Kūfuma 11 - Bibilia Ilagano Lya Kale 2015

Shitūlo sha babyalwa ba kwandya

¹ Ū SEEBA akasangwa wang'wīla ū Musa, “Ī haha shasaagaga shitūlo shimò, īsho nakūshenha ū kūlī Falao nī Misili. Hanuma ya henaho akūmulekela muje ng'wīnge ū ng'wenūmu; nīyo ūlū līlashike ī likanza, akūmupeeja.

² Bawīlage lūūlū a banhū pye, bagosha na bakīma, balabalombe a bazenganwa bichaabo shikolo sha feza na sha zahabu.”

³ (Ū SEEBA walī wabinha a banhū kwanukūlwa mu būlī mhayo ūyo balabalombe a Bamisili, hama nīyo ū mu sī ya Misili ū Musa walī munhū nkūjiwa no ū kū batūmami ba ng'wa Falao, na a banhū a bangī.)

⁴ Hūna lūūlū ū Musa ūhaya, “Ū SEEBA alīhaya gīkī, ‘Mu makanza gītī ga būjikū ha gatī nakūbīta pye a hose ū mu sī ya Misili.

⁵ Būlī myalwa wa kwandya ū ngosha ū mu Misili akūcha, kwandīja ng'witūnja ū tangī o ng'wa Falao, ū ng'wingīji h'isumbī lya būtemi, kūshisha ng'witūnja tangī wa nsese nkīma, ūyo akikalaga atugije mazwi h'iwe akūshaaga būsu; pyī nī mbyalwa ja kwandya ū mu mitugo.

⁶ Īkūbiza ho ng'hūngū nhaale no ū mu sī ya Misili, kūlīla ūko kūtaalī kwilonga na kamò yaya, na kūtalilonga hangī!

⁷ Alīyo ū mu Baisilaeli, ītūbiza ho nūūlū mva ya kūūmoka munhū nūūlū shikolo shose shose.’ Na lūūlū a henaho mukūdeeba gīkī, gashi ū SEEBA alī na būsolanhya a ha gatī ya Bamisili na a Baisilaeli.

⁸ Pye a batūmami bako benaba bakwiza kūnigwīla mu magūlū bakūnikūmbīlījaga balīhaya gīkī, ‘Jaga baba, ūbasole na a banhū bako.’ Na ng'hana a hanuma ya yenīyo nakūja.” Na lūūlū ū Musa wīnga ū kū būtongi bo ng'wa Falao, ūja ookalaga būpelanu.

⁹ Ū SEEBA ūng'wīla ū Musa, “Ū Falao atīko ū kūmudegeleka, kūshisha shikwīle ī shakūkumya īsho nalīīta ū mu sī ya Misili.”

¹⁰ A ba Musa nū Alooni bakīīta pyī ī ya kūkumya yenīyī ū kūlī Falao, alīyo ū SEEBA walī wīgang'hanaja ī ng'holò ya ng'wa Falao, h'ī nguno yene atabazunīlīgije a Baisilaeli ū kūfuma ū mu sī yakwe.