Kūbala 7 - Bibilia Ilagano Lya Kale 2015

Kweejiwa kwa ng'walīlo

¹ Ū Musa aho wamala ū kūlyīīmīlīja ī liheema, ūlīseeseebela maguta, kūlwa nguno ya kūlyeeja, pye nī shiseme shaalyo. Nū ng'walīlo akagūseeseebela maguta, ūgweeja, hamò nī shikolo sha kūtūmamīla hoi.

² Hūna a batongeeji ba Baisilseli, a basugi ba kaya jabo na bataale ba ng'anda; abo bakasolwa kūbiza higūlya ya babo bakabalwa, būfunya ī shakwinha shabo.

³ Ī shakwinha shabo īsho bakeenha ū kūlī SEEBA shaalī, magogoteni atandatū gagubbanīgije, na nzīkū ikūmi n'ibīlī; būlī ntongeeji ūfunya nzīkū īmò, na būlī batongeeji babīlī igogoteni līmò. Ī shakwinha shenīshi bakashenha ū kwipandī lya kwikala.

⁴ Ū SEEBA ūng'īla ū Musa gīkī,

⁵ “Shanukūlage īsho balīshenha shenīsho shikūtūmama milīmo ya ng'wiheema lya kwibilingīla. Binhage a Balawī, būlī ng'wene apandīke kūlenganīla nū nīmo ūyo ahelelilwe kūgwīta.”

⁶ Ng'hana ū Musa ūgasola a magogoteni nī nzīkū jenījo, ūbinha a Balawī.

⁷ A ba numba ya ng'wa Gelishomu akabinha magogoteni abīlī na nzīkū inè, kūlenganīla nū būdito wa nīmo gwabo.

⁸ A ba numba ya ng'wa Melaali ūbinha magogoteni anè na nzīkū inaane, kūlenganīla nū būdito wa nīmo gwabo. A benaba baalī ha sīlīlī ya būtongeejibo ng'wa Itamaali ng'witūnja wa ngabīji Alooni.

⁹ Alīyo a banhū ba numba ya ng'wa Kohati, ū Musa atabinhile shose shose, nguno īsho baalī baahelelwa kūshibūūcha shaalī sha kūbūūchiwa ha mabega.

¹⁰ Ū lūshikū lwa kwandya kūtūmamīlwa ū ng'walīlo, aho gwamala kūseeseebelwa maguta, a batongeeji bakenha shakwinha kūlwa kwejiwa kwago ū ng'walīlo, būshitūūla kū būtongi wago.

¹¹ Ū SEEBA akang'wīla ū Musa, “Būlī lūshikū ntongeeji ūmò akwenha ī shakwinha shakwe kūlwa kwejiwa kwa ng'walīlo.”

Naashoni ng'wana Aminadabu

¹² Ūyo akenha ī shakwinha shakwe a ha lūshikū lwa kwandya walī Naashoni ng'witūnja o ng'wa Aminadabu, wa lūganda lwa ng'wa Yuda.

¹³ Ī shakwinha shakwe shalī sahani īmò ya feza ya būdito wa shekeeli igana na makūmi adatū, ibbakuli līmò lya feza lya būdito wa shekeeli makūmi mpungatī. Ū mpango gwa shekeeli jenījo gwalī gūlenganīlile na mpango gwa shekeeli ya ng'wipandī lyeela. Ī shiseme ī shose shaalī shokalile būsu būnogu, būsangije maguta, kūlwa shakwinha sha būsu.

¹⁴ Akenha n'idishi līmò lya zahabu, būdito walyo shekeeli ikūmi, lyokagije būbbani;

¹⁵ nzagamba īmò songi, ng'ondi īmò, na ng'ondi yīngī ya ng'waka gūmò; ī jenījo akajenha kūbiza shitambò sha kūpemva.

¹⁶ Na ngulyati ya mbūli kūbiza shitambò sha būkenaagūji,

¹⁷ na nzīkū ibīlī, ng'ondi itanò, ngulyati itanò ja mbūli, na ng'ondi itanò ja ng'waka gūmò būlī yene, ī jose jenīji jalī ja kūfunyiwa kūbiza shitambò sha būsangī. Ī shenīshi shalī shakwinha sha ng'wa Naashoni ng'witūnja o ng'wa Aminadabu.

Netaneli ng'wana Zuali

¹⁸ A ha lūshikū lwa kabīlī Netaneli ng'witūnja o ng'wa Zuali, ū ntongeeji wa lūganda lwa ng'wa Isakaali, akafunya ī shakwinha.

¹⁹ Ī shakwinha shakwe shalī sahani īmò ya feza ya būdito wa shekeeli igana na makūmi adatū, ibbakuli līmò lya feza lya būdito wa shekeeli makūmi mpungatī. Ū mpango gwa shekeeli jenījo gwalī gūlenganīlile na mpango gwa shekeeli ya ng'wipandī lyeela. Ī shiseme ī shose shaalī shokalile būsu būnogu, būsangije maguta, kūlwa shakwinha sha būsu.

²⁰ Akenha n'idishi līmò lya zahabu, būdito walyo shekeeli ikūmi, lyokagije būbbani;

²¹ nzagamba īmò songi, ng'ondi īmò, na ng'ondi yīngī ya ng'waka gūmò; ī jenījo akajenha kūbiza shitambò sha kūpemva.

²² Na ngulyati ya mbūli kūbiza shitambò sha būkenaagūji,

²³ na nzīkū ibīlī, ng'ondi itanò, ngulyati itanò ja mbūli, na ng'ondi itanò ja ng'waka gūmò būlī yene, ī jose jenīji jalī ja kūfunyiwa kūbiza shitambò sha būsangī. Ī shenīshi shalī shakwinha sha ng'wa Netaneli ng'witūnja o ng'wa Zuali.

Eliabu ng'wana Heloni

²⁴ A ha lūshikū lwa kadatū Eliabu ng'witūnja o ng'wa Heloni, ū ntongeeji wa lūganda lwa ng'wa Zabuloni, akafunya ī shakwinha.

²⁵ Ī shakwinha shakwe shalī sahani īmò ya feza ya būdito wa shekeeli igana na makūmi adatū, ibbakuli līmò lya feza lya būdito wa shekeeli makūmi mpungatī. Ū mpango gwa shekeeli jenījo gwalī gūlenganīlile na mpango gwa shekeeli ya ng'wipandī lyeela. Ī shiseme ī shose shaalī shokalile būsu būnogu, būsangije maguta, kūlwa shakwinha sha būsu.

²⁶ Akenha n'idishi līmò lya zahabu, būdito walyo shekeeli ikūmi, lyokagije būbbani;

²⁷ nzagamba īmò songi, ng'ondi īmò, na ng'ondi yīngī ya ng'waka gūmò; ī jenījo akajenha kūbiza shitambò sha kūpemva.

²⁸ Na ngulyati ya mbūli kūbiza shitambò sha būkenaagūji,

²⁹ na nzīkū ibīlī, ng'ondi itanò, ngulyati itanò ja mbūli, na ng'ondi itanò ja ng'waka gūmò būlī yene, ī jose jenīji jalī ja kūfunyiwa kūbiza shitambò sha būsangī. Ī shenīshi shalī shakwinha sha ng'wa Eliabu ng'witūnja o ng'wa Heloni.

Elizuuli ng'wana Shedeuli

³⁰ A ha lūshikū lwa kanè Elizuuli ng'witūnja o ng'wa Shedeuli, ū ntongeeji wa lūganda lwa ng'wa Lubeni, akafunya ī shakwinha.

³¹ Ī shakwinha shakwe shalī sahani īmò ya feza ya būdito wa shekeeli igana na makūmi adatū, ibbakuli līmò lya feza lya būdito wa shekeeli makūmi mpungatī. Ū mpango gwa shekeeli jenījo gwalī gūlenganīlile na mpango gwa shekeeli ya ng'wipandī lyeela. Ī shiseme ī shose shaalī shokalile būsu būnogu, būsangije maguta, kūlwa shakwinha sha būsu.

³² Akenha n'idishi līmò lya zahabu, būdito walyo shekeeli ikūmi, lyokagije būbbani;

³³ nzagamba īmò songi, ng'ondi īmò, na ng'ondi yīngī ya ng'waka gūmò; ī jenījo akajenha kūbiza shitambò sha kūpemva.

³⁴ Na ngulyati ya mbūli kūbiza shitambò sha būkenaagūji,

³⁵ na nzīkū ibīlī, ng'ondi itanò, ngulyati itanò ja mbūli, na ng'ondi itanò ja ng'waka gūmò būlī yene, ī jose jenīji jalī ja kūfunyiwa kūbiza shitambò sha būsangī. Ī shenīshi shalī shakwinha sha ng'wa Elizuuli ng'witūnja o ng'wa Shedeuli.

Shelumieli ng'wana Zulishadai

³⁶ A ha lūshikū lwa katanò Shelumieli ng'witūnja o ng'wa Zulishadai, ū ntongeeji wa lūganda lwa ng'wa Simioni, akafunya ī shakwinha.

³⁷ Ī shakwinha shakwe shalī sahani īmò ya feza ya būdito wa shekeeli igana na makūmi adatū, ibbakuli līmò lya feza lya būdito wa shekeeli makūmi mpungatī. Ū mpango gwa shekeeli jenījo gwalī gūlenganīlile na mpango gwa shekeeli ya ng'wipandī lyeela. Ī shiseme ī shose shaalī shokalile būsu būnogu, būsangije maguta, kūlwa shakwinha sha būsu.

³⁸ Akenha n'idishi līmò lya zahabu, būdito walyo shekeeli ikūmi, lyokagije būbbani;

³⁹ nzagamba īmò songi, ng'ondi īmò, na ng'ondi yīngī ya ng'waka gūmò; ī jenījo akajenha kūbiza shitambò sha kūpemva.

⁴⁰ Na ngulyati ya mbūli kūbiza shitambò sha būkenaagūji,

⁴¹ na nzīkū ibīlī, ng'ondi itanò, ngulyati itanò ja mbūli, na ng'ondi itanò ja ng'waka gūmò būlī yene, ī jose jenīji jalī ja kūfunyiwa kūbiza shitambò sha būsangī. Ī shenīshi shalī shakwinha sha ng'wa Shelumieli ng'witūnja o ng'wa Zulishadai.

Eliasafu ng'wana Deūli

⁴² A ha lūshikū lwa katandatū Eliasafu ng'witūnja o ng'wa Deūli, ū ntongeeji wa lūganda lwa ng'wa Gadi, akafunya ī shakwinha.

⁴³ Ī shakwinha shakwe shalī sahani īmò ya feza ya būdito wa shekeeli igana na makūmi adatū, ibbakuli līmò lya feza lya būdito wa shekeeli makūmi mpungatī. Ū mpango gwa shekeeli jenījo gwalī gūlenganīlile na mpango gwa shekeeli ya ng'wipandī lyeela. Ī shiseme ī shose shaalī shokalile būsu būnogu, būsangije maguta, kūlwa shakwinha sha būsu.

⁴⁴ Akenha n'idishi līmò lya zahabu, būdito walyo shekeeli ikūmi, lyokagije būbbani;

⁴⁵ nzagamba īmò songi, ng'ondi īmò, na ng'ondi yīngī ya ng'waka gūmò; ī jenījo akajenha kūbalwa shitambò sha kūpemva.

⁴⁶ Na ngulyati ya mbūli kūbiza shitambò sha būkenaagūji,

⁴⁷ na nzīkū ibīlī, ng'ondi itanò, ngulyati itanò ja mbūli, na ng'ondi itanò ja ng'waka gūmò būlī yene, ī jose jenīji jalī ja kūfunyiwa kūbiza shitambò sha būsangī. Ī shenīshi shalī shakwinha sha ng'wa Eliasafu ng'witūnja o ng'wa Deūli.

Elishama ng'wana Amihudi

⁴⁸ A ha lūshikū lwa mpungatī Elishama ng'witūnja o ng'wa Amihudi, ū ntongeeji wa lūganda lwa ng'wa Efulaimu, akafunya ī shakwinha.

⁴⁹ Ī shakwinha shakwe shalī sahani īmò ya feza ya būdito wa shekeeli igana na makūmi adatū, ibbakuli līmò lya feza lya būdito wa shekeeli makūmi mpungatī. Ū mpango gwa shekeeli jenījo gwalī gūlenganīlile na mpango gwa shekeeli ya ng'wipandī lyeela. Ī shiseme ī shose shaalī shokalile būsu būnogu, būsangije maguta, kūlwa shakwinha sha būsu.

⁵⁰ Akenha n'idishi līmò lya zahabu, būdito walyo shekeeli ikūmi, lyokagije būbbani;

⁵¹ nzagamba īmò songi, ng'ondi īmò, na ng'ondi yīngī ya ng'waka gūmò; ī jenījo akajenha kūbiza shitambò sha kūpemva.

⁵² Na ngulyati ya mbūli kūbiza shitambò sha būkenaagūji,

⁵³ na nzīkū ibīlī, ng'ondi itanò, ngulyati itanò ja mbūli, na ng'ondi itanò ja ng'waka gūmò būlī yene, ī jose jenīji jalī ja kūfunyiwa kūbiza shitambò sha būsangī. Ī shenīshi shalī shakwinha sha ng'wa Elishama ng'witūnja o ng'wa Amihudi.

Gamalieli ng'wana Pedazuli

⁵⁴ A ha lūshikū lwa kanaane Gamalieli ng'witūnja o ng'wa Pedazuli, ū ntongeeji wa Lūganda lwa ng'wa yang'wa Manase, akafunya ī shakwinha.

⁵⁵ Ī shakwinha shakwe shalī sahani īmò ya feza ya būdito wa shekeeli igana na makūmi adatū, ibbakuli līmò lya feza lya būdito wa shekeeli makūmi mpungatī. Ū mpango gwa shekeeli jenījo gwalī gūlenganīlile na mpango gwa shekeeli ya ng'wipandī lyeela. Ī shiseme ī shose shaalī shokalile būsu būnogu, būsangije maguta, kūlwa shakwinha sha būsu.

⁵⁶ Akenha n'idishi līmò lya zahabu, būdito walyo shekeeli ikūmi, lyokagije būbbani;

⁵⁷ nzagamba īmò songi, ng'ondi īmò, na ng'ondi yīngī ya ng'waka gūmò; ī jenījo akajenha kūbiza shitambò sha kūpemva.

⁵⁸ Na ngulyati ya mbūli kūbiza shitambò sha būkenaagūji,

⁵⁹ na nzīkū ibīlī, ng'ondi itanò, ngulyati itanò ja mbūli, na ng'ondi itanò ja ng'waka gūmò būlī yene, ī jose jenīji jalī ja kūfunyiwa kūbiza shitambò sha būsangī. Ī shenīshi shalī shakwinha sha ng'wa Gamalieli ng'witūnja o ng'wa Pedazuli.

Abidani ng'wana Gidioni

⁶⁰ A ha lūshikū lwa kenda Abidani ng'witūnja o ng'wa Gidioni, ū ntongeeji wa lūganda lwa ng'wa Benjamini, akafunya ī shakwinha.

⁶¹ Ī shakwinha shakwe shalī sahani īmò ya feza ya būdito wa shekeeli igana na makūmi adatū, ibbakuli līmò lya feza lya būdito wa shekeeli makūmi mpungatī. Ū mpango gwa shekeeli jenījo gwalī gūlenganīlile na mpango gwa shekeeli ya ng'wipandī lyeela. Ī shiseme ī shose shaalī shokalile būsu būnogu, būsangije maguta, kūlwa shakwinha sha būsu.

⁶² Akenha n'idishi līmò lya zahabu būdito walyo shekeeli ikūmi, lyokagije būbbani;

⁶³ nzagamba īmò songi, ng'ondi īmò, na ng'ondi yīngī ya ng'waka gūmò; ī jenījo akajenha kūbiza shitambò sha kūpemva.

⁶⁴ Na ngulyati ya mbūli kūbiza shitambò sha būkenaagūji,

⁶⁵ na nzīkū ibīlī, ng'ondi itanò, ngulyati itanò ja mbūli, na ng'ondi itanò ja ng'waka gūmò būlī yene, ī jose jenīji jalī ja kūfunyiwa kūbiza shitambò sha būsangī. Ī shenīshi shalī shakwinha sha ng'wa Abidani ng'witūnja o ng'wa Gidioni.

Ahiezeeli ng'wana Amishadai

⁶⁶ A ha lūshikū lwa ikūmi Ahiezeeli ng'witūnja o ng'wa Amishadai, ū ntongeeji wa lūganda lwa ng'wa Simioni, akafunya ī shakwinha.

⁶⁷ Ī shakwinha shakwe shalī sahani īmò ya feza ya būdito wa shekeeli igana na makūmi adatū, ibbakuli līmò lya feza lya būdito wa shekeeli makūmi mpungatī. Ū mpango gwa shekeeli jenījo gwalī gūlenganīlile na mpango gwa shekeeli ya ng'wipandī lyeela. Ī shiseme ī shose shaalī shokalile būsu būnogu, būsangije maguta, kūlwa shakwinha sha būsu.

⁶⁸ Akenha n'idishi līmò lya zahabu, būdito walyo shekeeli ikūmi, lyokagije būbbani;

⁶⁹ nzagamba īmò songi, ng'ondi īmò, na ng'ondi yīngī ya ng'waka gūmò; ī jenījo akajenha kūbiza shitambò sha kūpemva.

⁷⁰ Na ngulyati ya mbūli kūbiza shitambò sha būkenaagūji,

⁷¹ na nzīkū ibīlī, ng'ondi itanò, ngulyati itanò ja mbūli, na ng'ondi itanò ja ng'waka gūmò būlī yene, ī jose jenīji jalī ja kūfunyiwa kūbiza shitambò sha būsangī. Ī shenīshi shalī shakwinha sha ng'wa Ahiezeeli ng'witūnja o ng'wa Amishadai.

Pagieli ng'wana Okilani

⁷² A ha lūshikū lwa ikūmi na lūmò Pagieli ng'witūnja o ng'wa Okilani, ū ntongeeji wa lūganda lwa ng'wa Asheli, akafunya ī shakwinha.

⁷³ Ī shakwinha shakwe shalī sahani īmò ya feza ya būdito wa shekeeli igana na makūmi adatū, ibbakuli līmò lya feza lya būdito wa shekeeli makūmi mpungatī. Ū mpango gwa shekeeli jenījo gwalī gūlenganīlile na mpango gwa shekeeli ya ng'wipandī lyeela. Ī shiseme ī shose shaalī shokalile būsu būnogu, būsangije maguta, kūlwa shakwinha sha būsu.

⁷⁴ Akenha n'idishi līmò lya zahabu, būdito walyo shekeeli ikūmi, lyokagije būbbani;

⁷⁵ nzagamba īmò songi, ng'ondi īmò, na ng'ondi yīngī ya ng'waka gūmò; ī jenījo akajenha kūbiza shitambò sha kūpemva.

⁷⁶ Na ngulyati ya mbūli kūbiza shitambò sha būkenaagūji,

⁷⁷ na nzīkū ibīlī, ng'ondi itanò, ngulyati itanò ja mbūli, na ng'ondi itanò ja ng'waka gūmò būlī yene, ī jose jenīji jalī ja kūfunyiwa kūbiza shitambò sha būsangī. Ī shenīshi shalī shakwinha sha ng'wa Pagieli ng'witūnja o ng'wa Okilani.

Ahila ng'wana Enani

⁷⁸ A ha lūshikū lw'ikūmi na ibīlī Ahila ng'witūnja o ng'wa Enani, ū ntongeeji wa lūganda lwa ng'wazs Nafutali, akafunya ī shakwinha.

⁷⁹ Ī shakwinha shakwe shalī sahani īmò ya feza ya būdito bo shekeeli igana na makūmi adatū, ibbakuli līmò lya feza lya būdito wa shekeeli makūmi mpungatī. Ū mpango gwa shekeeli jenījo gwalī gūlenganīlile na mpango gwa shekeeli ya ng'wipandī lyeela. Ī shiseme ī shose shaalī shokalile būsu būnogu, būsangije maguta, kūlwa shakwinha sha būsu.

⁸⁰ Akenha n'idishi līmò lya zahabu, būdito walyo shekeeli ikūmi, lyokagije būbbani;

⁸¹ nzagamba īmò songi, ng'ondi īmò, na ng'ondi yīngī ya ng'waka gūmò; ī jenījo akajenha kūbiza shitambò sha kūpemva.

⁸² Na ngulyati ya mbūli kūbiza shitambò sha būkenaagūji,

⁸³ na nzīkū ibīlī, ng'ondi itanò, ngulyati itanò ja mbūli, na ng'ondi itanò ja ng'waka gūmò būlī yene, ī jose jenīji jalī ja kūfunyiwa kūbiza shitambò sha būsangī. Ī shenīshi shalī shakwinha sha ng'wa Ahila ng'witūnja o ng'wa Enani.

Batongeeji kwenha shakwinha

⁸⁴ Ī shenīshi hū shalī shakwinha īsho batongeeji ba Baisilaeli bakafunya a ha lūshikū lwa ng'walīlo kwandya milīmo, aho gwaseeseebelagwa maguta. Bakafunya sahani ikūmi n'ibīlī ja feza, mabakuli ikūmi na abīlī ga feza, na madishi ga zahabu ikūmi na abīlī.

⁸⁵ Būl'isahani lya feza lyalī na būdito wa shekeeli igana na makūmi adatū; na būl'ibakuli lyalī na būdito wa shekeeli makūmi mpungatī. Ū būdito wa shiseme sha feza ī shose walī shekeeli shihūmbī shibīlī na magana anè, kūlenganīla nī shekeeli ya ng'wipandī lyeela.

⁸⁶ A madishi ga zahabu ayo ikūmi na a bīlī ayo gaalī gookalile būbbani gaalī na būdito wa shekeeli ikūmi būlī lyene, kūlenganīla na mpango gwa shekeeli ya ng'wipandī lyeela. Ū būdito wa madishi ga zahabu a gose walī shekeeli igana na makūmi abīlī.

⁸⁷ Ī shīītugo īshose ījikafunyiwa kūlwa shitambò sha kūpemva jaalī nzagamba songi ikūmi na ibīlī, ng'ondi ikūmi na ibīlī, na ng'ondi ikūmi na ibīlī ja ng'waka gūmò būlī yene; hamò na shakwinha shaaho sha būsu. Ngulyati ikūmi n'ibīlī jikatūmamīlwa kūlwa shitambò sha būkenaagūji.

⁸⁸ Ī shīītugo ī jose ījo jikafunyiwa kūlwa shitambò sha būsangī jaalī, nzīkū makūmi abīlī na inè, ng'ondi makūmi atandatū, ngulyati makūmi atandatū, na ng'ondi makūmi atandatū ja ng'waka gūmò būlī yene. Ī shenīshi hū shaalī shakwinha īsho shikafunyiwa ha lūshikū lwa ng'walīlo kwandya kūtūmama aho gwamala kūseeseebelwa maguta.

⁸⁹ Ū Musa aho wingīla ū ng'wiheema lya kwibilingīla kūhooya na SEEBA, akaliigwa ī lilaka līlīnyombya kūfuma a ha gatī gatī ya makelubi a higūlya y'isumbī lya shigongo, a h'isandīko lya būkaanīji. Na ng'hana akahooya nang'hwe.