Kūfuma 28 - Bibilia Ilagano Lya Kale 2015

Shizwalo sha bagabīji

¹ “Ū mu Baisilaeli nsolage ū Alooni na a bitūnja bakwe a ba Nadabu, Abihu, Eliezeli, nū Itamaali, babize batūmami ba nīmo gwa būgabīji kū būtongi wane.

² Ū nkūlūyo ū Alooni meegejage shizwalo sheela sha koolecha būtaale n'ikūjo.

³ Balīho baakoolī, abo naabinha witegeleja mu mihayo gītī yenīyo; pye a bose hoyaga nabo, ūbawīle gīkī shibigelile bameegeje ū Alooni shizwalo sha koolecha gīkī alī nsolwa kūlwa kūnitūmamīla nīmo gwa būgabīji.

⁴ Ī shizwalo īsho bakūbeeja shilī īshi, kamfuko ka ha shikuba, kagoodi ka makono maguhī, ng'hanjo, igoodi lya mabala mabala, ihima, na ngwasho. Ī shizwalo shenīshi bakūmeegeja ū nkūlūyo, ū Alooni hamò na a bitūnja bakwe, sha kūzwala ūlū alītūmama kū būtongi wane nīmo gwa būgabīji.

⁵ A babeeja bakūtūmamīla zahabu, būlūba wa būlulu, wa nzulunge, na waza, hamò na kitaani niza.”

Kagoodi ka makono maguhī

⁶ “A kagoodi ka makono maguhī ūkūkabeeja ka zahabu īsangije na būlūba bo būlulu na bo nzulunge na waza, hamò na kitaani īdosilwe na būgaliili būtaale; nīmo go ng'wa koolī ngoogo.

⁷ Kakūbiza na shipande shibīlī shidimanīgije a ha mabega shūsumīīlwa ho, kadūle kūfatanyiwa hamò.

⁸ Ū mu nkīmbīlī katūūlīlwe ngwasho gwa kwiyikola nako, gwa zahabu īsangije na būlūba wa būlulu na bo nzulunge na waza, hamò na kitaani īdosilwe chiza; gūsung'we na būgaliili būtaale, hūna gūdaamīlījiwa a ha ko, gūbiza mīlī gūmò nako.

⁹ Hanuma ūkūsola na mawe abīlī ga oniki, ūgandīke ho a mina ga bitūnja ba ng'wa Isilaeli,

¹⁰ gīt'ūmo bihelelile mu kabyalīlwe kabo. A h'iwe lya kwandya ūtūūle mina atandatū, nī lya kabīlī atandatū.

¹¹ A mina ga bitūnja ba ng'wa Isilaeli gandīkage a ha mawe gīt'ūmo koolī wa kwandīka akīītīlaga ūlū aloola wandīke h'imeng'helo. Hūna a mawe genayo ūkūgadaamīlīja mu mabalala ga zahabu.

¹² Hanuma ūkūgasumīīla a ha shipande ī shibīlī īsho shilī ha mabega ga kagoodi ka makono maguhī, gabize mawe ga shiizūkījo kūlwa baana ba ng'wa Isilaeli. Ū Alooni akūgabūūcha a mina gabo a ha mabega gakwe kūlwa shiizūkījo kū būtongi bo ng'wa SEEBA.

¹³ Ūkūbeeja na mabalala ga zahabu,

¹⁴ na migufu ībīlī ya zahabu īdosilwe gītī ngoye na būgaliili būtaale, hūna ī migufu yenīyo wīlūnganīje a ha mabalala genayo.”

Kamfuko ka ha shikuba

¹⁵ Ūkūbeeja kamfuko ka ha shikuba ka nīmo gwa kūfunya būlamuji; ū meeja wako abize koolī ngoogo. Nako kabeejage gīt'ūmo kalī a kagoodi ka makono maguhī; kabize ka zahabu īsangije na būlūba wa būlulu na wa nzulunge na waza, hamò na kitaani īdosilwe na būgaliili būtaale.

¹⁶ Kabize ka malīngīīla dūhū, ū būlīhu nū būgalī galī wako būbize būlenganīlile; sentimita makūmi abīlī n'ibīlī būlī lwande; hama kabize kagondilwe habīlī.

¹⁷ Katūūlīlwe ng'hīlīlī inè ja mawe ga mpango; ū mu lūhīlīlī lwa kwandya jibize mo lubi, topazio na belilo.

¹⁸ Ū mu lūhīlīlī lwa kabīlī jibize mo takwiyo, safilo na sumaladi;

¹⁹ Ū lwa kadatū lūbize na yakonto, agate na ametisto.

²⁰ Ū mu lwa kanè jibize mo klisolito, sadoniko na yaspi. Hūna a mawe ga mpango genayo ūkūgapondela mu mabalala ga zahabu gasheeleele ng'wenūmo.

²¹ A goi gakūbiza ikūmi n'abīlī; iwe līmò kūlwa būlī ūmò wa bintūnja ba ng'wa Isilaeli, būlī lyene lyandīkwe lina lya lūganda lūmò ū mu ng'anda īj'ikūmi n'ibīlī.

²² A kamfuko ka ha shikuba ūkūkabeegeja migufu ya zahabu īdosilwe chiza na būgaliili būtaale.

²³ Hūna ūkūbeeja na tūgwasījo twawiza, twa zahabu tūsung'we ha mhembeelo ibīlī a ha kamfuko ka ha shikuba.

²⁴ Ī migufu ya zahabu īgwashiwe ū kū tūgwasījo twa zahabu ūto tūlī ū kū mhembeelo ja kamfuko ka ha shikuba.

²⁵ Ī lipandī ī līngī ī lya migufu yenīyo līdimanījiwe ū kū mabalala ga zahabu; ībize yaadimanījiwa kū būtongi wa shipande shibīlī ī sha ha mabega ga kagoodi ka makono maguhī.

²⁶ Hanuma ūkūbeeja na tūgwasījo tūngī tūbīlī twa zahabu, tūdimanījiwe ū kū mhembeelo ja kamfuko ka ha shikuba ījo jilī ū kwipandī lya mugatī, ījo jiikuumije na a kagoodi ka makono maguhī.

²⁷ Hūna ūkūbeeja na tūgwasījo tūngī tūbīlī twa zahabu, ū twene tūdimanījiwe a ha sīlīlī ya shipande shibīlī ī sha ha mabega ga kagoodi ka makono maguhī, a ha būtongi yaho; bbihī nū būlūngīlo wa ngwasho gwa mu nkīmbīlī ū gwa kagoodi ka makono maguhī.

²⁸ Ū tūgwasījo twa kamfuko ka ha shikūba shiigelile tūtungwe na katungījo ka langi ya būlulu ū kū magwasījo ga ha kagoodi ka makono maguhī. Kwīngīīla a henaho tūlūngwa a ha ngwasho gwa mu nkīmbīlī, kūlwa kūkahangīja a kamfuko ka ha shikuba katizihubenga kwīnga a ha kagoodi ka makono maguhī.

²⁹ Būl'ikanza ū Alooni ūlū alingīla ū ng'wipandī lyeela, akūyūbiza nago a mina ga Baisilaeli, agabūūkije mu ng'holò yakwe a ha kamfuko ka ha shikuba; a ka kūfunīja būlamuji, kūlwa shiizūkījo sha būja na būja kū būtongi bo ng'wa SEEBA.

³⁰ Ū mu kamfuko ka ha shikuba ūkūtūūla mo na “Ulimu” hamò na “Sumimu” najo jibize a ha shikuba sha ng'wa Alooni būl'ikanza ūlū alingīla kū būtongi bo ng'wa SEEBA. Ū mu gīko, ū mu ng'holò yakwe ū Alooni akūbiza na nzīla ya kūbalamula a Baisilaeli ū kū būtongi bo ng'wa SEEBA.

Shizwalo shingī sha bagabīji

³¹ Ī ng'hanjo ya kūzwalwa higūlya ya kagoodi ka makono maguhī, ūkwībeeja ya ng'wenda gwa langi ya būlulu dūhū.

³² A ha gatī ībize n'ipūndū lya kūbītīja ntwe; wīsumīīle na shipande sha ng'wenda kūlīpīndīlīja ī lipūndū lya kūbītya ū ntwe, ītizūdasimūka na kūtandūka.

³³ Pye a hose ū ng'wipīndo lyayo ūkwītūūlīla būlenji wa makomamanga ga langi ya būlulu, ya nzulunge, na yaza; hūna ūtūūla na nzoozo ja zahabu, jiitobanīja na a makomamanga.

³⁴ Ī nzoozo ja zahabu na a makomamanga shihelwe mu kwibisanya bisanya hose pyī ū ng'wipīndo lyayo ī ng'hanjo yenīyo.

³⁵ Ī ng'hanjo yenīyo īkūbiza ya kūzwala ū Alooni ūlū alītūmama. Ūlū alingīla ū ng'wipandī lyeela ū kū būtongi bo ng'wa SEEBA, nūūlū alīfuma ī hanze, kūkwigwiwa ū kūlīla kwa nzoozo atizūūcha!

³⁶ Ūkūbeeja n'ibalala lya zahabu yawiza, ūlyandīke gīkī, “NG'WELA KŪLĪ SEEBA.”

³⁷ Hūna ūlītunge n'itungījo lya langi ya būlulu, a ha būtongi w'ihima.

³⁸ Ī libalala lyenīyo līkūbiza kū būshū bo ng'wa Alooni; ū wei akūbūbūūcha ū būkenaagūji ūbo būkwītagwa mu mihayo ya shakwinha sheela shose shose, īsho Baisilaeli bakūsheejaga. Ī libalala lyenīyo līkūbiza kū būshū bo ng'wa Alooni būlī ikanza, kūlwa gīkī banukūlwe ū kū būtongi bo ng'wa SEEBA.

³⁹ Ī shadi ya mabala ūkwībeeja ya kitaani yawiza, nī lihima lībize lya kitaani yawiza nayo. Ū ngwasho gūbeejiwe na koolī ngaliili gete ū mu nīmo gwenūyo.

⁴⁰ A bitūnja ba ng'wa Alooni ūkūbabeegeja mashati na migwasho na shikoye sha kwitunga kū ntwe, kūlwa koolecha gīkī balī banhū bataale na bakūjiwa.

⁴¹ Ūlū ūmala ū kūnzwalīkīja ī shizwalo shenīshi ū nkūlūyo ū Alooni, hamò na a bitūnja bakwe, bitīīlage maguta kūlwa kūbatūūla a ha nīmo. Ūkūbeejà kūlwa nguno ya kūnitūmamīla nīmo gwa būgabīji.

⁴² Ūkūbabeegeja na shizwalo sha mu gatī sha kūfīīkīja mibīlī yabo. Ū būlīīhu washo būbize kwandīja mu nkīmbīlī kūshisha mu matango.

⁴³ Ū Alooni na a bitūnja bakwe bakūyūshizwala būlī ikanza ūlū bingīla ū ng'wiheema lya kwibilingīla; nūūlū ū ng'wipandī lyeela ūlū būhaya kwegeela ha ng'walīlò kūtūmama, batizūgwa mu kwihīga na kūcha. Ī shenīshi shikūbiza shilagīlo sha būja na būja kūlwa ng'wa Alooni nū būbyīle wakwe.