūyo walī wigasha h'ilunde; ūng'wīla gīkī, “Lītūmage ī ligeselo lyako lyandye kūgesa, nguno lyashikaga ī likanza lya kūgesa, gaashikile a magesa ga mu sī.”

¹⁶ Ng'hana ūyo walī wigasha h'ilunde ūlīponeja mu sī ī ligeselo lyakwe, yandya kūgeswa ī sī!

¹⁷ Na malaika ūngī hangī ūfuma ū mu hekalu ya ng'wigūlū, nang'hwe walī n'igeselo lyūgī.

¹⁸ Hama na malaika ūngī hangī, ū ng'wene ūfuma ha ng'walīlo, walī na būdūla higūlya ya moto, ūng'hamukīla n'ilaka itaale ūyo walī n'igeselo lyūgī; ūhaya gīkī, “Lītūmage ī ligeselo ī lyūgī wīkuminge ī mikūngo ya nzabibu gwa mu sī, nguno yapile ī mizabibu yago.”

¹⁹ Ng'hana ū malaika ng'wenūyo ūlīponeja mu sī ī ligeselo lyakwe, wīkuminga ī mizabibu, wīponeja ng'wikamīlo itaale lya mvinya ya būpelanu bo ng'wa Mulungu.

²⁰ Ū mizabibu yūpandagīlwa ng'wikamīlo lya mvinya, hanze ya nzengo. Gūfuma ū ng'wikamīlo lya mvinya lyenīlo mininga mingī ga kūshisha falasa ha lijamu, gūhūūma ng'hūūmo gwa kūshika bū kūle bo mailo gītī magana abīlī.