Kūfuma 5 - Bibilia Ilagano Lya Kale 2015

Falao kūbalemeja kwīnga

¹ Hanuma y'ikanza ilebe, ū Musa nū Alooni būja ū kūlī Falao; būūkang'wīla, “Ū SEEBA ū Mulungu wa Isilaeli alīhaya gīkī, ‘Balekelage a banhū bane baje kwitogolo bakīīte shigukulu sha kūniyegela nene.’”

² Ū Falao ūhaya, “Ū SEEBA ni nani nose ū nene nazunye mihayo yakwe nabalekele a Baisaeli baje? Ū nene natandeebile ū SEEBA, na lūūlū natūdūla ū kūbalekela a Baisilaeli baje.”

³ Nabo būng'wīla, “A bise twamanhije nū Mulungu wa Bahebulania, tūzunīlījage tūje lūgendo lwa shikū idatū kwitogolo, tūkamfunīje shitambò ū SEEBA Mulungu wise, nguno ūlū tūtīītile chene akūtūgwisīja mahūūya, nūūlū akūtūkenaagūla bo līlūshū.”

⁴ Alīyo ū Falao ūbawīla, “Bing'we Musa na Alooni, nibūlī mulībīnja a banhū ū kū milīmo yabo? Shokagi kū milīmo ying'we ūko!”

⁵ Ū Falao ongeja kūhaya, “Mulībona gīkī ī haha a banhū ba mu sī īyī bakwīlile no, alīyo a bing'we hū ng'wandije kūmanūbalecha ū kūtūmama!”

⁶ Ū lūshikū lwenūlo ū Falao ūbinha shilagīlo a bagabi ba milīmo na a bīmīīji ba batūmami. Ūbawīla,

⁷ “Oyagi ū kūbinha a banhū a maswa ga kūsanja ū mu būlongo bo kūbeegeja madafaali. Balekagi bayikoobela boi benekīlī.

⁸ Alīyo ūbūkūmi wa madafaalī būbize hū wene dūhū, ūmo bakwītīlaga na kale; yaya ū kūbageheja nūūlū hado. Nguno baabizile boolo ū kū milīmo, h'ī chene bandije kwilīja līja bakūhayaga, ‘Tūlekelage tūje tūkamfunīje shitambò Mulungu wise.’

⁹ Bongejagi ī milīmo a banhū benabo, badidohelwe bayūdīla bakūtūmamaga; boye ū kwikala būdīlīla mihayo ya kūlembagūlwa.”

Milīmo kongejiwa

¹⁰ Na lūūlū a bagabi ba milīmo na a bīmīīji ba batūmami būbawīla a banhū balīhaya, “Ū Falao wayombile gīkī, ‘ī haha nooyaga ū kūng'winha a maswa.

¹¹ Jagi mukikoobele ging'we benekīlī ūko mulakagapandīkīle; alīyo ū nīmo gwing'we gūtūgehiwa na hado yaya.’”

¹² Na ng'hana a banhū būyūsambaala hose pyī ū mu Misili, baja bakūkumingījaga mapalala ga kūtūmamīla a ha ng'wanya gwa maswa.

¹³ Alīyo a bagabi ba milīmo bongeja kūbakomeleja balībawīla, “Shiigelile muyūyīshikīlīja ī milīmo īyo muhelelilwe kwīmala būlī lūshikū, gīt'ūmo ng'walītīlaga aho ng'walūpandīkaga maswa.”

¹⁴ A Baisilaeli abo Falao walī wabatūūla kūbiza bīmīīji ba batūmami, būyūtūlwa kūnū balībūjiwa, “Nibūlī ūbūkūmi wa madafaali ging'we būkaleba ī igolo, nī lelo mūtashikije ūmo ng'walīītīlaga ī kwandya?”

¹⁵ Hūna a Baisilaeli a bīmīīji ba batūmami būja ū kūlī Falao būūkamūūja, “Nibūlī wandije kūbaluhya gīko a basese bako?

¹⁶ A basese bako boyile ū kwinhwa a maswa, alīyo tūlīwīlwa, ‘Beejagi a madafaali.’ A bise basese bako tūlītūlwa no ī haha, alīyo ū būhūbi būlī kū banhū bako!”

¹⁷ Ū Falao ūbawīla, “Mulī boolo a bing'we; ng'wabizile boolo no ī haha, h'ī nguno yene ng'wandije kwikala mukūhayaga, ‘Tūzunīlījage tūje tūkamfunīje shitambò SEEBA!’

¹⁸ Īgagi a henaha, jagi mukatūmame; a maswa mutinhagwa, alīyo a madafaali ayo muhelelilwe a gene shiigelile mugashikīlīje.”

¹⁹ A Baisilaeli a bīmīīji ba batūmami būbona bingīla mu makoye, nguno bakawīlwa, “ūbūkūmi wa madafaali ayo baali bahelelilwe būlī lūshikū gatizugeha.”

²⁰ Aho bīnga a halī Falao, būmanhya nū Musa hamò nū Alooni, baalī baabalindīīla kūhooya nabo.

²¹ Būbawīla, “Ū SEEBA ni amulolage a bing'we, nīyo wei ng'wenekīlī amulamule. Nguno ng'watūbilile inyema ibi no ū kūlī Falao, nū kū batūmami bakwe; ng'wabinhile lūshū mu nkono gīkī batūyagaje!”

Mulungu ūbisagīja būkomooji

²² Ū Musa ūshoka ū kūlī SEEBA ūūkang'wīla, “Ee Seeba, nibūlī wabenhelile mhayo gwabūbi gīkī a banhū benaba? Hama ūkanitūma kūlwa kī lūūlū ū nene?

²³ Nguno ū Falao wabīītīlile makoye no a banhū benaba kūfuma aho ndīgije kūyomba nang'hwe mu lina lyako; alīyo ū bebe hū ndūhū ūtūbagunanhaga a banhū bako!”