Kūfuma 6 - Bibilia Ilagano Lya Kale 2015

¹ Nang'hwe ū SEEBA ūnshokeja ū Musa, “Alilūūlū ī haha ūkūbona ūmo nalang'wītīle ū Falao; akūbalekela baje kūlwa nguno ya būdūla wa nkono gwane; nīyo akūbapeeja ū mu sī yakwe kūlwa nguno ya būdūla wa nkono gwane.”

² Ū Mulungu ongeja ū kūng'wīla ū Musa, “Ū nene nalī SEEBA,

³ nakang'wilongela ū Abulahamu nū Isaka, nū Yakobo; nūboolekeja gīkī nalī Mulungu Ndūji wa shose Alīyo natimanīkije ū kūbo ū mu lina lyane, ī lya gīkī nalī SEEBA.

⁴ Na hangī nakabeeja ilagane lyane nabo kūlwa kūbinha ī sī ya Kanaani, ūmo bikalaga gītī balobeji.

⁵ A higūlya ya yenīyo, naakwigwile ū kūlīla kwa Baisilaeli, ūmo Bamisili bakūbatūmamījaga mu būsese; nī lilagane lyane naalizūkilwe.

⁶ Hūna lūūlū bawīlage a Baisilaeli gīkī, ‘Ū nene nalī SEEBA; managi gīkī nakūng'wīnja ū mu būdito bo miligo ya Bamisili, nang'wīnje ū mu būsese wa kūbatūmamīla boi. Nakūgūgoloola ū nkono gwane kūlwa kūmukomoola, nīīte shītīle shitaale sha kūbagwisīja nsango.

⁷ Nakūmusola nang'wīte mubize banhū bane, nū nene nabize Mulungu wing'we. A henaho hū mukūdeeba gīkī ū nene nalī SEEBA Mulungu wing'we; ūyo alīng'wīnja mu būsese wa kūbatūmamīla Bamisili.

⁸ Na lūūlū nakūng'wenha ū kū sī īyo nakabūūcha nkono nūng'wilahīlīla Abulahamu na Isaka na Yakobo, gīkī nakūng'winha bing'we ībize ying'we ya wikomangīle, ū nene nalī SEEBA.’”

⁹ Ū Musa ūbawīla ī mihayo yenīyo a Baisilaeli, alīyo batandegelekile, nguno ū būsese walī wabaminya no, kūshisha baalī baagwa ng'holò.

¹⁰ Hūna ū SEEBA ūng'wīla ū Musa gīkī,

¹¹ “Jaga ū kūlī Falao, ū ntemi wa Misili; ūkang'wīle abalekele a Baisilaeli bīnge ū mu sī yakwe.”

¹² Alīyo ū Musa ūnshokeja ū SEEBA alīhaya, “A Baisilaeli benekīlī baalemile ū kūnidegeleka, sumva na Falao! Akwandya kinehe ū kūnidegeleka ū nene wa nomo gūtigeleelilwe kūlūngalūnga?”

¹³ Ū SEEBA ūlūngalūnga nabo hangī a ba Musa nū Alooni, ūbinha mihayo ya kūbatwalīla a Baisilaeli, nī ya kūntwalīla ū Falao, ū ntemi wa Misili; gīkī ībigeleelile babafunye a Baisilaeli ū mu sī ya Misili.

Shibyalīlwe sha Balawī

¹⁴ A banhū aba hū baalī batongeeji ba kaya ja ng'wabo: A bitūnja ba ng'wa Lubeni, ū tangī o ng'wa Isilaeli, baalī, Hanoki na Palu, Hezilomu na Kalīmi, ī jenīji h'ī kaya ja mu lūganda lwa Lubeni.

¹⁵ A bitūnja ba ng'wa Simioni baalī, Yemūli, Yamini, Ohadi, Yakini, Zohali, na Shauli; ū ng'wene walī wa kūfuma mulī nkīma w'ihanga lya Bakanaani, ī jenīji h'ī kaya ja mu lūganda lwa Simioni.

¹⁶ A mina aya gene gaalī ga bitūnja ba ng'wa Lawī, gīt'ūmo shalī shibyalīlwe shabo, Gelishomu, Kohati, na Melali. Ū Lawī akashisha būlamu wa myaka igana na makūmi adatū na mpungatī.

¹⁷ A bitūnja ba ng'wa Gelishomu baalī ba Libīni, na Shimei; h'ī kaya jabo ī jenījo.

¹⁸ A bitūnja ba ng'wa Kohati baalī ba Amulamu, Izihali, Hebuloni na Uzieli. Ū Kohati akashisha būlamu bo myaka igana na makūmi adatū n'idatū.

¹⁹ A bitūnja ba ng'wa Melali baalī ba Mahili na Mushi, ī jenīji h'ījo jalī kaya ja mu lūganda lwa Lawī; h'ūmo shalī ī shibyalīlwe shabo.

²⁰ Ū Amulamu akantoola sengiye, Yokebedi ūmyalīla ba Alooni na Musa; ū Amulamu ng'wenūyo ūbiza na būlamu bo myaka igana na makūmi adatū na mpungatī.

²¹ A bitūnja ba ng'wa Izihali baalī ba Koola, Nefegi na Zikili.

²² A bitūnja ba ng'wa Uzieli baalī ba Mishaeli, Elizafani na Sitili.

²³ Ū nke o ng'wa Alooni walī Elisheba, nshīke o ng'wa Aminadabu, n'ilūmbūye o ng'wa Naashoni. Akabyala nang'hwe ba Nadabu, Abihu, Eleazali na Itamaali.

²⁴ A bitūnja ba ng'wa Koola baalī ba Asili, Elikana na Abiasafu. A benaba hū baalī ba kūfuma mu kaya ya ng'wa Koola.

²⁵ Ū Eleazali ū ng'witūnja o ng'wa Alooni akantoola ūmò wa bashīke ba ng'wa Putieli, ūmyalīla ng'witūnja lina lyakwe Finehasi. A benaba hū baalī ba lūganda lwa Lawī; būlī kaya yene yene.

²⁶ Hama ū ng'wenūyū h'ū Alooni ūyo walī hamò na Musa; banhū abo SEEBA akabawīla, “Bīnjagi a Baisilaeli ū mu Misili, gafume mo pye a mabità gabo.”

²⁷ A benaba hū bene a ba Musa nū Alooni, abo bakang'wīla ū Falao, ū ntemi wa Misili mihayo ya kūbafunya a Baisilaeli ū mu sī yakwe ya Misili.

Alooni kūyomba ha ng'wanya go ng'wa Musa

²⁸ Hūna lūūlū ū Musa aho alī mu sī ya Misili, ū ng'wikanza lyenīlo h'aho ū SEEBA akalūngalūnga nang'hwe ūng'wīla gīkī,

²⁹ “Ū nene nalī SEEBA, ng'wīlage ū Falao ū ntemi wa Misili pyī ī mihayo īyo nalīkūwīla.”

³⁰ Alīyo ū Musa akanshokeja ū SEEBA alīhaya, “Ū Falao akwandya kinehe kūnidegeleka ū nene ng'wenūyū, ūyo nalī munhū wa nomo nsoso gūtigeleelilwe kūlūngalūnga?”