Kūfuma 35 - Bibilia Ilagano Lya Kale 2015

Shilagīlo sha sabato ūmo shilī

¹ Ū Musa akabakuminga pye a Baisilaeli ūbawīla, “Ī mihayo īyī h'īyo SEEBA wamulagīlile kwīyīta.

² Mukūyīta ī milīmo ikanza lya shikū itandatū, alīyo ū lūshikū lwa mpungatī lūlī lwing'we lwa kwifuula. Ī yenīyo sabato ya kwifuula kūlwa ng'wa SEEBA. Ose ose ūyo wīta nīmo ū mu lūshikū lwenūlo shiigelile abūlagwe.

³ Ū mu lūshikū lwa sabato yaya kūpemba moto hose hose ū mu ng'hambī jing'we.”

Shakwinha kūlwa ipandī lya kwikala

⁴ Hanuma ū Musa ūlīwīla pyī ī libità lya Baisilaeli, “Ū mhayo ūyū h'ūyo SEEBA akagūlagīla ūhaya:

⁵ Nfunījagi shakwinha ū SEEBA kwīnga mu shikolo īsho mulī nasho. Ose ose ūyo ng'holò yakwe ītogilwe kwenha shakwinha kūlwa ng'wa SEEBA, ni enhage zahabu, feza, na shaba,

⁶ būlūba bo langi ya būlulu, na wanzulunge, na waza, na kitaani yawiza. Enhagi na boya bo mbūli,

⁷ na makūnza ga ng'ondi gadabbiwe mu langi yaza, na makūnza ga mbūli, hamò na mitī ya ng'wininga,

⁸ na maguta ga mizeituni kūlwa talà. Ng'wenhe na shingīla sha kūbeegeja maguta ga kūbatūūla batūmami ha nīmo na kūbeegeja būbbani bo ng'waso gwawiza.

⁹ Na mawe ga oniki na mawe gangī gangī a gawiza ayo gakūtūmama kūtūlwa ha kagoodi ka makono maguhī, na ha kamfuko ka ha shikuba.”

Baakoolī kwitanwa kū nīmo

¹⁰ A bose ū mu bing'we abo balī na būmani bo kūbeeja shikolo ni bizage babeeje ī shikolo īsho walagīlile ū SEEBA.

¹¹ Balībeeje ī lipandī lya kwikala nī liheema lyalyo, nī likundīkījo lyaho; na a madimījo, na a mīīmīlīkījo, nī mbawa ja magito, nī ng'hīngī, nī shidako sha ng'hīngī.

¹² Balībeeje nī lisandīko nī mitī ya kūlībūūkīja, nī lisumbī lya shigongo, hamò nī litundubaali ly'isenge lya kūlīshīkīja.

¹³ Bībeeje nī meza, nī mitī ya kwībūūkīja, hamò nī shiseme shaho pyī ī shose; nī migatī ya koolechiwa.

¹⁴ Balībeeje nī likīndīkīlo lya talà ya kwenha isana, nī shikolo shalyo, ī talà na a maguta ga talà.

¹⁵ Bagūbeeje nū ng'walīlò gwa kūzuukīja būbbani nī mitī ya kūgūbūūkīja; na a maguta ga kūbabila batūmami, nū būbbani bo ng'waso gwawiza. Babeeje nī litundubaali lya kūtūūla ha nyango gwa kwingīla ng'wipandī lya kwikala.

¹⁶ Nū ng'walīlò gwa shitambò sha kūpemva, nū lweyo lwaho ū lwa shaba, nī mitī ya kūgūbūūkīja, nī shiseme shaho ī shose; nī shiseme sha shaba ī sha kūkalabīla na kooja mhambala, nī likīndīkīlo lyasho.

¹⁷ Bagabeeje na a matundubaali ga gwalugwa, nī ng'hīngī jaho nī shidako shaajo; nī litundubaali lya kūtūūla ha mita gwa kwingīla ū mu gwalugwa.

¹⁸ Nī mambo ja kūtūmamīla h'iheema lya h'ipandī lya kwikala, na a ha gwalugwa, hamò nī ngoye jaho.

¹⁹ Basume na shizwalo mu būgaliili būtaale kūlwa būtūmami bo ng'wipandī lyeela, ī shizwalo sheela ī sha ngabīji Alooni, nī shizwalo sha bitūnja bakwe ūlū balītūmama nīmo gwa būgabīji.

Kafunīje ka Baisilaeli

²⁰ Hūna a Baisilseli a bose bīnga a halī Musa;

²¹ būlī ng'wene ūyo walī atogilwe kūfunya, nī ng'holò yakwe yankomigaga ū kūgwīta ū mhayo gwenūyo, wenha shakwinha sha kūmfunīja SEEBA, kūlwa nguno y'iheema lya kwibilingīla, nī milīmo yaamo ī yose; na kūlwa shizwalo sheela.

²² Pyī, bagosha na bakīma, abo baalī batogilwe bakiza; benha shikolo sha zahabu sha būlī mbika, būlembo bo kūtūūla ha shizwalo sha bakīma, sīlī ja kū matū na pete ja kū nzwala, na būlembo būngī būngī. A bose bakamfunīja ū SEEBA ī zahabu jabo, shūbiza shakwinha kūlī we.

²³ Būlī ng'wene ūyo walī na būlūba bo langi ya būlulu, ya nzulunge, yaza nūūlū kitaani yawiza, nūūlū boya bo mbūli, nūūlū makūnza ga ng'ondi gadabbiwe mu langi yaza, nūūlū ndīlī ja mbūli; akenha.

²⁴ Abo benhaga shakwinha sha feza nūūlū shaba, benhaga ī shikolo shenīsho bashifunya kūbiza shakwinha kūlwa ng'wa SEEBA; na būlī ng'wene ūyo walī na ntī gwa ng'wininga kūlwa kūtūmamīla nīmo gose gose, akagwenha.

²⁵ Būlī nkīma ūyo walī amanile kūsuma nūūlū kūdosa shikolo shose shose na makono gakwe, akenha īsho walī wabeeja; shikolo gītī būlūba wa būlulu, wa nzulunge, waza, nūūlū kitaani yawiza.

²⁶ Hama pye a bakīma abo baalī batogilwe na badūgije, bakadosa boya bo mbūli, būbūbeeja chiza na būgaliili būtaale.

²⁷ A batongeeji nabo benha mawe ga oniki, na mawe gangī gangī a ga mpango, kūlwa kūtūūlwa ha kagoodi ka makono maguhī, na a ha kamfuko ka ha shikuba.

²⁸ Bakenha na shisanjo sha ng'waso gwawiza, hamò na maguta ga mizeituni kūlwa talà na kūlwa maguta ga kūbitīīla batūmami na kūsanja mu būbbani wa ng'waso gwawiza.

²⁹ Pye a Baisilaeli, bagosha na bakīma abo baalī na būtogwa, bakang'wenhela ū SEEBA shakwinha mu ng'holò ya kwifunya kūlwa nīmo go ng'wa SEEBA, gīt'ūmo Musa walī wabalagīīlīla kwīta.

Baakoolī ba kūbeeja shikolo

³⁰ Hūna ū Musa ūbawīla a Baisilaeli, “Managi gīkī ū SEEBA wansolile Beezaleli, ū ng'witūnja o ng'wa Uuli, ū ng'wizūkūlū o ng'wa Huuli, wa lūganda lwa Yuda.

³¹ Ū SEEBA wang'okagije ū munhū ng'wenūyo Moyo o ng'wa Mulungu, na witegeleja na būdūla na būmani mu mbika jose ja kūbeeja shikolo.

³² Akūbeeja būlī mbika ja shikolo sha zahabu, feza, na shaba.

³³ Akūdūla nū kūyūbbuta mawe na mitī na kūtūmamīla būūkoolī būtaale kūshibeeja mu shikolo shose shose.

³⁴ Ū SEEBA wang'winhile ū munhū ng'wenūyo hamò na Oholiabu ng'witūnja o ng'wa Ahisamaki, wa lūganda lwa Dani, būdūla wa kūbalanga na bangī.

³⁵ Wabinhile būdūla wa kūbiza baakoolī ba kūdūla kūlūnganīja, na kūbeegeleja shikolo mu būgaliili būtaale, na kūsuma chiza kūtūmamīla būlūba wa būlulu, wa nzulunge na waza, na kitaani yawiza; babize bamani ba kūsuma shikolo. Pye a bose babize baakoolī bataale mu kūbeeja ī shikolo.”