Kūfuma 40 - Bibilia Ilagano Lya Kale 2015

Ipandī lya kwikala līzengwe

¹ Hūna ū SEEBA ūng'wīla ū Musa gīkī,

² “Ū mu lūshikū lwa kwandya lwa ng'weji gwa kwandya, ī lipandī lya kwikala ūkūlīzenga, lyīmīīle.

³ H'ūmo ūkūlītūūla ī lisandīko īlo līlī na shilagīlo ikūmi, hama ī lisandīko ūlīshīkīje itundubaali ī lya h'isenge.

⁴ Hanuma ūkūyenha ī meza, ūshitūūla ho ī shikolo īsho shiigelile kūbiza ho. Hanuma ya henaho nī likīndīkīlo lya talà ūkūlyenha ūjitūūle ho ī talà jaho.

⁵ Ū ng'walīlò gwa zahabu ū gwa kūzuukīja būbbani ūkūgūtūūla kū būtongi w'isandīko lya būkaanīji, hūna ūlītūūla ho nī litundubaali lya ha nyango gwa kwingīla ng'wipandī lya kwikala.

⁶ Ū ng'walīlò gwa shitambò sha kūpemva ū gwene ūkūgūtūūla a ha būtongi bo nyango gwa kwingīlīla ng'wipandī lya kwikala, ī liheema lya kwibilingīla.

⁷ Ī shiseme sha kūkalabīla ī shene ūkūshitūūla ha gatī y'iheema nū ng'walīlò, hūna ūtūūle mo minzī.

⁸ Hanuma ūkūlwīmīlīja ū lūūba lwa kūlīpīndya ī lipandī lya kwikala, ūlītūūla nī litundubaali lya ha mita gwa kwingīla ū mu gwalūgwa.

⁹ Hanuma ya henaho ūkūgasola a maguta, a ga kūbitīīla batūmami hamò na shitūmamīlo, ūlīseeseebele ī lipandī lya kwikala nī shikolo shalyo ī shose, lyeele hamò nī shiseme shalyo pye.

¹⁰ Ū ng'walīlò gwa shitambò sha kūpemva ūkūgūbila maguta, nī shiseme shago ī shose; ū ng'walīlò gwenūyo ūkūgweja gūbize ng'wela no no no.

¹¹ Nī shiseme sha kūkalabīla ūkūshibila a maguta, hamò nī likīndīkīlo lyasho, shibize sheela.

¹² Hūna ū Alooni na a bitūnja bakwe, ūkūbenha a ha nyango gwa kwingīlīla ng'wiheema lya kwibilingīla, ūbooje na minzī.

¹³ Hanuma ya henaho ū Alooni ūkūnzwalīkīja ī shizwalo ī sheela, ūng'witīīle na maguta ga kūng'weja, abize wa kūnitūmamīla nīmo gwa būgabīji.

¹⁴ Na a bitūnja bakwe ūkūbenha ūbazwalīkīje ī shadi jabo.

¹⁵ Nabo ūkūbitīīla maguta gīt'ūmo ūlang'wītīle ū saabo, babize batūmami bane ba nīmo gwa būgabīji. Ū kwitīīlwa kwabo kwa maguta kūkūbingīja mu nīmo gwa būgabīji ūbo būkūbiza bo shibyalīlwe shose na shose īsho shiliza.”

Musa kūshikīlīja yose

¹⁶ Ū Musa akīīta būlī mhayo gīt'ūmo SEEBA walī wanagīīlīla.

¹⁷ Na lūūlū ī lipandī lya kwikala lyūzengwa ng'hana, lyīmīīla mu lūshikū lwa kwandya lwa ng'weji gwa kwandya, ng'waka gwa kabīlī.

¹⁸ Ū ng'wikanza lya kūlīzenga na kūlyīmīlīja ī lipandī lya kwikala, ū Musa akashitūūla ī shidako shalyo aho shalī shiigeleelilwe kwīma, na a mīīmīlīkījo ūgatūūla, nī mbawa ja magito ūjitūūla; nī ng'hīngī jaho ūjikīndīka jīmīīla.

¹⁹ Hanuma ya henaho ū Musa ūlyamba ī likundīkījo a higūlya y'ipandī lya kwikala, hūna nī likundīkījo lya higūlya yaho ūlītūūla, gīt'ūmo SEEBA walī wanagīīlīla.

²⁰ A mawe ayo gaalī na būkaanīji ūgasola ūgatūūla ū ng'wisandīko; hūna ī lisandīko lyenīlo ūlītūūlīla nī mitī ya kūlībūūkīja, hama nī lisumbī lya shigongo ūlītūūla a higūlya y'isandīko.

²¹ Hūna ī lisandīko ūlyenha ng'wipandī lya kwikala; hanuma ūlītūūla ī litundubaali lya kūshīkīja, ūlīshīkīja ī lisandīko lya būkaanīji, gīt'ūmo SEEBA walī wanagīīlīla.

²² Ū Musa wītūūla ī meza ū ng'wiheema lya kwibilingīla, lwande lwa sukuma ū ng'wipandī lya kwikala, kūnze y'itundubaali ly'isenge.

²³ Nī migatī wīhela a ha meza, kū būtongi bo ng'wa SEEBA, gīt'ūmo SEEBA walī wanagīīlīla.

²⁴ Ī likīndīkīlo lya talà ūlītūūla ng'wiheema lya kwibilingīla, kū lwandī lwa dakama ū ng'wipandī lya kwikala, lyūbiza bbihī nī meza.

²⁵ Nī talà jaho ūjigolanya kū būtongi bo ng'wa SEEBA, gīt'ūmo SEEBA walī wanagīīlīla.

²⁶ Ū Musa ūgūtūūla ū ng'walīlò gwa zahabu ū ng'wiheema lya kwibilingīla, kū būtongi w'itundubaali ly'isenge;

²⁷ hūna a higūlya yago ūpemba būbbani bo ng'waso nsoga, gīt'ūmo SEEBA walī wanagīīlīla.

²⁸ Hanuma ya henaho ūlītūūla ī litundubaali lya ha nyango gwa h'ipandī lya kwikala.

²⁹ Hama ū ng'walīlò gwa shitambò sha kūpemva ūgūtūūla hihī nū nyango gwa kwingīla ng'wipandī lya kwikala, ī liheema lya kwibilingīla; hūna ūfunya ho shitambò sha kūpemva, na shitambò sha būsu, gīt'ūmo SEEBA walī wanagīīlīla.

³⁰ Ī shiseme sha kūkalabīla ūshitūūla ha gatī gatī y'iheema lya kwibilingīla na ng'walīlò, hanuma ūtūūla mo minzī ga kūkalaba na kooja mhambala.

³¹ Ū Musa nū Alooni hamò na a bitūnja ba ng'wa Alooni būkalaba ng'wenūmo, booja nī mhambala jabo.

³² A minzī genayo gūbiza ga kūtūmamīla gwa gwa gwa kwiyooja gīko, būlī ikanza lya kwingīla ū ng'wiheema lya kwibilingīla; nūūlū balegeela ha ng'walīlò, gīt'ūmo SEEBA walī wanagīīlīla ū Musa.

³³ Hanuma ya henaho ūlūkilima nū lūūba lwa gwalugwa, kūlīpīndīlīja ī lipandī lya kwikala nū ng'walīlò, ūlītūūla nī litundubaali lya ha nyango gwa kwingīlīla ū ng'wipandī lya kwikala. Ū Musa lūūlū ūbiza wagūmala ū nīmo.

Ikūjo lya ng'wa SEEBA

³⁴ Hūna ī lilunde lyūlīkundīkīja ī liheema lya kwibilingīla, ī likūjo lya ng'wa SEEBA lyokala pa ū ng'wipandī lya kwikala.

³⁵ Ū Musa ūlemeelwa ū kwingīla ū ng'wiheema lya kwibilingīla, nguno ī lilunde lyalī lyalembeela a higūlya yalyo, nī likūjo lya ng'wa SEEBA lyalī lyookala ū ng'wipandī lya kwikala.

³⁶ Ū mu ng'endo jabo ī jose a Baisilaeli, būlī ikanza ī lilunde ūlū lyīnga a h'ipandī lya kwikala lyasegeja kūja kūngī, ī likanza lyenīlo nabo yabigeleelagwa kwandya lūgendo.

³⁷ Alīyo ī lilunde ūlū lītīngile, nabo baalī batīngaga ho kūja hose hose, kūshisha lūshikū lwa kūbūūka ī lilunde na kwīnga ho.

³⁸ Na lūūlū pyī ū mu shikū ja lūgendo lwabo, a makanza ga līīmi ī lilunde lya ng'wa SEEBA likalaga līlembeelile a higūlya y'ipandī lya kwikala, ī būjikū gwabakaga moto ū ng'wilunde lyenīlo, kūlwa kūbaakīla pye a banhū ba numba ya ng'wa Isilaeli.