Kūfuma 20 - Bibilia Ilagano Lya Kale 2015

Malange ikūmi ga shilagīlo

¹ Ū Mulungu ūyomba ī mihayo ī yose īyī; ūhaya gīkī,

² Ū nene nalī SEEBA Mulungu wako, hū nene nakakwenha kūfuma Misili, nūkwīnja mu sī ya būsese.

³ Yaya kūbiza na bamulungu bangī, alīyo nene wike.

⁴ Yaya kwibeegeja shiikolile shose shose, nūūlū shibize shiikolile na shikolo shose shose mu īsho shilī ng'wigūlū kwigūlya, nūūlū īsho shilī mu sī ha sī, nūūlū mu minzī mu gatī ya sī.

⁵ Yaya kūshiinamīla, nūūlū kūshitugīja mazwi, nguno ū nene SEEBA Mulungu wako nalī Mulungu wa wilu; nakabagwisījaga nsango baana kūlwa būbi wa babyaji babo abo banikolilwe, kūshisha shibyalīlwe sha kadatū na sha kanè.

⁶ Alīyo nakoolekejaga būtogwa būtaale no kū banhū mashihūmbī na mashihūmbī, abo banitogilwe na bashidimile ī shilagīlo shane.

⁷ Yaya kūlītūmamīla mu būtūdīlīla ī lina lya ng'wa SEEBA Mulungu wako; nguno ū SEEBA atūng'wisaaba kūbiza ntūngīlīja ūyo akūlītūmamīlaga ī lina lyakwe mu būtūdīlīla.

⁸ Lwizūkagwe ū lūshikū lwa sabato, ūlūlang'hane lwikale lwela.

⁹ Tūmamaga ng'wikanza lya shikū itandatū, ūmalamaje pyī ī milīmo yako.

¹⁰ Alīyo ū lūshikū lwa mpungatī lwene sabato ya ng'wa SEEBA, Mulungu wako. Ū mu lūshikū lwenūlo yaya kūtūmama nīmo gose gose: Ū bebe ng'wenekīlī, nūūlū ng'witūnja wako, nūūlū nshīke wako, pyī nū ntūmami wako ngosha nūūlū mkīma, nūūlū mitugo jako, nūūlū ngeni wako wakūgenihaga.

¹¹ Nguno ū SEEBA akabeeja ī ligūlū nī sī, nī shose īsho shilīmo, ūmala mu shikū itandatū; alīyo ū mu lūshikū lwa mpungatī wifuula. Hūna lūūlū ū SEEBA ūlūfuuha ū lūshikū lwa sabato, ūlweja.

¹² Bakūjage so na noko, ūlame shikū ningī ū mu sī īyo alīkwinha ū SEEBA Mulungu wako.

¹³ Yaya kūbūlaga munhū.

¹⁴ Yaya kūshihya.

¹⁵ Yaya kwiba.

¹⁶ Yaya kūfunya būkaanīji wa būlomolomo kūlwa nzenganwa ng'wiyo.

¹⁷ Yaya kwikūmva numba ya nzenganwa ng'wiyo. Yaya kūng'wikūmva nke wa nzenganwa ng'wiyo; nūūlū ntūmami wakwe ngosha nūūlū nkīma, nūūlū nzobe yakwe yaya; yaya nūūlū shikolo shingī shose shose sha nzenganwa ng'wiyo.

¹⁸ A banhū aho bajibona ī ndabi bīyiigwa nī mihilimo, nī lilaka ly'ipembe ī litaale, nū lūgūlū būlūbona lūlīzuuka lyochi, bakogoha no; bīmīīla kūle bakūdetemaga dūhū.

¹⁹ Būng'wīla ū Musa, “Tūwīlage bebe dūhū ī mihayo tūlīkwigwa, ū Mulungu n'alekage ū kūtūyombya, tūkūcha.”

²⁰ Ū Musa ūbawīla a banhū, “Lekagi ū kogoha, ū Mulungu wizaga kūmugema, gīkī mubize na logohano ū kūlī we, mutizūgwa mu mihayo yabūbi.”

²¹ A banhū baalī bīmīīla kūle, alīyo ū Musa wegeela ū kū giiti, ūko walī ū Mulungu.

Ya shiikolile na ya myaalīlo

²² Hūna ū SEEBA ūng'wīla ū Musa, “Bawīlage a Baisilaeli gīkī, ‘Bing'we benekīlī ng'wabonile gīkī naayombile ning'we kūfuma ng'wigūlū.

²³ Na lūūlū yaya kwibeegeja bamulungu bose bose gīkī bihele na nene, yaya kwibeegeja bamulungu ba feza, nūūlū bamulungu ba zahabu.

²⁴ Ū ng'walīlò ūyo ūkūgūbeeja kūlwa nguno yane gūkūbiza gwa malongo, h'aho ūkūyūfunīja ī shitambò shako, nī shakwinha sha kūpemva mu moto, nī shakwinha sha būsangī; pyī nī ng'holo nī mbūli, nī ng'ombe jako. A h'ipandī īlo nakūkūzunīlīja gīkī ī lina lyane līkūjiwe henaho, nakwiza ho nakūfuuhe.

²⁵ Ūlū ūnizengela ng'walīlò gwa mawe, yaya ū kūgūbeeja gwa mawe ga kūbelagūlwa, nguno ūlū ūtūmamīla ho shikolo shako sha būzengi ūkūgūsosohaja.

²⁶ Nīyo yaya ū kūja a h'igūlūlya ya ng'walīlò gwane ūkūlinhaga ha malinhīlo; dūūhū yako ītiziyoolecha a higūlya yago.’”