Kūfuma 21 - Bibilia Ilagano Lya Kale 2015

Būsese kū Bahebulania

¹ Hūna lūūlū, ūkūbatūūlīla ī shilagīlo īshi.

² Ūlū ūngūla ūmò wa Bahebulania kūbiza nsese wako, akūkūtūmamīla ikanza lya myaka ītandatū. Alīyo ū mu ng'waka gwa mpungatī ng'winhage wiyaabī aje, atizūgongwa kūfunya sabo ya kūnkomoola.

³ Ūlū wiza iyene akūja iyene, alīyo ūlū walī na nke aho aliza, akūnjana nū nke wakwe.

⁴ Gwike ūlū ūtoojiwa nū ise būgonzo, hūna ū nkīma ng'wenūyo ūmyalīla baana bagosha na bakīma, ū nkīma na a baana bakūbiza ba ng'wa ise būgonzo; ūlū lyūshika ikanza lya kūja ū ngosha, akūja wei iyene dūhū.

⁵ Alīyo ū nsese ng'wenūyo ūlū ūhaya gīkī, “Ū nene nantogilwe ū baba būgonzo nū nke wane na a baana bane; natatogilwe ū kwīnga kūlwa wiyaabī bo mbika yenīyo.”

⁶ A henaho ū ise būgonzo īkūng'wigeleelwa anshishe kū balamuji; hanuma ya henaho akūntwala ha nyango, nūūlū ha ng'hīngī ya ha nyango ūūkanchibūla ū gūtū na meelo. Na lūūlū kwīngīīla henaho akūbiza nsese wakwe ilalī.

⁷ Ūlū munhū ūnjinja nshīke wakwe mu būsese, ū ng'wene atīko kwinhwa būtungūlwa gīt'ūmo bagosha bakīītīlagwa.

⁸ Ūlū ūleka ū kūnyeja ū ise būgonzo ūyo alīnsola abize wakwe, akūnekela akomoolwe na bangī; atūdūla kūnjinja kū banhū ba mahanga īkī wamalaga kūnkenaagūja ikūjo.

⁹ Ūlū ūnsola kūlwa ng'witūnja wakwe, īkūng'wigeleelwa kūng'wisaaba gīkī al'ūmò wa bashīke bakwe.

¹⁰ Ū ngosha ūlū ūtoola nkīma ūngī, ū wa kwandya atizūnekanīja ū mu mihayo ya shilīwa na shizwalo, pyī nī yīngī īyo shiigelile kwītīlwa nkīma ntooleke.

¹¹ Ūlū ooya kūng'wītīla ī yenīyo, n'ang'winhage wiyaabī aje ūmo alī; ndūhū kūlīpa sha kūkomoolelwa.

Mhayo gwa kūbūlaga munhū

¹² “Ose ose ūyo ūntūla munhū ūmūlaga, nang'hwe akūbūlagwa.

¹³ Gwike ūlū ūgwīta ū mhayo gwenūyo mu kūhūbīla, Mulungu ūbiza walī agūhelile chene, akūpeelela kwipandī īlo nakūlyolecha hanuma.

¹⁴ Alīyo ūlū munhū ūng'wikanwa ng'wiye hūna ūmūlaga, ū ng'wenūyo ng'wīnjagi nūūlū ha ng'walīlò gwane, abūlagwe.

¹⁵ Ose ose ū wa kūntūla ise nūūlū nina ūmūlaga, shing'wigelile abūlagwe.

¹⁶ Ūlū ose ose wiba munhū ūūkanjinja, nūūlū ūding'wa ataalī nang'hwe, ū ng'wenūyo akūbūlagwa.

¹⁷ Ose ose ūyo ūndūka ise nūūlū nina, shing'wigelile kūbūlagwa.”

Wilemeelwa na wikenya

¹⁸ “Ūlū banhū babīlī bilemeelwa hūna ūmò wabo ūntūla iwe ū ng'wiye, nūūlū ngumī, alīyo ūleka ū kūcha, ūminyiwa dūhū ūbiza wa mu būlīīlī,

¹⁹ Ū ntūlwa ūlū ūpīla wandya na kūyūyeela yeela hanze akwikīndīkījaga ha nkīndo, ū ntūji atūbalīlwa nsango. Gwike akūnīpa ūyo walī waminije, kūlwa nguno y'ikanza īlo lyajimīīlile alaalile, nīyo īkūng'wigeleelwa kūngunanha kūshisha apīle gete.

²⁰ Ūlū munhū ūntūla na nang'ha nsese wakwe ngosha nūūlū nkīma, hūna ū nsese ng'wenūyo ūcha kūlwa būtūlwa wenūbo, ū ntūji shing'wigeleelilwe apandīke nsango.

²¹ Alīyo ūlū lūbīta lūshikū lūmò nūūlū ibīlī hūna ū nsese ng'wenūyo ūbūūka, ū ise būgonzo atinhwa nsango; nguno ū nsese ng'wenūyo yene sabo yakwe.

²² Hama ūlū bagosha babīlī balīīlwa hūna būntūlanīja nkīma alī nda, būng'wenheleja kūfundafunda, alīyo gūleka kūbiza ho makoye gangī madito, ū ng'hūbi akūlīpa shose shose īsho alalombe ū ngoshi wa nkīma ūlū shūzunīlījiwa ng'wibanza.

²³ Alīyo ūlū gūng'wilongela makoye ū nkīma ng'wenūyo, a henaho īkūbiza būpanga kūlwa būpanga;

²⁴ liso kūlwa liso, lino kūlwa lino, nkono kūlwa nkono, kūgūlū kūlwa kūgūlū,

²⁵ kūpya moto kūlwa kūpya moto, lūguma kūlwa lūguma, kūchūbūlwa kūlwa kūchūbūla.

²⁶ Ūlū munhū ūntūla mu liso nsese wakwe ngosha nūūlū nkīma, wīta songo, īkūng'wigeleelwa aneke ū nsese ng'wenūyo aje kūlwa nguno ya liso lyakwe, ndūhū sha kūlīpa,

²⁷ nūūlū ūntūla nsese wakwe lino lyakwe lyūhomoka, akūneka aje ū nsese ng'wenūyo kūlwa nguno ya lino lyakwe, ndūhū sha kūlīpa.”

Mitugo kwenheleja būkenaagūji

²⁸ “Ūlū nzagamba yūmpama munhū ngosha nūūlū nkīma yūmūlaga, shiigelile īpondwe mawe īche; nī nyama yayo īpemve mu moto; yaya ū kūliwa. Alīyo ū ng'wenekīlī atūbonelwa mhayo.

²⁹ Gwike ūlū yamanīīla kūpama banhū, nū ng'weneyo akawīlagwa alīyo atadīlīlaga kwītunga, hūna yūmpama munhū ngosha nūūlū nkīma yūmūlaga; ī nzagamba yenīyo shiigelile īpondwe mawe īche, nū ng'weneyo abūlagwe.

³⁰ Gwike ūlū gūhelwa gwa kūlīpa shikolo, hūna ūdūla ū kūlīpa īsho alahelelwe, adūgije ū kwikomoola ū būpanga wakwe.

³¹ Ū mpang'wa wa ng'ombe ng'wenūyo nūūlū akabiza nyanda nūūlū ng'wanikī, ī shilagīlo shenīshi shikūtūmama.

³² Ī nzagamba yenīyo ūlū yūpama nsese ngosha nūūlū nkīma, ū ng'weneyo akūlīpa shekeli makūmi adatū ū kūlī ng'wenekīlī nsese, nī nzagamba īpondwe mawe.

³³ Ūlū munhū ūkundūlīla ichongo nūūlū ūsīmba ichongo hūna ūlemeelwa ū kūlīfukīīla, hama nzobe nūūlū ng'ombe yūgwīla mo;

³⁴ Ū nsīmbi w'ichongo lyenīlo akūshilīpa īsho shilajimīīle, akūnīpa ū ng'wenekīlī ntugo, ūyo gwachaaga gūbiza gwakwe.

³⁵ Ūlū nzagamba ya munhū nebe yūlabūla nzagamba ya munhū ūngī yūcha, bakwījinja ī mhanga bajigabanhe būlenganīja ī hela nī ng'ombe īyo yachaaga.

³⁶ Gwike ī nzagamba yenīyo ūlū īmanīkile na kale gīkī īkakundaga, alīyo ū ng'wenekīlī atītungaga, ū ng'wenekīlī ng'wenūyo īkūng'wigeleelwa alīpe ntugo kūlwa ntugo, ūyo gūchile gūbiza gwakwe.