Kukundulwa 1 - Bibilia Ilagano Lya Kale 2015

Mbūūkī na kūgīsha

¹ Ū wenūbū būlī būsombooji bo mihayo īyo Yesu Kilisito akinhwa na Mulungu, kūboolekeja a basese bakwe īyo yigelile ībize ho wangū. Wīkundūla na kwīyoolecha mu nzīla ya kūntūma malaika wakwe kūlī ntūmami wakwe Yohana,

² ūyo walī nkaanīji wa mhayo go ng'wa Mulungu, na wa būkaanīji bo ng'wa Yesu Kilisito mu yose, gīt'ūmo walī wībonela.

³ Alī na lubango ūyo akwīsoma ī mihayo ya būhangi wenūbū, na a badegeleki abo bakwīdima īyo yandīkilwe mo; nguno ī likanza lyegeelaga.

⁴ Nene Yohana: Kū kanisa mpungatī ījo jilī mu Asia; shigongo na mhola shibize hamò ning'we kūfuma kūlī we ūyo alīho, ūyo walīho, na akwiza. Na kūfuma kū myoyo mpungatī īyo īlī kū būtongi wī Isumbī lyakwe lya būtemi.

⁵ Na kūfuma kūlī Yesu Kilisito ū Nkaanīji Nsanyiwa, Myalwa wa kwandya, ūyo akajūūka kūfuma mu bafu, na Ntaale wa batemi ba mu sī. Hū ng'wene ūyo atūtogilwe, ūyo akatūtungūla ūtwīnja mu shibi shise mu nzīla ya mininga gakwe;

⁶ ūtwīta kūbiza būtemi, na bagabīji kūlwa nguno ya ng'wa Ise Mulungu. Ū kūlī we ū ng'wenūyo lībize ikūjo na nguzu kūshisha shiku jose: Alichene.

⁷ Managa gīkī, akwiza na malunde, na būlī liso līkūmona, pye na a babo bakanchima. Hama a ba mu sī ng'anda jose, bakūlīla kūlwa nguno yakwe. Ee, alichene!

⁸ “Ū nene nalī Alufa na Omega,” alīhaya Seeba Mulungu: “Hū ng'wene ūyo alīho, na walīho, na akwiza; ūyo alī Ndūji wa shose.”

Kwiyoolecha kwa ng'wa Yesu

⁹ Nene Yohana, ndūgū wing'we na ng'wiching'wi mu būluhi, nū mu būtemi; pyī nū mu wiyūmīlīja kūlwa nguno ya ng'wa Yesu. Naalī ng'wijinga līkitanagwa Patimo, kūlwa nguno ya mhayo go ng'wa Mulungu, na kūlwa kūnkaanīla Yesu.

¹⁰ Mu lūshikū lo ng'wa Seeba nakikīīlwa na Moyo, nahayimanīla niigwa ū kū numa yane ilaka itaale gītī ly'ipembe.

¹¹ Lyūhaya gīkī, “Ūyo ūlīyībona yandīkage mu shitabo wītwale kū kanisa mpungatī: Efeso, na Similina, na Peligamo, na Siatila, na Salidi, na Filadelifia, na Lodikea.”

¹² Nane nūgalūka gīkī nalīlole ī lilaka īlo līkūniyombyaga. Aho nagalūka, nūbona makīndīkīlo mpungatī ga tala ga zahabu,

¹³ na ūmò wa kūbiza gītī Ng'wana wa Munhū alī hamò nago a makīndīkīlo ga tala genayo. Walī azwalile ng'hanjo ya būlīhu bo kūshika kū mhambala; ū mu shikuba walī witunga nshipi go zahabu.

¹⁴ Ū ntwe gwakwe gwalī gwape, pyī nī nzwīlī, gītī booya bo ng'holo yape, gītī mawe ga mbula; alīyo a miso gakwe gaalī gītī ndali ja moto.

¹⁵ Hama ī mhambala jakwe jalī gītī chūma shipembilwe mu moto, hūna shūguuswa sheela pe. Ī lilaka lyakwe lyalī gītī ng'huutumo gwa minzī mingī.

¹⁶ Ū mu nkono gokwe ū gwa būlyo olī na Sonda mpungatī; ū mu nomo gokwe lyafumaga mo līlūshū lya būūgī būbīlī, ū būshū bokwe boteemagīlaga gītī kūteemagīla kwa līīmi ūlū līlībaka mu būdūla bolyo pyī ū bose.

¹⁷ Aho namona, nūgwa ū kū magūlū gakwe, nūbiza gītī naacha! Alīyo ū wei ūnitūūlīla nkono gwakwe gwa būlyo; ūniwīla gīkī, “Ūtogohage, ū nene nalī wa Kwandya na wa Kūmalīja,

¹⁸ na nalī Mpanga; na ng'hana nakacha, alīyo managa gīkī nalī mpanga kūshisha welelo bose. Hama hū nene nalī najo ī fungūlo ja lūfu nī ja kūlimu.

¹⁹ Ali lūūlū, ī haha yandīkage ī mihayo īyo ūlīyībona yenīyī, īyo īlīho ī haha, nī yīyo īkūbiza ho ūlū yabīta ī yenīyī.

²⁰ Ī mbisīla ya Sonda mpungatī ījo wajibonaga mu nkono gwane gwa būlyo, na a makīndīkīlo mpungatī ga tala a ga zahabu, yīyī, ī Sonda mpungatī balī bamalaika ba kanisa mpungatī, alīyo a makīndīkīlo ga tala ayo mpungatī, a gene h'ī kanisa mpungatī jenekīlī.