Kūfuma 3 - Bibilia Ilagano Lya Kale 2015

Musa n'isaka līkūbakaga moto

¹ Na lūūlū ū Musa ūyūjidīīma ī ng'holo ja nkwīye ū Yesilo, ūyo walī ngabīji wa Midiani. Lūshikū lūmò aho wajichilūla ūjiloja kwitogolo ilebe lyalīho, ūlīkīla ūūkajishisha kū lūgūlū lwa ng'wa Mulungu, lwa Holebu.

² Aho alī kwenūko malaika o ng'wa SEEBA ūng'wilongela mu ndali ja moto gūkūligimaga kūfuma ng'wisaka. Ū Musa ūlībona ī lisaka lyenīlo līlībaka moto, alīyo ū kūjiga yaya;

³ wiganika, “Ī gete negeele ho nalole chiza, nagūbone ū mhayo gwenūyū; ni kinehe ī lisaka lyenīlī lītūjigaga!”

⁴ Ū SEEBA aho wabona gīkī wegeela ho alole, ū Mulungu ūng'witana kūfuma ū ng'wisaka lyenīlo, “Musa Musa!” Nang'hwe ū Musa widīka, “Nene aha.”

⁵ Ū Mulungu ūng'wīla, “Yaya ū kwegeela a henaha, nīyo īnjaga ī shilatū ū kū mhambala jako, nguno a h'ipandī īlo wīmīīlaga halī heela.”

⁶ Ongeja kūng'wīla, “Ū nene nalī Mulungu o ng'wa so; nalī Mulungu o ng'wa Abulahamu, Mulungu o ng'wa Isaka, na Mulungu o ng'wa Yakobo.” Ū Musa wikundīkīja ū būshū wakwe, nguno akogoha ū kūnola ū Mulungu.

Mulungu kūntūma Musa

⁷ Ū SEEBA ūhaya, “Naakūbonile ū kūluhiwa kwa banhū bane ū mu Misili. Naabigwile ūmo bakūlīlīlaga kūlwa banhū abo bakūbaluhyaga mu milīmo ya būsese; naabūbonile ū būluhi wabo.

⁸ Na lūūlū nizaga kūbapīja, kūbīnja ū mu nkono gwa Bamisili, nabafunye ū mu sī yenīyo nabatwale kū sī yawiza hangī ngalī, sī ya būhondo; yakūsūlūlūka būki na mabeele sī īyo ī haha bakwikalaga mo Bakanaani, Bahītī, Baamoli, Bapelizi, Bahīvī na Bayebusi.

⁹ Kwanipandīkile ū kūlīla kwa Baisilaeli, naababonile a Bamisili ūmo bakūbaluhījaga.

¹⁰ Na lūūlū ī haha nalīkūtūma ū kūlī Falao, ūje ūkabafunye a banhū bane ū mu sī ya Misili.”

¹¹ Alīyo ū Musa ūhaya, “Ū nene nalī nani nose naje kūlī Falao nakabīnje mu Misili a Baisilaeli, bafume mo?”

¹² Ū Mulungu ūng'wīla, “Nakūbiza nang'ho, ī shimanīkījo sha gīkī naakūtūmaga nene shikūbiza gīkī, ūlū ūbafunya a banhū ū mu Misili, mukūnamya ū Mulungu mu lūgūlū lwenūlū.”

¹³ Ū Musa ūhaya hangī, “Ī gīsī ūlū nūja ū kū Baisilaeli kūbawīla gīkī, ‘Ū Mulungu wa basīng'we wanitūmaga,’ hūna būnibūūja, ‘Nani ī lina lyakwe?’ Nakūbawīla kinehe?”

¹⁴ Ū Mulungu ūng'wīla, “NENE ŪYO NALĪ NENE. H'ūmo ūkūbawīlīla a Baisilaeli, ūyo alī ‘Nene’ hū ng'wene wanitūmaga ū kū bing'we.”

¹⁵ Ū Mulungu ūng'wīla hangī ū Musa, “Ūkūbawīla a Baisilaeli gīkī, ‘Ū SEEBA, ū Mulungu wa babyaji bing'we, ū Mulungu o ng'wa Abulahamu, Mulungu o ng'wa Isaka na Mulungu o ng'wa Yakobo, hū ng'wene wanitūmaga nize ū kū bing'we.’ Ī lyenīlī h'ī lina lyane welelo na welelo; banhū ba shibyalīlwe shose ībigeleelilwe kūnizūkwa mu lina lyenīlo.

¹⁶ Jaga ūkabakuminge a banamhala ba Baisilaeli ūbawīle gīkī, ‘Ū SEEBA, ū Mulungu wa babyaji bing'we, ū Mulungu o ng'wa Abulahamu, o ng'wa Isaka na o ng'wa Yakobo, wanilongelile ūniwīla, naamulolile nībona īyo mukwītīlagwa ū mu Misili.’

¹⁷ Na lūūlū ū nene nalīhaya gīkī, ‘Nakūng'wīnja ū mu sī ya būpīna wing'we, ī ya Misili; namutwale kū sī ya Bakanaani, Bahītī, Baamoli, Bapelizi, Bahīvī na Bayebusi; sī ya būhondo. Yakūsūlūlūka būki na mabeele.’

¹⁸ A banamhala ba Baisilaeli bakūkūdegeleka dūhū; na lūūlū ū bebe na a banamhala benabo mukūja ū kūlī ntemi wa Misili mukang'wīle gīkī, ‘Twamanhije nū SEEBA, ū Mulungu wa Bahebulania. Alilūūlū, tūzunīlījage tūje lūgendo lwa shikū idatū ng'witogolo; tūkamfunīje shitambò ū SEEBA Mulungu wise.’

¹⁹ Alīyo namanile gīkī ū ntemi wa Misili atūmuzunīlīja kūshisha nkono gwa būdūla gūng'hadīkīje.

²⁰ Hūna lūūlū nakūgūgoloola ū nkono gwane nītūle ī sī ya Misili mu nzīla ja mihayo ya kūkaamaaja, īyo nakwīyīta ū mubo. Hanuma ya henaho akūmuzunīlīja muje.

²¹ Nīyo a Bamisili nakūbīīta babazunīlīje a banhū benaba pyī īyo bakūbalomba; nose ūlū mulīnga mutīnga makono dalali yaya.

²² Būlī nkīma akūlomba kūlī nzenganwa ng'wiye, nūūlū kūlī ose ose ūyo akwikalaga hamò nang'hwe mu kaya, akūlomba shikolo sha feza na sha zahabu na myenda, ya kūbazwalīkīja a bitūnja bing'we na a bashīke bing'we. Na lūūlū ū mu gīko a Bamisili mukūbasonza pyī ī shikolo.”