Kūfuma 9 - Bibilia Ilagano Lya Kale 2015

Ikūla lya kūcha mitugo

¹ Ū SEEBA ūng'wīla hangī ū Musa, “Jaga ū kūlī Falao ūkang'wīle gīkī, ‘Ū SEEBA ū Mulungu wa Bahebulania alīhaya, Balekelage a banhū bane baje bakanilamye.

² Ūlū ūleme, wikale ūbadimīīlile batizūja,

³ Ū nkono go ng'wa SEEBA gūkwenha ikūla lyabūbi no ū kū mitugo jako ījo jilī hanze kū madīīmīlo, ī falasa, nī nzobe, nī ngamīla jako; pyī nī ng'ombe, nī mbūli nī ng'holo jako.

⁴ Alīyo ū SEEBA akūtūūla būsolanhya a ha gatī ya mitugo ja Baisilaeli nī ja Bamisili; gūtūūcha nūūlū ntugo gūmò gwa Baisilaeli.’”

⁵ Hūna ū SEEBA wei ng'wenekīlī ūtūūla ī likanza; ūhaya, “Ntondo ū SEEBA akūgwīta ū mhayo gwenūyū ū mu sī yenīyī.”

⁶ Na ng'hana a ha ntondo yaho ū SEEBA ūgwīta, pyī ī mitugo ja Bamisili jūshila kūcha; alīyo gūtachile nūūlū ntugo gūmò ū gwa Baisilaeli.

⁷ Ū Falao ūtūma kūjūgīsīlīja, ūbona gīkī ng'hana gūtachile ntugo gwa Baisilaeli nūūlū gūmò; alīyo ī ng'holò yakwe ītagalūkile, atabazunīlīgije a banhū ū kūja.

Shitūlo sha kūsaata mabute

⁸ Ū SEEBA ūbawīla a ba Musa nū Alooni, “Solagi ipī lya mabu kwīngīīla ha liiko, ū Musa alagasaamule ng'wigūlya ū kū būtongi bo ng'wa Falao.

⁹ A mabu genayo gakūgalūka lūbize lūbuubu lūnogu no no no pye a hose ū mu sī ya Misili; ū lūbuubu lwenūlo lūkwenha mabute pye a hose ū mu sī yenīyī, ū kū banhū nī mitugo; gakūyūbimba gatwinīka būhila!”

¹⁰ Ng'hana būsola mabu kwīngīīla ha liiko, būnsanga ū Falao būshika bīmīīla ū kū būtongi wakwe, hūna ū Musa ūgasaamula ng'wigūlya a mabu genayo; a banhū būgulumūkīlwa mabute, pyī nī mitugo ī jose, gūyūtwinīka būhila.

¹¹ A bagòta būlemeelwa ū kūng'wīmīla ū Musa kūlwa nguno nabo a mabute gakabadima, hamò na a Bamisili a bangī.

¹² Alīyo ū SEEBA walī wīgagabaja ī ng'holò ya ng'wa Falao, atabadegelekile a ba Musa nū Alooni, gīt'ūmo ū SEEBA walī wang'wīlīla ū Musa.

Shitūlo sha mbula ya mawe

¹³ Ū SEEBA ūng'wīla ū Musa, “Ī ntondo dilū ng'wipuunīīlage ū Falao ūkamanhye nag'hwe ūng'wīle, ‘Ū SEEBA, ū Mulungu wa Bahebulania alīhaya gīkī, Balekelage a banhū bane baje bakanilamye.

¹⁴ Nguno ī haha lūūlū nakūkūgwisīja ihūūya idito no, nakūbatūla a batūmami bako na a banhū bako, ūmane gīkī atīho ūngī ū mu sī wa kūbiza gīt'ūmo nalī nene.

¹⁵ Nguno ī haha ni naamalile kūgūgoloola ū nkono gwane, nūūlū kūkūkenaagūla gete ū mu sī ū bebe ng'wenekīlī na a banhū bako.

¹⁶ Alīyo ūtaalī ūlīho, nakūlekile wikale mpanga kūlwa mhayo gwa gīkī, nakoolekeje ū būdūla wane; na gīkī ī lina lyane līkumūchiwe hose pyī ū mu sī.

¹⁷ Gwike kūshisha haha ūtaalī ūkwigūngūhyaga higūlya ya banhū bane, ūtaalī ūlemile ū kūbazunīlīja ū kūja.

¹⁸ Na lūūlū ī ntondo ūlū lyūshika ikanza gītī īlī, nakūtūma mbula ya mawe yabūbi no, īyo ītaalī kūtūla na kamò kūfuma aho banhū bandīja kwikala mu Misili.

¹⁹ Ī haha lagījaga jenhwe mu kaya pyī ī mitugo jako ījo jilī kū matogolo, nī shikolo ī shingī īsho shilī hanze shingījiwe mu kaya. Nguno ī mbula ya mawe yenīyo īkūbatūla pye a banhū abo balasangwe balī hanze, pyī nī mitugo ījo jikūbiza kū matogolo; īkūshibūlaga pyī ī shose.’”

²⁰ A batūmami ba ng'wa Falao abo bakagogoha ū mhayo go ng'wa SEEBA bakabenha a basese babo mu kaya nī mitugo jabo.

²¹ Alīyo abo bakagūdalaha ū mhayo go ng'wa SEEBA, a bene bakabaleka hanze a basese babo nī mitugo jabo.

²² Hūna ū SEEBA ūng'wīla ū Musa, “Gūgoloolage ū nkono gwako oolote kwigūlū, ītūle mbula ya mawe ū mu Misili; ībatūle a banhū nī mitugo, pyī nī shisho shizwile ū mu migūnda ya Misili.”

²³ Ū Musa aho wagūgoloola ū nkono gwakwe koolota kwigūlū, ū SEEBA ūtūma ū mu sī yenīyo mbula nhaale no, ya mawe na kūpalalūka na ndabi ningī. Ū SEEBA wenha ū mu Misili mbula ya mawe;

²⁴ gandya kūgwa mawe ga mbula, na ndabi jiyūlabya būlī kwene. Yalī mbula yabūbi no kūfuma aho ī sī ya Misili yandīja kūbiza ihanga.

²⁵ A mawe ga mbula gakashitūla pyī ī shikolo sha mu migūnda hose pyī ū mu Misili; yūbatūla na a banhū nī mitugo. Pyī īsho shaalī shizwile mu migūnda yūshikenaagūla, yūyīkongoola nī mitī pyī ī yose.

²⁶ Ī lipandī īlo ītatūlile na mawe ga gīko, yalī mu sī ya Gosheni dūhū; ūko bikalaga a Baisilaeli.

²⁷ Ū Falao ūbitana hangī a ba Musa nū Alooni ūbawīla, “Ūlū ī lelo ū lūgendo ūlū nalī ng'hūbi no, ū SEEBA ng'wene ntūngīlīja; ū nene na a banhū bane tūlī bahūbi.

²⁸ Nombagi ū SEEBA, nguno twigejaga lūūlū ī mbula ya mawe na kūpalalūka yenīyī; nakūmulekela muje, mutikala hangī ū mu sī īyī.”

²⁹ Ū Musa ūshosha, “Ūlū nalīnge ū mu nzengo, nakūmūūkīja makono hangī ū SEEBA nanombe, yooye ū kūtūla ī mbula ya mawe na kūpalalūka yenīyī; hūna ūkūmana gīkī ī sī īlī ya ng'wa SEEBA.

³⁰ Alīyo namanile hape ū bebe na a batūmami bako mutaalī ū kūng'ogoha ū SEEBA Mulungu.”

³¹ (Ī kitaani nū būsīga shikakenaagūlwa, nguno ū būsīga boolī bomala kūhoola, ī kitaani jalī jamala kūlaba.

³² Alīyo ī ngano nū būlegi shikapīla nguno ī shoi shikabizaga sh'ikanza lya kū numa.)

³³ Hūna ū Musa wīnga ū kūlī Falao, ūja hanze ya nzengo ūūkamūūkīja makono ū SEEBA; ī mbula ya mawe na kūpalalūka yūgata, yooya ū kūtūla ū mu sī yenīyo.

³⁴ Ū Falao aho wabona gīkī ī mbula ya mawe na kūpalalūka yooya ū kūtūla, akagwa hangī ū mu shibi shakwe; ū wei na a batūmami bakwe būgang'hanaja ī ng'holò jabo.

³⁵ Na lūūlū ī ng'holò ya ng'wa Falao īkikala ndaamu dūhū, ūlema ū kūbazunīlīja a Baisilaeli ū kūja, gīt'ūmo SEEBA walī wahayīla mu nzīla ya ng'wa Musa.