Kūfuma 30 - Bibilia Ilagano Lya Kale 2015

Ng'walīlò gwa kūzuukīja būbbani

¹ Ūkūbeeja ng'walīlò gwa ntī gwa ng'wininga, kūlwa kūzuukīja būbbani.

² Ū būlīhu nū būgalī galī wago būkūbiza būlenganīlile, sentimita makūmi atanò būlī lwandī, ū būgūngūhu sentimita makūmi kenda; gūbize na mapembe gadimanījiwe ho, gūbiza shikolo shimò nago.

³ A higūlya ūkūgūbila zahabu ū gose, pye na a mapembe gabize na zahabu, nū mu kabazu; ū mu mhelo mhelo ūkūgūpīndīlīja būlenji bo lūgala lo zahabu lūbeegichiza.

⁴ Hama a ha sīlīlī ya lūgala, ū lwandī ūlū nū lwandī ū lūngī, ūkūtūūla matendele ga kwībītya mo ī mitī ya kūgūbūūkīja.

⁵ Nī mitī yenīyo ūkwībeeja ya ng'wininga, wībile zahabu nayo.

⁶ Ū ng'walīlò gwenūyū ūkūgūtūūla kū būtongi w'isenge ly'itundubaali īlo līlīshīkīgije ī lisandīko lya būkaanīji, gūbize kū būtongi w'isumbī lya shigongo īlo līlī higūlya ya būkaanīji, aho nakūyūmanhīja nang'ho.

⁷ Ū Alooni akūyūzuukīja būbbani a ha ng'walīlò gwenūyo, būlī lūshikū ī dilū ūlū alījibeeja ī talà.

⁸ Nī mhīndī ūlū alījibacha ī talà, shiigelile azuukīje hangī ū būbbani; ū mu shibyalīlwe īsho shiliza, shiigelile būbize ho būbbani wa kūzuukījiwa būlī lūshikū ū kū būtongi bo ng'wa SEEBA.

⁹ A ha ng'walīlò gwenūyū yaya gete kūzuukīja ho būbbani wa mbika yīngī yose yose, nūūlū shakwinha sha kūpemva, nūūlū shakwinha sha kūlyiwa; yaya nūūlū kwita ho shitambò sha kūng'wiwa.

¹⁰ Ū Alooni akūyūbeegeja isangī a ha mapembe ga ng'walīlò gwenūyo kamò būlī ng'waka. Ī lisangī lyenīlo akūlyīta mu nzīla ya mininga ga shitambò īsho shikūfunyiwa kūlwa nguno ya shibi, kūlwa kwenha būsangī ū mu shibyalīlwe shose īsho shiliiza. Ū mhayo gwenūyū gūlī ng'wela no ū kūlī SEEBA.

Shakwinha kūlwa būsangī

¹¹ Hūna ū SEEBA ūng'wīla hangī ū Musa gīkī,

¹² “Ūlū ūbūūcha nīmo gwa kūbabala a Baisilaeli, a h'ikanza lya kūbalwa būlī ūmò shiigelile afunye sabo kūlwa ng'wa SEEBA, nguno ya kwikomoola būpanga wakwe. Ū mu kwīta gīko batūgwīlwa ikūla nūūlū ūkababala.

¹³ Būlī ng'wene ūlū ūbalwa akūfunya nusu shekeli ya shakwinha kūlwa ng'wa SEEBA, hūna ūja kū lwandī lwa babo baamalaga kūbalwa. Ū mpango gwayo gūbize gūlenganīlile nū gwa shekeli ya ng'wipandī lyeela, īyo būdito wayo būzunīlījiwe.

¹⁴ Pye abo bakūja ū kū lwandī lwenūlo, abo balī na myaka ya kwandīja makūmi abīlī na kūja kwigūlya, bakūshifunya ī shakwinha kūlwa ng'wa SEEBA.

¹⁵ Ūlū mulīfunya shakwinha kūlwa ng'wa SEEBA nguno ya kwikomoola būpanga wing'we, a basabi batūfunya sabo ningī kūtinda ī nusu ya shekeli, na a bahabī batūfunya ha sīlīlī ya henaho.

¹⁶ Ī hela ja kwikomoola ījo ūlajanukūle kūfuma ū kū Baisilaeli, jikūtūmama nīmo gwa ng'wiheema lya kwibilingīla. Ī shakwinha shenīshi shikūbiza shiizūkījo kūlī SEEBA, kūlwa kūtūūla ho būsangī nguno ya būpanga wing'we.”

Shiseme sha kūkalabīla na kooja mhambala

¹⁷ Hangī ū SEEBA ūng'wīla ū Musa gīkī,

¹⁸ “Ūkūbeeja shiseme sha kūkalabīla na kooja mhambala; shibeejage sha shaba, pyī nī likīndīkīlo lyasho. Ūkūshikīndīka ha gatī y'iheema lya kwibilingīla nū ng'walīlò, hūna ūtūūle mo minzī.

¹⁹ Ū Alooni na a bitūnja bakwe bakūyūkalaba ng'wenūmo, nī mhambala jabo booja na minzī.

²⁰ Būlī ikanza ūlū balingīla ū ng'wiheema lya kwibilingīla, īkūbigeleela kūkalaba, na kooja ī mhambala jabo ū mu minzī genayo, batizūcha. Nī likanza lya kwegeela ha ng'walīlò kūfunya shakwinha kūlī SEEBA mu nzīla ya moto,

²¹ bakūkalaba a makono gabo, booja nī mhambala jabo, batizūcha. Ī shenīshi shilī shilagīlo sha būja na būja kūlwa ng'wa Alooni nū būbyīle wakwe; pyī ū mu shibyalīlwe īsho shiliza.”

Maguta ga nīmo go ng'wa SEEBA

²² Hūna ū SEEBA ūng'wīla hangī ū Musa gīkī,

²³ Solaga shiishi shingīla shawiza, Shekeli magana atanò ja ngazu ya minzī, shekeli magana abīlī na makūmi atanò ja dalasini ya ng'waso nsoga, shekeli magana abīlī na makūmi atanò ja ndago,

²⁴ na shekeli magana atanò ja kasia, ī jose jibize na mpango gwa kūlenganīla na shekeli ya ng'wipandī lyeela; hama na lita inè ja maguta ga mizeituni.

²⁵ Ī shingīla shenīshi shikūbeejiwa magūta meela ga kūbitīīla batūmami ba ngw'a SEEBA, hamò na shitūmamīlo sha nīmo gwakwe. Gabize ga ng'waso gwawiza, ga kūbeejiwa na koolī mu kūsanja sanja maguta; a goi galī maguta meela kūlwa nīmo go ng'wa SEEBA.

²⁶ Ūkūgatūmamīla kūlībila ī liheema lya kwibilingīla, nī lisandīko lya būkaanīji;

²⁷ nī meza hamò nī shikolo shayo pyī ī shose, nī likīndīkīlo lya talà na a matambī galyo, nū ng'walīlò gwa kūzuukīja būbbani;

²⁸ nū ng'walīlò gwa shitambò sha kūpemva, nī shiseme shago pyī ī shose; nī shiseme sha kūkalabīla nī likīndīkīlo lyasho.

²⁹ Ī shikolo shenīsho ūkūsheeja shibize sheela no no no; na būlī shikolo īsho shiikuumya nasho, shikūbiza sheela.

³⁰ Ū Alooni ūkūng'witīīla maguta, na a bitūnja bakwe; banitūmamīle nīmo gwa būgabīji.

³¹ Bawīlage a Baisilaeli gīkī, “Ū mu shibyalīlwe shose īsho shiliza, a genaya gakūbiza maguta gane meela, kūlwa nīmo ng'wela.

³² Gatī ga kwitīīlwa munhū ose ose mīlī gwakwe, nūūlū yaya kūbeeja maguta gangī kūfuma mu shingīla sha kwikola nī sha genaya. A maguta genaya galī meela, īng'wigeleelilwe kūgisaaba gīkī galī meela.

³³ Ose ose ūyo ūbeeja maguta ga mbika gītī īyī, nūūlū ose ose ūyo ūmila munhū atī ngabīji a maguta genaya, akūkomanyiwa aponyiwe īnge ū mu banhū bakwe.”

Kūbeeja būbbani

³⁴ Ū SEEBA ongeja kūng'wīla ū Musa, “Solaga shingīla sha kūnung'ha ng'waso gwawiza, natafi, shekeleti na kelibena, hamò na ngazu jawiza; ī shose shibize shilenganīlile ū wingī.

³⁵ Ū kūfuma ū mu shingīla shenīshi, ūkūbeeja būbbani wa kūfunya ng'waso gwawiza; būbeejiwe na koolī, ūyo amanile kūsanja shingīla. Ū būbbani wenūbū būsanjiwe munhu, būbize bowiza, hama wela.

³⁶ Ūkūsola būgehu ūbūshe būnoge gītī būsu, hūna ūkatūūle ū kū būtongi w'isandīko lya būkaanīji, ū ng'wiheema lya kwibilingīla, a h'ipandī īlo nakūyūmanhīja nang'ho. Ī shikolo shenīshi shikūbiza sheela no ū kūlī bebe.

³⁷ Yaya ū kūshitūmamīla ī shingīla shenīshi mu kwibeegeja būbbani wa mbika yīngī; ū būbbani wenūbū wisaabage gīkī būlī wela no kūlwa ng'wa SEEBA.

³⁸ Ose ose ūyo ūbeeja shikolo sha kūbiza gītī shenīshi kūlwa kūkooba kwiyeja dūhū, akūkomanyiwa aponyiwe īnge ū mu banhū bakwe.”