Kūbala 35 - Bibilia Ilagano Lya Kale 2015

Mizengo ya Balawī

¹ Aho balī mu mbūga ya Moabu, bbihī na mongo gwa Yolodani, ī lipandī īlo lyalī liilolile na Yeliko, ū SEEBA ūng'wīla ū Musa gīkī,

² “A Baisilaeli binhage shiishi shilagīlo. Ībigeleelilwe kūbinha mizengo a Balawī; bapandīke ha kwikala ū mu sī ya wingīji, īyo balayīpandīke a Baisilaeli. Hama babinhe na madīīmīlo gabize hihī nī mizengo yenīyo.

³ Ū mu gīko nabo bakūpandīka mizengo yabo ya wikomangīle, na madīīmīlo ga mitugo jabo; bayūdīīmīla mo ī ng'ombe jabo nī ng'holo, nī mitugo ī jingī ījo baalī najo.

⁴ A madīīmīlo ayo mulabinhe a Balawī, ayo gīpīndije ī mizengo yabo, gakūdaha ibbaala lya kūbiza na miita gītī magana anè na makūmi atanò ū kwīnga aho gūgelelile ū nzengo ū kūja ī hanze, kūgūpīndīlīja ū gose.

⁵ Hanuma nī hanze ya nzengo mukūbala miita magana kenda ī lipandī ī lya Kīīya, nī lya Dakama miita magana kenda, nī lya Ng'weli magana kenda, nī lya Sukuma magana kenda; ū nzengo gwenekīlī gūbiza ha gatī gatī. Ī libbaala lyenīlo īkūbiza sabo ya mizengo yabo kūlwa kūdīīmīla mitugo jabo.

⁶ Ū mu mizengo īyo mukūbinha a Balawī, ītandatū īkūbiza ya kūpeelela ūlū munhū ūbūlaga; hama a Balawī benabo mukūbinha na mizengo yīngī makūmi anè n'ībīlī.

⁷ Ī mizengo ī yose īyo mukūbinha a Balawī īkūbiza makūmi anè n'īnaane, kūgasanja mo na a madīīmīlo gabo.

⁸ Ī mizengo īyo mukūbinha a Balawī kūfuma ū mu sī ya wingīji wa Baisilaeli, shiigelile ījīlanīje nī sī ya wingīji ya būlī lūganda. Ūlū lūganda lūlī na mizengo mingī, mukūsola mizengo mingī kūfuma mo, alīyo ūlū lūganda lūlī na mizengo migeehu dūhū, mukūsola migeehu.”

Mizengo ya kūpeelela

⁹ Ū SEEBA ūng'wīla hangī ū Musa,

¹⁰ Lūngalūngaga nabo a Baisilaeli ūbawīle gīkī, “Ūlū ng'ūgūkīla ū mongo gwa Yolodani ng'wingīla ū mu sī ya Kanani,

¹¹ mukūsolanhya mizengo ng'wītūūle kūbiza ying'we ya kūyūpeelela; ūko munhū adūgije kūpeelela ūlū ūbūlaga munhū ūngī kūlwa kūhūbīla.

¹² Ī mizengo yenīyo īkūtūmama kūlwa kūmpeela maji wa shiilī; īkūbiza ya kūpeelela ko ūlū munhū ūbūūlwa gīkī wabūlagaga, atizūbūlagwa aho ataalī kūdegelekwa ha lūbanza lwa balamuji.

¹³ Ī mizengo ītandatū īyo mulīyīsolanhya yenīyo, gakūbiza mapandī ga kūpeelela.

¹⁴ Ū kū lwande ūlū ū lwa mongo gwa Yolodani mukūsolanhya mizengo idatū, nī lipandī lya Kanani ng'ūsola idatū koi.

¹⁵ Ī mizengo ya kūpeelela yenīyī īkūbiza kūlwa Baisilaeli bose, pye na a bageni, na a bangī abo bakwikalaga hamò nabo. Ose ose ūyo ūbūlaga munhū mu kūhūbīla, akūpandīka ha kūpeelela.

¹⁶ Alīyo ūyo ūntūla munhū na līīchūūma ūmūlaga, ū ng'wenūyo mūlagi; ū mūlagī shing'wigeleelile kūbūlagwa.

¹⁷ Nūūlū ūyo ūbūūcha iwe mu nkono īlo līshikile kūbūlaga, hūna ūlītūmamīla kūntūla munhū ūmūlaga, ū ng'wenūyo nang'hwe mūlagi; ū mūlagi shing'wigeleelile kūbūlagwa.

¹⁸ Nūūlū hamo alī na līntī mu nkono īlo līdūgije kūbūlaga munhū, hūna ūlītūmamīla kūntūla munhū ūmūlaga, ū ng'wenūyo mūlagi; ū mūlagi shing'wigeleelile kūbūlagwa.

¹⁹ Ūūmaji wa shiilī akūmūlaga ū munhū ū mūlagi; ūlū ūmpandīka shing'wigeleelilwe amūlage.

²⁰ Ūlū munhū ang'wikanilwe ng'wiye, hūna ūnchima līshikolo, nūūlū ūng'wibandīīla hūna ūmponda na līshikolo ūntūla ūmūlaga,

²¹ nūūlū ūntūla ngumī kūlwa nguno ya wanishi ūbo alī nabo kūlī we, kūshisha ūmūlaga, ū munhū ng'wenūyo shing'wigeleelilwe abūlagwe, nguno mūlagi ū ng'wenūyo. Ū maji wa shiilī shiigelil amūlage ū mūlagi ūlū ūmpandīka.

²² Gwike ūlū munhū ūhayimanīla wanchima ng'wiye līshikolo, nūūlū alīponya līshikolo, hūna lyūkantūla alīyo atī na wanishi bose bose nang'hwe,

²³ nūūlū aho atūmonaga ūntūla iwe īlo līshikile kūbūlaga, na ng'hana ūcha; ū munhū wa gīko īkī walī atī na nhungī yose yose ū kūlī ng'wiye, nūūlū walī atī ng'wanishi wakwe, hū kūhaya walī atī na nguno yose yose ya kūmūlaga,

²⁴ a henaho ū lūbanza lwa balamuji lūkūbalola chiza, ū mūūlwa nū maji wa shiilī. Ī mihayo yabo īkūlolwa kūlenganīla nī shilagīlo shenīshi.

²⁵ Shiigelile ū lūbanza lūngunīje ūyo alībūūlwa gīkī mūlagi, lūnang'hane atizūbūlagwa nū maji wa shiilī. Bakūnshosha ū kū nzengo gwa kūpeelela ūko walī wapeelelile. Ū mūūlwa ng'wenūyo shing'wigelilwe ikale kwenūko kūshisha kūcha kwa ngabīji ntaale, ūyo itīīlilwe maguta.

²⁶ Alīyo ū mūūlwa ūlū ūfuma ū mu mbīmbī ja nzengo gwa kūpeelela, ūko walī wapeelelile,

²⁷ hūna ū maji wa shiilī ūmona alī hanze ya nzengo gwenūyo, ū maji wa shiilī ūlū ūmūlaga ū munhū ng'wenūyo, atūsolwa būbi gīkī wabūlagaga.

²⁸ Ū mūūlwa shing'wigeleelilwe kwikala ū mu nzengo gwa kūpeelela, kūshisha ache ū ngabīji ntaale; ūlū ūcha ū ngabīji ntaale, nang'hwe lūūlū adūgije ū kūshoka ū kū malaale gakwe.”

Būkaanīji kūlwa būbūlagi

²⁹ Aka kalī kihelele ka shilagīlo īsho shikūmulang'hana makanza gose, nū mu shibyalīlwe īsho shiliza, hose hose ūko mulabize:

³⁰ Ūlū munhū ūbūūlwa gīkī mūlagi, nang'hwe akūbūlagwa kūlwa būkaanīji wa banhū abo balīnkaanīla. Alīyo atīho nūūlū ūmò wa kūbūlagwa kūlwa nguno ya būkaanīji wa munhū ūmò dūhū.

³¹ Hama yaya kwanukūla shose shose sha kūkomoola būpanga wa mūlagi ūyo igeleelilwe kūbūlagwa; ū munhū wa gīko nekagi abūlagwe.

³² Yaya nūūlū kwanukūla shikomoolelo shose shose kūfuma kūlī munhū ūyo wapeelela kū nzengo gwa kūpeelela, gīkī hīmba ashoke kū malaale gakwe, alīyo ū ngabīji ntaale ataalī ū kūcha.

³³ Ī sī īyo mukwikala yaya ū kwīsosohaja. Ū witi wa mininga būkīsosohajaga ī sī; na gūtīho mhayo gose gose gwa kwībeegeja isangī ī sī ūlū yūlinda yidīkīlwa mininga; ūlū ītī kwitwa dūhū nago a mininga gakwe ūyo witaga mininga ga ūngī.

³⁴ Ī sī īyo mukūjiikala yaya ū kwīsosohaja; nguno ī yoi īlī wikalo wane, ū nene SEEBA ūyo nakwikalaga mubo a Baisilaeli.