Kūfuma 24 - Bibilia Ilagano Lya Kale 2015

Mininga g'ilagane

¹ Hūna ūng'wīla ū Musa, “Nzūgū ū bebe kūlī SEEBA; wize nang'hwe ū Alooni hamò nū Nadabu, nū Abihu, na a banamhala ba Baisilaeli abo makūmi mpungatī. A bangī benaba bakūlamya balī ka kūle ho;

² Musa iyene akwegeela ū kūlī SEEBA; alīyo a boi yaya ū kwegeela, pye na a banhū a bangī batiziza hamò nang'hwe.”

³ Ū Musa aho wiza kūbawīla a banhū pyī ī mihayo nī shilagīlo sha ng'wa SEEBA, būshosha n'ilaka līmò, “Ī mihayo yose īyo alīyīhaya ū SEEBA tūkwīyīta.”

⁴ Hūna ū Musa ūyandīka pyī ī mihayo īyo walī wīhaya ū SEEBA. Ntondo yaho wipuuna dilū ūbeeja ng'walīlò a ha sīlīlī ya lūgūlū; ūtūūla ho na ng'hīngī ikūmi n'ibīlī ja mawe, kūlenganīla nī ng'anda ikūmi n'ibīlī ja Baisilaeli.

⁵ Hanuma ya henaho ūsolanhya Baisilaeli badinha, būmfunīja ū SEEBA shitambò sha kūpemva mu moto, na nzagamba ja shitambò sha būsangī.

⁶ Ū Musa ūgasola a mininga gamò ūgatūūla mu mabakuli, a gangī ayo gakasaaga ūgaseeseebela ha ng'walīlò.

⁷ Hanuma ūshisola ī shitabo sha būlagane ūbasomela a banhū. Nabo būhaya, “Tūkwīyīta pyī īyo wīhayaga ū SEEBA; tūkūbiza bigwi.”

⁸ Hūna ū Musa ūgasola a mininga, ūbaseeseebela a banhū kūnū alībawīla, “A genaya galī mininga g'ilagane īlo SEEBA wabeejaga hamò ning'we kūlenganīla nī mihayo ī yose īyī.”

⁹ Ū Musa nū Alooni, nū Nadabu nū Abihu, na a banamhala makūmi mpungatī a ba Baisilaeli būlinha ū mu lūgūlū;

¹⁰ būmona ū Mulungu wa Isilaeli. Ū kū sīlīlī ya magūlū gakwe haalī gītī ipandī ilenganīzu lītelelejiwe lyūtūūlīlwa iwe lya safilo ndabagīzu yawiza gītī igūlū lyenekīlī.

¹¹ A batongeeji ba Baisilaeli benabo bakamona ū Mulungu, alīyo ū Mulungu atabakuumije na nkono gwakwe; bakikala bapanga, bakūlyaga na kūng'wa.

Musa kūlinha mu lūgūlū

¹² Ū Mulungu ūng'wīla ū Musa, “Linhaga kūūnū kū lūgūlū tūkabize hamò kwenūko, nakwinhe mabalala ga mawe galī na shilagīlo na malange ayo nagandīkaga kūlwa kūbalanga a banhū.”

¹³ Na lūūlū ū Musa ūbūūka ajile hamò na Yoshwa, ūyo walī ngunanhi wakwe, ū Musa ūlinha ū mu lūgūlū lwa ng'wa Mulungu.

¹⁴ Ūbawīla a banamhala, “Tūlindīīlagi henaha kūshisha tūshoke, tūkūmusanga; balīho ba Alooni na Huuli, ūlū munhū ūzwangana mu mhayo gose gose, akūbabona benabo.”

¹⁵ Ū Musa aho walinha ū mu lūgūlū, ilunde lyūlūkundīkīja;

¹⁶ hūna ī likūjo lya ng'wa SEEBA lyūlembeela a ha lūgūlū lwa Sinai, ī lilunde lyenīlo līkalūkundīkīja ū lūgūlū ikanza lya shikū itandatū; ū mu lūshikū lwa mpungatī ū SEEBA ūng'witana ū Musa kūfuma ū ng'wilunde ng'wenūmo.

¹⁷ Ū kū Baisilaeli ī likūjo lya ng'wa SEEBA lyali gītī moto gūkūligimaga a higūlya ya lūgūlū.

¹⁸ Na lūūlū ū Musa ūkolobela ū mu lūgūlū, wingīla ū ng'wilunde. Akikala ū mu lūgūlū ng'wenūmo shikū makūmi anè, līīmi na būjikū.