Kūfuma 2 - Bibilia Ilagano Lya Kale 2015

Kūbyalwa kwa ng'wa Musa

¹ Ū mu shikū jenījo walīho ngosha ūmò wa lūganda lwa Lawī, walī antoolile nkīma, nang'hwe wa lūganda lwa Lawī.

² Ū nkīma ng'wenūyo akabūūcha nda ūbyala ng'wana ngosha; ūmona ū ng'wana ng'wenūyo gīkī nsoga no, na lūūlū ūmisa, kūshisha ikanza lya myeji idatū.

³ Alīyo aho wabona gīkī atūdūla ū kwikala amisile, ūnsolela shiseme, shibeejiwe kūfuma mu malūtende; ūshibila laami īsangije maguta ga ndīlo. Hūna ūnaalīkīja mo, ūūkamisa mu madete kū ng'hilimva ya mongo.

⁴ Ilūmbūye wa ng'wana ng'wenūyo ūja koi, wīmīīlila ka kūle amanūlola īyo īlang'wilongele.

⁵ Kwimanīla nshīke o ng'wa Falao waja kooga ū kū mongo gwenūyo; aho akūshimīzaga ū kū mbalama ya mongo na banikī bagunanhi bakwe, ūshibona ī shiseme shenīsho ū mu madete, ūntūma ūmò wabo a bagunanhi bakwe; ūūkashenha.

⁶ Aho washikundūla ūmona ū ng'wana alīīlīla; ūnsaatwa. Ūhaya, “Ū ng'wana ng'wenūyū atūleka kūbiza ūmò wa baana ba bakīma ba Shihebulania!”

⁷ Hūna ū ilūmbūye wa ng'wana ūng'wīla ū nshīke o ng'wa Falao, “Naje nakakwitanīle nkīma Ng'hebulania wa kūkūlelela ū ng'wana wako?”

⁸ Ū nshīke o ng'wa Falao ūhaya, “Jaga.” Ū ng'wanikī ūja ūūkang'witana ū nina wa ng'wana.

⁹ Wahayūshika, ū nshīke o ng'wa Falao ūng'wīla, “Ūyū ng'wana nsolage ūnong'heje, nakūkwinha nshahala.” Ng'hana ū nkīma ng'wenūyo ūnsola ū ng'wana ūūkang'onhya.

¹⁰ Aho wakūla ūntwala ū kūlī nshīke o ng'wa Falao, ūbiza ng'witūnja wakwe; ūng'winha lina lya Musa; nguno akahaya, “Nakanzubūla kūfuma mu minzī.”

Musa kūpeelela Midiani

¹¹ Ū Musa aho wakūla, lūshikū lūmò ūfuma ūja ūko baalī a banhū bang'wawe, kūbalola ūmo yabaluhījaga ī milīmo yabo. Ūmona muna Misili alīntūla Ng'hebulania, ūmò wa banhū bang'wawe.

¹² Wilalangīja kūūnū na kūūnū, aho wabona atīho munhū ūngī, ūmūlaga ū muna Misili ng'wenūyo, ūkula hasī ūmfukīīla mu maseni.

¹³ Ha ntondo yaho ūja hangī, lelo ūūkababona Bahebulania bakūlwaaga boi bike. Ūyo wang'wiboneelaga ū ng'wiye ūng'wīla, “Bebe ngosha, nibūlī ūlīntūla gīko ū Ng'hebulania ng'wiyo?”

¹⁴ Ū munhū ng'wenūyo ūng'wīla, “Ū bebe ī gete nani wakūtūūlile būtaale, nose ūbize wa kūyūtūlamula? Ūlīhaya ūkūnibūlaga nū nene gīt'ūmo ūkamūlagīla muna Misili?” A henaho ū Musa wibakīla; wiwīla, “Gashi gwamanīkile ū mhayo ūyo nagwītile!”

¹⁵ Ū Falao aho wadeeba ūbona amūlage ū Musa, alīyo ū Musa ūng'witoloka ū Falao, ūpeelela Midiani. Aho washika ko wigasha hihī na lwinzī.

¹⁶ Ū mu Midiani ng'wenūmo walīmo ngabīji walī na bashīke mpungatī; kwimanīla biza a ha lwinzī, bandya kūdaha minzī kūdītīīla mu mabbīnhī gīkī bang'wishe ng'holo ja ng'wa saabo.

¹⁷ Alīyo baalīho badīīmi balebe, būbiboneela būhaya kūbapeeja ho; hūna ū Musa wīmīīla ūbagunīja a banikī benabo, nī ng'holo jabo ūbang'wisīja.

¹⁸ A banikī bebano aho baja ī kaya ū kūlī saabo ū Leūli, wahayūbabona ūbabūūja, “Ni kinehe lelo ng'wangūha gīkī ū kūshoka?”

¹⁹ Nabo būng'wīla, “Muna Misili nebe watūgunanha ū kūbadīīmi abo bakatūkoyaga, nī ng'holo jise ūjidahīla a minzī ūgookaja a mabbīnhī jūng'wa.”

²⁰ Ū namhala ūbabūūja a bashīke bakwe, “Hama ū wei alī halī? Nibūlī ng'waneka? Ng'witanagi ize aha alye na shilīwa!”

²¹ Ū Musa ūzunya ū kūja ho, ūūkalenda na haho; nīyo ū munhū ng'wenūyo ūntooja ū Musa halī nshīke wakwe Sipola.

²² Ū Sipola ūbyala ng'wana ngosha; ū Musa ūng'wilīka ī lina Gelishomu, nguno akahaya, “Nalī nobeji mu sī ya bangī.”

²³ Hanuma ya shikū ningī ū ntemi wa Misili ūcha, a Baisilaeli nabo bongeja ū kūgang'hīla kūlwa būsese wabo, būyūlīla bakūkoobaga būgunanhwa. Ī ng'hūngū īyo balīlaga kūlwa būdito wa būsese wabo yūmpandīka ū Mulungu.

²⁴ Ū Mulungu ūkwigwa ū kūlīla kwabo, ūlizūkwa ī lilagane lyakwe īlo walī walagana na Abulahamu, na Isaka, hamò na Yakobo.

²⁵ Ū Mulungu ūbalola a Baisilaeli, ūgabona a makoye gabo.