Kūfuma 12 - Bibilia Ilagano Lya Kale 2015

Kūlagīlwa Pasaka ya kwandya

¹ Ū SEEBA ūlūngalūnga na a ba Musa nū Alooni ū mu Misili; ūbawīla gīkī,

² “Ū ng'weji gwenūyū gūkūbiza gwa kwandya ū kū bing'we, gwa wandījo bo ng'waka gwing'we.

³ Bawīlagi pye a Baisilaeli gīkī ū mu lūshikū lw'ikūmi ū ng'weji gwenūyū, būlī namugī shiigelila asole ng'wana wa ng'holo kūlwa nguno ya kaya yakwe; būlī kaya ībize na ng'wana wa ng'holo ūmò.

⁴ Ī kaya ī ndo ūlū yūbiza ītadūgije kūmala ng'wana wa ng'holo ngima, īkwigeleelwa kūlya shilyani na bazenganwa bichabo. Shiigelile būmanīke ūbūkūmi bo banhū abo balīho, hūna ū ng'wana wa ng'holo asolwe kūlenganīla na būdūla wa kalīīle ka būlī ūmò wabo.

⁵ Ū ntugo ūyo mulagūsolaanhye, gūsolagi kūfuma mu ng'holo nūūlū mbūli; ībize ng'hosha ya ng'waka gūmò, nīyo ītī na būlemehazu bose bose.

⁶ Mukwīlang'hana kūshisha lūshikū lw'ikūmi n'inè ū mu ng'weji, lūshikū ūlo pye a Baisilaeli bakūjisīnza ī mitugo jenījo makanza ga mhīndī ya kaamunhū ūyo.

⁷ Hūna bakūsola mininga gamò babile a ha nyango gwa numba īyo bakūbiza mo ī likanza lya kūlya, bakūgūbila a higūlya nū mu kabazu.

⁸ Ū būjikū wenūbo, bakwīlya ī nyama yookije mu moto, hamò na ngatī gūtī na shibimbya, na makūbī malūlū

⁹ Yaya ū kwīlya ī nyama ītaalī mbīsī, nūūlū īzugilwe; alīyo yoochiwe pye gete, ntwe, magūlū, nī sha munda.

¹⁰ Mutizūlekeela gīkī mulaalye shipolo ha ntondo yaho, ūlū yūsaaga kūshisha ha ntondo, īpembagi mu moto ījige.

¹¹ Ī mbika ya kīīlīīle īlī gīkī, Mukūbiza mushitungile migwasho ī shizwalo shing'we, nū kū mhambala jing'we muzwalile shilatū; nī milang'ha ying'we ng'wībūūkije mu makono ging'we. Mukwīlya bo kalakala; ī yenīyo Pasaka ya ng'wa SEEBA.

¹² Ū būjikū wenūbo nakūbīta pye a hose ū mu sī ya Misili, nabayagaje pye a babyalwa ba kwandya; a ba banhū, na a ba mitugo. Nakūbinha nsango pye a bamulungu ba mu sī ya Misili, ū nene nalī SEEBA.

¹³ A mininga gakūbiza lūmeng'ho lwing'we a ha numba īyo mukūbiza mo. Ūlū nūgabona a mininga nakūmubītīīla. Ī shitūlo īsho nakūbatūlīla a Bamisili shitūmukuumya a bing'we.”

Kūyizūkwa Pasaka

¹⁴ “Ū lūshikū lwenūlū lwizūkagwi gwa ū mu shibyalīlwe shing'we pyī ī shose īsho shiliza, mukūlwisaaba kūbiza lwa kūnyegela SEEBA, ī shenīshi shilī shilagīlo sha būja na būja.”

¹⁵ Mukūyūlya ngatī gūtī na shibimbya ikanza lya shikū mpungtī. Ū mu lūshikū lwa kwandya mukwīnja pyī ī shibimbya ū mu kaya jing'we; nguno ū kwīngīīla lūshikū lwa kwandya lwenūlo kūshisha lwa mpungatī, būlī ng'wene ūyo ūlya shose shose īsho shilī na shibimbya, akūkomanyiwa aponyiwe īnge ū mu Baisilaeli.

¹⁶ Ū lūshikū lwa kwandya lūkūbiza lwa kwibilinga kwela, nū lūshikū lwa mpungatī. Ū mu shikū jenīji yaya ū kūtūmama nīmo nūūlū hado, ūlū ītī kūbeeja shilīwa sha kūlya banhū dūhū, ū gwenūyo hū gūdūgije ū kwītwa.

¹⁷ Shidīlīlagi gete ī shigukulu sha ngatī gūtī na shibimbya; nguno ū mu lūshikū lwenūlo nalīgīnja a mabità ging'we ū mu sī ya Misili. Na lūūlū lizūkagwi ī likanza lyenīlo welelo bose ū mu shibyalīlwe shing'we īsho shiliiza.

¹⁸ Ū mu ng'weji gwa kwandya kwandīja mhīndī ya lūshikū lw'ikūmi n'inè kūshisha mhīndī ya lūshikū lwa makūmi abīlī na lūmò, mukūlya ngatī gūbeejiwe na būsu būtasangije shibimbya.

¹⁹ Līkūbīta ikanza lya shikū mpungatī shitigelaga shibimbya nūūlū hado ū mu kaya jing'we. Būlī ng'wene ūyo ūlya shose shose īsho shilī na shibimbya, abize nobeji, nūūlū ūmò wa babyaalwa; akwīnjiwa ū ng'wisangī lya Baisilaeli.

²⁰ Hose hose ūko mulī, mutizūlya shilīwa shisangije shibimbya, lyagi migatī ītī na shibimbya.

Kūsīnzwa kwa Pasaka

²¹ Ū Musa ūbitana pye a banamhala ba Baisilaeli ūbawīla, “Jagi wangū ū kū kaya jing'we, būlī ng'wene akasolanhye ng'wana wa ng'holo wa kūlyiwa; mulasīnze kūlwa Pasaka.

²² Hūna musole madūūtū ga hisopo muyūgadabbya mu mininga galī ng'wibakuli, ng'wībila ī milyango; a higūlya nū mu kabazu. Atizigela nūūlū ūmò wing'we wa kūja hanze ya numba yakwe kūshisha dilū.

²³ Ū SEEBA akūbīta pye a hose ū mu sī ya Misili, aje akūbatūlaga a babyalwa ba kwandya, ūlū ūgabona a mininga a higūlya ya nyango nū mu kabazu, akūgūbītīīla ū nyango gwenūyo; atūnzunīlīja ū nyagaja ingīle ū mu kaya jing'we kūmukenaagūla.

²⁴ Gūdimagi ū mhayo gwenūyū, nguno shilī shilagīlo shing'we sha welelo na welelo ū mu shibyalīlwe shing'we shose.

²⁵ Ūlū ng'wingīla ū mu sī īyo wang'wisagīja kūng'winha ū SEEBA, yaya ū kūleka kūgwīta ū mhayo gwenūyū.

²⁶ A baana bing'we ūlū būmubūūja, ‘Ū mhayo gwenūyū gūlī na makūlū kī?’

²⁷ Bawīlagi gīkī, ‘Shilī shitambò sha Pasaka ya ng'wa SEEBA; nguno aho tūlī mu Misili wajibītīīlaga ī numba ja Baisilaeli ū ng'wikanza lya kūbatūla a Bamisili, alīyo a bise ūtūchīla shigongo ūjileka ī kaya jise.’” Hūna a banhū binamya ī mitwe yabo būlamya.

²⁸ Na ng'hana a Baisilaeli bakīīta gīt'ūmo ba Musa na Alooni bakabalagīīlīla.

Kūyagajiwa babyalwa ba kwandya

²⁹ Ū būjikū ha gatī ū SEEBA ūbatūla pye a babyalwa ba kwandya ū mu Misili, kwandīja ū tangī o ng'wa Falao, ūyo olī igeleelilwe kwigasha h'isumbī lya būtemi, kūshisha ng'witūnja ū tangī wa ntungwa ūyo walī atungilwe mu jeela; pyī nī mbyalwa ja kwandya ja mitugo.

³⁰ Ū Falao na a batūmami bakwe na a Bamisili a bose, būbūūka ī būjikū yenīyo balīīlīla; yalī ng'hūngū nhaale no ū mu Misili, nguno yalī ītīho kaya nūūlū īmò aho atachile munhū.

Kwīnga mu Misili

³¹ Aho ītaalī būjikū gīko, ū Falao ūbitana a ba Musa nū Alooni, ūbapeeja alīhaya, “Bing'we būkagi na a Baisilaeli, mubīngīle a banhū bane, jagi mukanamye ū SEEBA gīt'ūmo mukwikalaga ng'ūhayīla.

³² Gasolagi na a madaale ging'we ga ng'holo nī ng'ombe, ūmo mutogelilwe.”

³³ A Bamisili būbakangīlīja a banhū bīnge wangū ū mu sī yenīyo. Būhaya, “Ūlū ītī chene numho tūkūshila kūcha pye!”

³⁴ Na lūūlū a banhū būjisola ī mbilya jabo ja migatī, būsangwa bataalī ū kūguulanya mo ī shibimbya; būjibūūcha mu shiseme, būjilingīīla mu myenda, būja najo bajiseselile kū mabega.

³⁵ A Baisilaeli bakīīta gīt'ūmo Musa walī wabalagīīlīla, būbalomba a Bamisili shikolo sha feza na sha zahabu, na shizwalo.

³⁶ Ū SEEBA walī wabīīta a Bamisili bazunye ū kūbinha a banhū shikolo shose shose īsho būbalomba; na lūūlū būbiza babasonza a Bamisili ī shikolo shabo.

³⁷ A Baisilaeli bandya lūgendo; būshimīza kūfuma Lamesesi kūja Sukoti, baalī banhū gītī shihūmbī magana atandatū, a bagosha dūhū abo bashimīzaga; kūleka kūbabala a ba kīma na a baana.

³⁸ Na banhū bangī bingī dūhū bakaja hamò nabo; baaja na madaale mataale ga mitugo, ng'holo na ng'ombe.

³⁹ Ī mbilya ja migatī ījo baalī baabūūcha kūfuma Misili būbeeja migatī ītī na shibimbya, nguno bakapeejiwa wangū wangū ū mu Misili, būsangwa bataalī nūūlū kūbeeja shilīwa sha mu nzīla.

⁴⁰ Ī likanza īlo bakikala ū mu Misili a Baisilaeli lyalī myaka magana anè na makūmi adatū.

⁴¹ Aho yakalīka ī myaka magana anè na makūmi adatū yenīyo, nū lūshikū lwenūlo lūshika, a mabità ga ng'wa SEEBA gakīnga ī Misili.

⁴² Ū būjikū bo lūshikū lwenūlo ū SEEBA walī abūdīlīlile no, nguno waalī wa kūbīnja mu sī ya Misili a banhū bakwe. Na lūūlū a Baisilaeli ībigelile babūdīlīle no no no ū būjikū wenūbo; bankūje ū SEEBA ū mu shibyalīlwe shabo pyī īsho shiliza.

Migilo ya Pasaka

⁴³ Hūna ū SEEBA ūbawīla a ba Musa nū Alooni, “Ī mihayo īyī yigelile īdīlīlwe kūlwa nguno ya Pasaka, ū munhū nobeji atazunīlījiwe ū kwīlya.

⁴⁴ Alīyo ū nsese ūyo ng'wangūla na hela jing'we, ūlū ng'ūmala kūnsaala adūgije ū kwīlya.

⁴⁵ Lelo ū ng'wigashi wa kakanza dūhū, nūūlū ng'witūmamīja wa mheela, ū ng'wenūyo yaya ū kwīlya.

⁴⁶ Ī nyama yenīyo shiigelile īlīīlwe mu numba īmò; yaya ū kwīfunya ū mu numba īyo balīlīīla. Hama yaya ū kūgabīnzagūla a maguha gayo.

⁴⁷ Pye a Baisilaeli shibigeleelilwe kwīlya.

⁴⁸ Ū nobeji ūyo akwikalaga mu bing'we, ūlū ūtogwa kwīlya ī Pasaka ya ng'wa SEEBA, shiigelile basaalwe pye a bagosha ba mu kaya yakwe; hūna akūdūla ū kwīlya gītī ūmò wa babyalīlwa ba mu sī yenīyo. Atīho ngosha nūūlū ūmò wa kwīlya ūlū atasaalilwe.

⁴⁹ Ī shilagīlo shenīshi shilī kūlwa banhū bose, a babyalīlwa baamo ū mu sī, na a balobeji abo balikale hamò ning'we.”

⁵⁰ A Baisilaeli a bose bīīta gīt'ūmo baalī balagīlwa na Musa hamò na Alooni.

⁵¹ Ū mu lūshikū lwenūlo ū SEEBA ūbafunya a Baisilaeli ū mu sī ya Misili, balī mabità na mabità.