Kūbala 6 - Bibilia Ilagano Lya Kale 2015

Kūbiza Nazili kūlī SEEBA

¹ Ū SEEBA ūng'wīla ū Musa,

² Lūngalūngaga nabo a Baisilaeli ūbawīle gīkī, “Ūlū munhū ngosha nūūlū nkīma wikomanya wei ng'wenekīlī kūlwa nguno ya ng'wa SEEBA, hūna ūlahīla gīkī atogilwe kwifunya kūbiza Nazili,

³ shing'wigelile ileche gete ū kūng'wa ī divai, nūūlū walwa, nūūlū kūtūmamīla ng'aasha ya kūbeejiwa kūfuma mu shikolo shose shose. Yaya nūūlū kūng'wa minzī ga mizabibu, nūūlū kūlya matwajo ga mizabibu; gabize madoto nūūlū mūūmu.

⁴ Ū ng'wikanza lyose īlo alī Nazili, atizūūlya matwajo gose gose ga nzabibu; yaya nūūlū madūūtū gaho dūhū, pye na a mūūla gaho yaya.

⁵ Hama ū ng'wikanza lyakwe lya kwikomanya, atizūūmoogwa ī nzwīlī jakwe nūūlū hado. Līl'ikanza lya kūjileka ī nzwīlī jakwe jikūle. Ū ng'wikanza lya kwikomanya kwakwe kūlwa nguno ya ng'wa SEEBA, shing'wigeleelilwe kwikala ng'wela kūshisha līshile ī likanza lyenīlo.

⁶ Ū ng'wikanza lya kwikomanya kwakwe ī lyose, atazunīlījiwe kwegeela ha mimba gose gose.

⁷ Nūūlū ise wa kūmyala ūzumalīka, nūūlū nina, nūūlū ng'wana wa ng'wawe ngosha nūūlū nkīma; yaya gete ū kwisosohaja kūlwa nguno yabo, nguno ū lūmeeng'ho lwa kwikomanya kwakwe kūlwa ng'wa SEEBA lūlī ha ntwe gwakwe.

⁸ Ū ng'wikanza lyose ī lya kwikomanya kwakwe, alī ng'wela kūlī SEEBA.

⁹ Ūlū munhū alī hamò nang'hwe hūna ūcha bo kūng'wisanganīja, ūbiza wajisosohaja ī nzwīlī jakwe ījo jikeejiwa h'ikanza lya kwifunya kwakwe kūlī SEEBA, īkūng'wigeleelwa kūjimooga ī nzwīlī jenījo ha lūshikū lwa mpungatī, ū lwa kwejiwa kwakwe.

¹⁰ Hūna a ha lūshikū lwa kanaane wenha mhunda ibīlī, nūūlū ng'hune ibīlī ja ng'hūūlū; wiza najo a ha nyango gw'iheema lya kwibilingīla, ūng'winha ngabīji.

¹¹ Ū ngabīji akūjifunya kūbiza shakwinha, īmò shitambò kūlwa būkenaagūji, ī yīngī shitambò sha kūpemva kūlwa kūbeeja isangī kūlwa nguno yakwe, kūlwa būhūbi wa kūbiza bbihī na mimba. Ū lūshikū lwenūlo akwifunya būpya kūlī SEEBA, gweejiwa hangī ū ntwe gwakwe;

¹² ūlyandya hangī būpya ī likanza lya kwikomanya kwakwe kūlwa ng'wa SEEBA. Īkūng'wigeleelwa kūfunya ng'ondi ya ng'waka gūmò kūlwa nguno ya shitambò sha būkenaagūji. Ī shikū ja kwikomanya kwakwe ū ng'wikanza īlo lyabītaga jitūbalwa, jikūcha mpandagīlo; nguno ū ng'wikanza lyenīlo walī wasosohalile.

¹³ “Ī shilagīlo īsho shiigelile kūtūmama kūlwa ng'wa Nazili ūlū ūlīkalīcha ī likanza lyakwe, shiishi. Akwenhwa a ha nyango gw'iheema lya kwibilingīla.

¹⁴ Ī shakwinha shakwe kūlī SEEBA akūshenha henaho, akwenha ng'ondi ya ng'waka gūmò, īyo ītī na būka; ya kūfunya shitambò sha kūpemva. Na ng'holo ng'hīma ya shitambò sha būkenaagūji, nayo ya ng'waka gūmò, hama ītī na būka; hamò na ng'ondi, nayo ītī na būka, ya shitambò sha būsangī.

¹⁵ Akūshenha ī shenīshi hamò na shakwinha shaho sha būsu na sha kūng'wiwa; wiza na shigabbu sha migatī ya būsu būtī na shibimbya, na keki ja būsu būnogu būsangije maguta, na migatī myūūmu ībililwe maguta.

¹⁶ Ū ngabīji akūshifunya pyī ī shose kūbiza shakwinha kūlī SEEBA, ūshifunya ī shitambò sha būkenaagūji nī sha kūpemva.

¹⁷ Hūna ūshegeleja kūlī SEEBA nī shigabbu sha migatī ya būsu būtī na shibimba, nī ng'ondi ya shitambò sha būsangī wīfunya, hamò nī shakwinha shaho ī sha būsu, nī sha kūng'wiwa.

¹⁸ Hanuma ū Nazili ūjimooga hangī ī nzwīlī ījo jalī ū kū ntwe gwakwe aho alitūūla būpya kūlī SEEBA; ūjikuminga ūjiponeja mu moto, ūyo gūlībaka a ha sīlīlī ya shitambò sha būsangī.

¹⁹ “Ū Nazili ūlū ūmala kūjimooga ī nzwīlī ja kūfuma h'ikanza lya kwifunya kwalwe kūlī SEEBA, ū ngabīji akūng'winha nkono gwa ng'ondi gūzugile. Ū mu shigabbu ūsola mo keki na ngatī ng'ūūmu; ī shose shibeejiwe na būsu būtī na shibimbya.

²⁰ Ū ngabīji akūshiyengeeja kū būtongi bo ng'wa SEEBA ī shenīsho, shibize shitambò sha kūyengeejiwa; ī shoi shilī sheela, īlī sabo ya ngabīji, hamò nī shidali sha kūyengeejiwa, nī litango īlo lyalī lyafunyiwagwa kūlwa ng'wa SEEBA. Ūlū yūshila ī yenīyo, ū Nazili adūgije kwandya kūng'wa ī divai.

²¹ Ī shilagīlo shenīshi sha kūtūmamīlwa kūlwa Nazili ūyo ūfunya kūlahīla kwakwe kūlī SEEBA. Ī shakwinha shakwe akūshifunya kūlenganīla na kūlahīla kūlwa kwikomanya kwakwe; kūleka ū kūshibala ī shakwinha ī shingī īsho adūgije kūshifunya. Shiigelile ashikīlīje ūmo alahīlīlile kūlwa nguno ya kwikomanya kwakwe kūbiza Nazili.”

Ngabīji na kūfuuha

²² Hūna ū SEEBA ūng'wīla ū Musa,

²³ Ng'wīlage ū Alooni na a bintūnja bakwe gīkī, “Ūlū mulībafuuha a Baisilaeli, mulahayage gīkī,

²⁴ Ū SEEBA akwīlūkīle mbango, na akūlang'hane.

²⁵ SEEBA akwakīje ikūjo lya būshū wakwe, na akūchīle shigongo.

²⁶ SEEBA akūlogeje būshū wakwe, na akwinhe mhola.”

²⁷ Bakūyūlīhaya mu gīko ī lina lyane ū kū Baisilaeli, nane naabafuuha.