Kūbala 29 - Bibilia Ilagano Lya Kale 2015

Shigukulu sha mhembe

¹ Ū mu lūshikū lwa kwandya mu ng'weji gwa mpungatī, bizagi na kwibilinga kwela, nī milīmo ying'we ī ya būlī lūshikū yaya ū kūtūmama. Ū lūshikū lwenūlo lūlī lwing'we lwa kūfuula mhembe.

² Mukūfunya nzagamba īmò songi, na ng'ondi nhaale īmò, hamò na ng'ondi songi mpungatī jitī na shilingo, būlī yene ya ng'waka gūmò; jibize shitambò sha kūpemva kūlwa kwenha ng'waso gwawiza kūlī SEEBA.

³ Ī nzagamba mukwīfunya hamò na kilo idatū ja shakwinha sha būsu būnogu būsangije maguta; ī ng'ondi ī nhaale hamò na kilo ibīlī.

⁴ Ī ng'ondi ī songi ījo mpungatī būlī yene īkūfunyiwa hamò na kilo īmò.

⁵ Mukūfunya na ngulyati ya mbūli kūbiza shitambò sha būkenaagūji, kūbeja isangī kūlwa nguno ying'we.

⁶ Ī shitambò shenīshi shikūfunyiwa hamò nī shakwinha sha kūpemva īsho shihelilwe kūfunyiwa būlī ng'weji na būlī lūshikū, nī shakwinha shaho ī sha būsu, nī sha kūng'wiwa, gīt'ūmo īhelelilwe. Ī shoi shilī shitambò sha kūpemva kūlwa kwenha ng'waso gwawiza kūlī SEEBA.

Lūshikū lwī Isangī

⁷ Nū mu lūshikū lw'ikūmi ū ng'weji gwa mpungatī gwenūyo, mukūbiza na kwibilinga kwela. Ū mu lūshikū lwenūūlo mukwilecha ī shawiza ī sha kūyeja mīlī, nī milīmo ying'we ī ya būlī lūshikū yaya ū kūtūmama.

⁸ Mukūfunya nzagamba īmò songi, na ng'ondi nhaale īmò, hamò na ng'ondi songi mpungatī jitī na shilingo, būlī yene ya ng'waka gūmò; jibize shitambò sha kūpemva kūlwa kwenha ng'waso gwawiza kūlī SEEBA.

⁹ Ī nzagamba mukwīfunya hamò na kilo idatū ja shakwinha sha būsu būnogu, būsangije maguta; ī ng'ondi ī nhaale hamò na kilo ibīlī.

¹⁰ Ī ng'ondi ī songi īji mpungatī, būlī yene mukwīfunya hamò na kilo īmò.

¹¹ Mukūfunya na ngulyati ya mbūli ya shitambò sha būkenaagūji, kūbeeja isangī kūlwa nguno ying'we; īkūfunyiwa hamò nī shitambò sha būkenaagūji īsho shikafunyiagwa kūlwa kūbeja isangī, nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

Shigukulu sha maduku

¹² Ū mu lūshikū lw'ikūmi n'itanò ū ng'weji gwenūyo, mukūbiza na kwibilinga kwela, nī milīmo ying'we ī ya būlī lūshikū yaya ū kūtūmama. Mukūbiza na shigukulu sha shikū mpungatī kū būtongi bo ng'wa SEEBA.

¹³ Ū SEEBA mukūng'wenhela shitambò sha kūpemva, kūlwa kwenha ng'waso gwawiza. Ī shitambò sha kūpemva shing'we shikūbiza sha nzagamba songi ikūmi na idatū, na ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

¹⁴ Ī nzagamba ī jose ījo ikūmi na idatū, būlī yenī mukwīfunya hamò na kilo idatū ja shakwinha sha būsu būnogu, būsangije maguta; ī ng'ondi ī nhaale būlī yene īfunyiwe hamò na kilo ibīlī.

¹⁵ Ī ng'ondi ī songi ījo mpungatī, būlī yene hamò na kilo īmò.

¹⁶ Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

¹⁷ Ū mu lūshikū lwa kabīlī ū ng'wikanza lyenīlo, mukūfunya nzagamba songi ikūmi n'ibīlī, ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

¹⁸ Ī nzagamba ī jose, nī ng'ondi ī nhaale, nī ng'ondi ī songi; būlī yene mukwīfunya hamò nī shakwinha sha būsu, nī sha kūng'wiwa; gīītī mo buli ūbūkūmi wajo.

¹⁹ Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

²⁰ Ū mu lūshikū lwa kadatū ū ng'wikanza lyenīlo, mukūfunya nzagamba songi ikūmi n'īmò, na ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

²¹ Ī nzagamba ī jose, nī ng'ondi ī nhaale, nī ng'ondi ī songi; būlī yene mukwīfunya hamò nī shakwinha sha būsu, nī sha kūng'wiwa;gīītī mo buli ūbūkūmi wajo

²² Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

²³ Ū mu lūshikū lwa kanè ū ng'wikanza lyenīlo, mukūfunya nzagamba songi ikūmi, na ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

²⁴ Ī nzagamba ī jose, nī ng'ondi ī nhaale, nī ng'ondi ī songi; būlī yene mukwīfunya hamò nī shakwinha sha būsu, nī sha kūng'wiwa, gīītī mo buli ūbūkūmi wajo.

²⁵ Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

²⁶ Ū mu lūshikū lwa katanò ū ng'wikanza lyenīlo, mukūfunya nzagamba songi kenda, na ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

²⁷ Ī nzagamba ī jose, nī ng'ondi ī nhaale, nī ng'ondi ī songi, būlī yene mukwīfunya hamò nī shakwinha sha būsu, nī sha kūng'wiwa;gīītī mo buli ūbūkūmi wajo.

²⁸ Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

²⁹ Ū mu lūshikū lwa katandatū ū ng'wikanza lyenīlo, mukūfunya nzagamba songi inaane, na ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

³⁰ Ī nzagamba ī jose, nī ng'ondi ī nhaale, nī ng'ondi ī songi, būlī yene mukwīfunya hamò nī shakwinha sha būsu, nī sha kūng'wiwa; gīītī mo buli ūbūkūmi wajo.

³¹ Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

³² Ū mu lūshikū lwa mpungatī ū ng'wikanza lyenīlo, mukūfunya nzagamba songi mpungatī, na ng'ondi nhaale ibīlī, hamò na ng'ondi songi ikūmi n'inè jitī na shilingo, būlī yene ya ng'waka gūmò.

³³ Ī nzagamba ī jose, nī ng'ondi ī nhaale, nī ng'ondi ī songi, būlī yene mukwīfunya hamò nī shakwinha sha būsu, nī sha kūng'wiwa; gīītī mo buli ūbūkūmi wajo.

³⁴ Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

³⁵ Ū mu lūshikū lwa kanaane mukūbiza na kwibilinga kwela, hama yaya ū kūtūmama ī milimo īyo mukatūmamaga na kale.

³⁶ Mukūfunya shitambò sha kūpemva kūlwa kwenha ng'waso gwawiza kūlī SEEBA, nzagamba īmò, ng'ondi nhaale īmò, na ng'ondi songi mpungatī jitī na shilingo, būlī yene ya ng'waka gūmò.

³⁷ Ī nzagamba nī ng'ondi ī nhaale, nī ng'ondi ī songi, būlī yene mukwīfunya hamò nī shakwinha sha būsu, nī sha kūng'wiwa;gīītī mo buli ūbūkūmi wajo.

³⁸ Mukūfunya na ngulyati ya mbūli ya shitambò sha būkenaagūji; īkūfunyiwa hamò nī shitambò sha kūpemva īsho shikafunyiagwa būlī lūshikū, hamò nī shakwinha sha būsu, nī sha kūng'wiwa īsho shikafunyiagwa ū ng'wikanza lyenīlo.

³⁹ Ī shakwinha īsho shikafunyiagwa kūlwa kūlahīla nī sha wiyaabī, shiigeleelilwe kūfunyiwa. Alīyo ū mu shikū ja shigukulu shing'we īsho muhelelilwe, mukūmfunīja ū SEEBA nī shakwinha īshi, shitambò sha kūpemva, shakwinha sha būsu, shakwinha sha kūng'wiwa, nī shitambò sha būsangī.

⁴⁰ Ū Musa ūbawīla a Baisilaeli pyī īyo SEEBA akanagīīla.