Kukundulwa 12 - Bibilia Ilagano Lya Kale 2015

Būpelanu bo Līshing'weng'we

¹ Hūna shūbizako shiiloleelo shitaale ū ng'wigūlū, nkīma azwalile līīmi, al'ū kū sīlīlī, ū kū mhambala jakwe gwalīko ng'weji; lelo ū kū ntwe walī na ngikili ya sonda ikūmi n'ibīlī.

² Nīyo walī nda; kūhayimanīla wandya kūlījiwa būsūngū, nguno līkashika ī likanza lya kūbyala.

³ Na shiiloleelo shingī shilonga ū ng'wigūlū, Līshing'weng'we lyaza itaale, lyalī na mitwe mpungatī na mapembe ikūmi; a ha mitwe yalyo jalīho ngikili mpungatī.

⁴ Ū nkīla gwalyo gūyooleleja selusi īmò ya Sonda ja ng'wigūlū, lyūjiponeja mu sī. Hūna ī lyoi ī Līshing'weng'we lyenīlo lyūng'wīmīīla ū kū būtongi bokwe ū nkīma ūyo walī hihī kūbyala, gīkī ūlū alabyale līnūmbūlīje kūngabbula ū Ng'wana wakwe!

⁵ Ūbyala Ng'wana ngosha ūyo akūgadīīma pye a mahanga na nang'ha gwa chūma; haho na haho ū Ng'wana wakwe ng'wenūyo ūhwehulwa ūtwalwa kūlī Mulungu, kwī Isumbī lyakwe lya būtemi.

⁶ Hama ū wei ū nkīma ūpeelela kwitogolo, ūūkikala kwipandī ilebe walī wabeegejiwa na Mulungu, gīkī banang'hane kwenūko ikanza lya shikū shihūmbī na magana abīlī na makūmi atandatū.

⁷ Būkabūūka būlūgū ū ng'wigūlū, ū Mikaeli na a bamalaika bakwe būūlwa nalyo ī Līshing'weng'we; nalyo ī Līshing'weng'we lyūūlwa nabo, līlī na bamalaika balyo.

⁸ Alīyo lītapyenile, nū wikalo wabo ū ng'wigūlū batabūpandīkile hangī.

⁹ Ī Līshing'weng'we ī litaale lyenīlo lyūponyiwa, ī Liyoka lya kale na kale, īlo līkitanagwa Lyanishi na Līshetani, Ilemba lembi lya sī ngima; lyūponejiwa mu sī hamò na a bamalaika balyo!

¹⁰ Hūna niigwa ilaka itaale ū ng'wigūlū līlīhaya gīkī, “Ī haha wilonga ū būpīji, nū būdūla nū būsugi bo ng'wa Mulungu wise, nū būtaale bo ng'wa Kilisito wakwe; nguno waponyiwa ū mūūji wa badūgū bise, ūyo akababūūlaga kūlī Mulungu wise līīmi na būjikū.

¹¹ Bampyenaga kūlwa mininga ga Ng'wana wa Ng'holo, na kūlwa mhayo gwa būkaanīji wabo; na hangī nguno batabūsaatilwe ū būpanga wabo nūūlū kūshisha mu kūcha.

¹² Ali lūūlū, ū bebe igūlū yegaga; na a bing'we abo mukwikalaga mo. Alīyo a bing'we sī na nyanza ng'wagwīlwa makoye, nguno wang'wikīīla ū ng'wanishi; nūwe apelanile no, īkī amanile gīkī alī n'ikanza iguhī dūhū!”

¹³ Ī Līshing'weng'we aho lyabona gīkī lyaponyiwa mu sī lyūng'wihuutīīla ū nkīma ūyo akabyala Ng'wana ngosha.

¹⁴ Alīyo ū nkīma ng'wenūyo winhwa manana abīlī ga mbeshi nhaale, ūlala ajile kwipandī lyakwe kwitogolo, kūjūlishiwa ikanza na makanza na nusu y'ikanza, alyīngīle ī Liyoka.

¹⁵ Nalyo ī Liyoka lyūswa minzī kūfuma mu nomo gwalyo; gūbiza gītī mongo ū kū numa yakwe ū nkīma ng'wenūyo, gīkī apulwe līmongo.

¹⁶ Alīyo ī sī nayo yūngunanha ū nkīma, nguno īkatandūka yūlekana, yūgūmila ū mongo ūyo līkagūswa ī liyoka kūfuma mu nomo gwalyo.

¹⁷ Akalīpelanya no ū nkīma ī Līshing'weng'we lyenīlo, lyūbūūka lījile kwilwisha būlūgū na a baana bakwe abo bataalī balīho, abo bashidimile ī shilagīlo sha ng'wa Mulungu, nū būkaanīji bo ng'wa Yesu balī nabo.

¹⁸ Hūna ī Līshing'weng'we lyūja lyūkīmīīla ha maseni ga ha nyanza.