Kūfuma 15 - Bibilia Ilagano Lya Kale 2015

Lyīmbo lya ng'wa Musa

¹ Hūna ū Musa na a Baisilaeli būng'wīmbīla ū SEEBA lyīmbo īlī: Nakūng'wīmbīla ū SEEBA, nguno alī nkūjiwa ntaale. Falasa wajishikīgije shiki mu nyanza, na a badamhīji bajo shiki shiki.

² Ū SEEBA alī nguzu jane na lyīmbo lyane, hū ng'wene wabizile būpīji wane. Alī Mulungu wane, na nakūnkumīlīja we gwa, alī Mulungu o ng'wa baba, nane nakūngūngūhya.

³ Ū SEEBA Mpyeni mu būlūgū, Ī lina lyakwe lyene SEEBA.

⁴ A magogoteni ga ng'wa Falao nī libità lyakwe, wagashikīgije mu nyanza. Bagosha ba mbagashūūla ba ng'wa Falao baamililwe būjiba wa Nyanza Yaza.

⁵ Minzī mashimu gaabanwegije, būnwela nwe mu būjiba gīt'iwe.

⁶ Ū nkono gwako gwa būlyo SEEBA, gūlī na būdūla w'ikūjo itaale no, ū nkono gwako gwa būlyo SEEBA, hū gwene gwantobagūlile tobo tobo ū ng'wanishi.

⁷ Abo baalūgaagaanaga kūkūchaama, wabagwishije kūlwa būtaale w'ikūjo lyako. Ūkabūzunīlīja ū būpelanu wako būbababagūla gītī mapalala.

⁸ Ūkafuupa myūyī na mūūlū gako, bana minzī bikīga makīgo makīgo. A minzī ayo gatalembeelaga gīmīīla gītī ndugu; minzī gibūmba mu nda ya nyanza, lyūbiza iwe.

⁹ Ū ng'wanishi akigīmba akūhayaga; Nabakūūbīje, nakūbapandīka dūhū. Nakūgabanhya nding'wa, nakūgwasha magudyenge namale malusu. Nakūlīsopoola ī līlūshū lyane, nabakenaagūle na nkono gwane.

¹⁰ Alīyo ūkafuula na myūyī yako yūbakundīkīja ī nyanza; būlibīla mu minzī gatī ga kwihebelwa, libilibi gītī chūma shidito.

¹¹ Ee SEEBA, ū mu bamulungu nani ūyo a bange gītī bebe? Nani ūyo alī ng'wela na nkūjiwa? Nani ū wa lyogohya kūlw'ikūjo na meeja wa mihayo ya kūkaamaaja?

¹² Aho wagūgoloola ū nkono gwako gwa būlyo yūbamila ī sī!

¹³ A banhū bako abo wabakomoolile, wabatongeelile kūlwa shigongo shako shitaale. Ūkūbashisha ū kū wikalo wako wela, kūlwa būdūla wako.

¹⁴ A mahanga gakwigwa gadeteme, ba sī ya Filisiti bakūminyiwa boobà.

¹⁵ A batemi ba Edomu bakūbbaha, a batongeeji ba Moabu bakūding'wa idetemya. A banhū ba Kanaani pye bakwaaba basalang'hane.

¹⁶ Bakūgwīlwa boobà n'idedebaja. Kūlwa būdūla wa nkono gwako, bakūdedebala bahuumūlīje sele gīt'iwe, kūshisha babīte a banhū bako SEEBA; kūshisha babīte a banhū bako abo wabakomoolile.

¹⁷ Ee SEEBA, ūkūbenha mo, Ūkūbahamba ū mu lūgūlū lwa wingīji wako; ipandī īlo wibeegeja kūlwa wikalo wako, Ee SEEBA, ipandī lyeela īlo makono gako galībeeja.

¹⁸ Ū SEEBA ng'wene Ntemi wa welelo bose!

¹⁹ Ī falasa ja ng'wa Falao na a magogoteni, hamò na a badamhīji bajo bakakūūbīja būkingīla nū mu nyanza, ū SEEBA ūgashosha a minzī ga nyanza gūbakundīkīja; alīyo a Baisilaeli būbīta balīshimīza ha sī nyūmu.

²⁰ Miliamu ū ng'hangi nkīma, ū ilūmbūye o ng'wa Alooni, ūsola kang'oma mu nkono; na a bakīma a bangī būsola tūng'oma. A bose bandya kūbina,

²¹ kūnū ū Miliamu akūbīmbīlaga ūhaya: Ng'wīmbīlagi ū SEEBA, nguno alī nkūjiwa ntaale. Falasa wajishikīgije shiki mu nyanza, na a badamhīji bajo shiki shiki.

Minzī ga Maala na Elimu

²² Hūna ū Musa ūbīnja a banhū a ha Nyanza Yaza, ūbatongeela kūja kwitogolo lya Shuli. Būmala shikū idatū bakūshimīzaga, ndūhū nūūlū kūpandīka minzī.

²³ Būshika ipandī litanagwa Maala, gaalīho minzī; alīyo būlemeelwa ū kūgang'wa nguno gaalī malūlū. (H'ī nguno yene ī lipandī lyenīlo līkitanwa Maala).

²⁴ Na lūūlū a banhū būndugumīla ū Musa balīhaya, “Ī gīsī lūūlū, tūng'we kī?”

²⁵ Ū Musa ūnīlīīla ū SEEBA, nang'hwe ū SEEBA ūng'olekeja itambī lya līntī; ūlīsola ūlīponeja ū mu minzī; a minzī gūnona. A henaho ū SEEBA ūbinha mihayo ya kūbatongeela, na shilagīlo; nīyo aho bataalī henaho ūbagema.

²⁶ Ūhaya, “Ūlū ng'ūliigwa mu logohano ī lilaka lya ng'wa SEEBA Mulungu wing'we, na ng'wīta īyo ītūngīlīgije kū būtongi bokwe; hūna ng'ūgadīlīla na a malange gakwe, na a kahelele kakwe pye a kose ng'ūkadima chiza, natūng'wenhela a mabūsaatu gīt'ayo nalūbenhelaga Bamisili; nguno ū nene nalī SEEBA, hū nene nalī mpīja wing'we.”

²⁷ Hanuma ya henaho būja Elimu; ū kwene jalīho nzwinzī ikūmi n'ibīlī; na mitī makūmi mpungatī ya nhende, būtūūla ng'hambī bbihī nago a minzī genayo.