Kūbala 34 - Bibilia Ilagano Lya Kale 2015

Mbīmbī ja sī ya Kanani

¹ Ū SEEBA ūng'wīla ū Musa,

² Bakomelejage a Baisilaeli ūbawīle gīkī, “Ūlū mulingīle ū mu sī ya Kanani, ī sī ying'we īyo mulīīgabīlwa kūbiza wingīji wing'we ī mbīmbī jayo jiiji:

³ Ū lūbīmbī lwing'we ū lwa Dakama lūkūshika kwitogolo lya Zini, lūja lūlikilimbīja sī ya Edomu. Ī lipandī ī lya Kīīya, ū kū Dakama yaho ū lūbīmbī lwing'we lūkwandīja aho īgelelile nyanza ya munhu.

⁴ Hūna lūūgalūka kūlola Dakama, lūja lūlīlondeela ntulumenha gwa Akilabimu, lūūkashika Zini; hūna lūūgoloola kūja Dakama dūhū kūshisha Kadeshi balinea. Hanuma ya henaho, lūkūja lūūkashika ipandī lya Hazaali-adaali, kūshisha Azimoni.

⁵ Ū kwandīja a henaho lūkūgalūka hangī lūje lūkagadye mu kalonga ka Misili, hūna lwika lūūkashilīla kū nyanza.

⁶ Ū kū Ng'weli, ū lūbīmbī lwing'we lūkūbiza ī mbalama ya nyanza ī nhaale. Ū lwenūūlū hū lūbīmbī lwing'we ū kū lwande ū lwa Ng'weli.

⁷ Ū kū lwande ū lwa Sukuma, solagi nkwanga gwa kwīngīīla ū kū nyanza ī nhaale, kūja kū lūgūlū lwa Hooli;

⁸ hūna ū kūfuma ū kū lūgūlū lwa Hooli, ng'ūja Lebo na kūshisha Hamati. Ū kūfuma ū kwenūko ū lūbīmbī lūkūīlīīla Zedadi;

⁹ hūna lūūgoloola lūjile kūshisha lūūkashika Zifloni, kūjūgelela Hazaali-enani. Ū lwenūūlū hū lūkūbiza lūbīmbī lwing'wa ū kū lwande ū lwa Sukuma.

¹⁰ Ū kū Kīīya, ū lūbīmbī lwing'we lūkwandīja Hazaali-enani kūshisha Shefamu.

¹¹ Hama lūūtulumenha kūfuma ī Shefamu kūīlīla Libula, kīya ya Aini, hūna lūja gīko dūhū lūkwikilimbījaga nyanza ya Kineleti.

¹² Ū kwīnga a henaho ū lūbīmbī lwenūlo lūkūtulumenha kūīlīīla kū mongo gwa Yolodani lūūkashilīla mu nyanza ya munhu. Ī yenīyī h'īkūbiza sī ying'we na mbīmbī jayo hose hose būlī ipandī.”

¹³ Hūna ū Musa ūbalagīla a Baisilaeli alīhaya, “Īgabanhyagi ī sī yenīyī mubinhe a banhū ū wingīji wabo. Ū SEEBA walagīlile gīkī īgabanhyiwe ū kū ng'anda ījo kenda na nusu.

¹⁴ Nguno ī ng'anda ja ba Lubeni na Gadi, nī nusu ya Manase ī jene jamalile kwanukūla ū wingīji wajo.

¹⁵ Ī ng'anda īj'ibīlī na nusu jenījo janukūlile ū wingīji wajo ū kū ntambūko gwa Kīīya ya mongo gwa Yolodani, ī lipandī īlo liilolile na nzengo gwa Yeliko; ū kū būfuma līīmi.”

¹⁶ Ū SEEBA ūng'wīla ū Musa gīkī,

¹⁷ “A mina aya hū ga banhū abo bakwīgabanhya ī sī ya wingīji wing'we, Ngabīji Elieza na Yoshwa ng'witūnja o ng'wa Nuni.

¹⁸ Hanuma ūkūsola na ntongeeji ūmò kūfuma mu būlī lūganda, wa kūgunanha ū mu kwīgabanhya ī sī.

¹⁹ Aya hū a mina ga banhū benabo: ‘Ū mu lūganda lwa Yuda, akūbiza Kelebu ng'witūnja o ng'wa Yefune.

²⁰ Ū mu lūganda lwa ng'wa Simioni, akūbiza Shemūli ng'witūnja o ng'wa Amihudi.

²¹ Ū mu lūganda lwa ng'wa Benjamini, akūbiza Elidadi, ng'witūnja o ng'wa Kisiloni.

²² Ū mu lūganda lwa ng'wa Dani, akūbiza Būūkī, ng'witūnja o ng'wa Yogili.

²³ Ū mu lūganda lwa ng'wa Manase o ng'wa Yosefu, akūbiza Hanieli, ng'witūnja o ng'wa Efodi.

²⁴ Ū mu lūganda lwa ng'wa Efulaimu o ng'wa Yosefu, akūbiza Kemūli, ng'witūnja o ng'wa Shifutani.

²⁵ Ū mu lūganda lwa ng'wa Zabuloni, akūbiza Elizafani, ng'witūnja o ng'wa Palinaki.

²⁶ Ū mu lūganda lwa ng'wa Isakaali, akūbiza Palitieli ng'witūnja o ng'wa Azani.

²⁷ Ū mu lūganda lwa ng'wa Asheli, akūbiza Ahihudi ng'witūnja o ng'wa Shelomi.

²⁸ Ū mu lūganda lwa ng'wa Nafutali, akūbiza Pedaheli ng'witūnja o ng'wa Amihudi.’”

²⁹ A benaba hū bene a banhū abo SEEBA akalagīla gīkī babize bagabanhya bayo ī sī ya Kanani ū mu Baisilaeli.