Kūbala 28 - Bibilia Ilagano Lya Kale 2015

Shakwinha sha būlī lūshikū

¹ Hūna ū SEEBA ūng'wīla ū Musa gīkī,

² “Binhage a Baisilaeli ī shilagīlo īshi; ūbawīle gīkī, ‘Ī shilīwa sha kūnenhela nene kwiza kūshifunya mu nzīla ya kūshipemba mu moto, gīkī shibize sha kwenha ng'waso gwawiza kūlī nene, ng'ūshifunya ng'wikanza īlo līhelilwe.’

³ Bawīlage gīkī, ‘Ī shitambò īsho shiigeleelilwe kūmfunīja SEEBA mu nzīla ya kūshipemba mu moto shiishi, būlī lūshikū jikūfunyiwa ng'holo ibīlī, kūbiza shitambò sha kūpemva; būlī yene ībize ya ng'waka gūmò, na ītī na shilingo.

⁴ Īmò yajo īkūfunyiwa dilū, ī yīngī mhīndī.

⁵ Būlī yene īkūfunyiwa hamò na shakwinha sha būsu; kilo īmò ya būsu būnogu būsangije maguta, na liita īmò ya maguta gawiza ga kūkang'wa kūfuma mu zeituni.

⁶ Ī shenīshi h'ī shitambò sha kūpemva mu moto, īsho shikalagīlwa aho balī kū lūgūlū lwa Sinai, gīkī shikūyūpemva mu moto būlī lūshikū, shibize sha kwenha ng'waso gwawiza kūlī SEEBA.

⁷ Ī shakwinha sha kūng'wiwa īsho shikūja hamò nī shitambò shenīshi, shikūbiza liita īmò ya divai, kū būlī ng'holo īyo īlafunyiwe. Ī shakwinha sha kūng'wiwa shenīsho shikwitwa kū būtongi bo ng'wa SEEBA, a hipandī ī lyeela.

⁸ Ī ng'holo ya kabīlī īkūbiza ya kūfunyiwa mhīndī, nayo īkūfunyiwa hamò na shakwinha sha būsu, na shakwinha sha kūng'wiwa, gīt'ūmo ūlīītīle ī dilū. Ī shitambò shenīshi shilī sha kūfunyiwa mu nzīla ya kūpemva mu moto, shūbiza shitambò sha kwenha ng'waso gwawiza kūlī SEEBA.’”

Shitambo ha sabato

⁹ Ū mu lūshikū lwa Sabato ī shitambò shing'we shikūbiza ng'holo ibīlī, būlī yene ya ng'waka gūmò, na ītī na shilingo; hamò nī shakwinha sha kūng'wiwa nī sha būsu, kilo ibīlī ja būsu būnogu būsangije maguta.

¹⁰ Ī shenīshi h'ī shitambò sha kūpemva sha kūfunyiwa būlī lūshikū lwa Sabato; alīyo shikūīlanīja nī shitambò sha kūpemva īsho shikafunyiagwa būlī lūshikū, hamò nī shakwinha shaho ī sha kūng'wiwa.

Shitambo sha būlī ng'weji

¹¹ Na būlī ng'weji ūlū gūlandya, mukūmfunīja ū SEEBA shitambò sha kūpemva, nzagamba ibīlī songi, ng'ondi īmò, na ng'ondi mpungatī jitī na shilingo, būlī yene ībize ya ng'waka gūmò.

¹² Būlī nzagamba īyo īlīfunyiwa ībize na shakwinha sha būsu sha kūja nayo, kilo idatū ja būsu būnogu būsangije amaguta; ī ng'ondi ībize hamò na shakwinha sha būsu; kilo ibīlī ja būsu būnogu būsangije maguta.

¹³ Ī ng'ondi ī songi jibize na shakwinha sha būsu; kilo īmò ya būsu būnogu būsangije maguta. Ī shenīshi shikūfunyiwa mu nzīla ya kūpemva mu moto shūbiza sha kwenha ng'waso gwawiza kūlī SEEBA.

¹⁴ Būlī nzagamba īkūbiza na shakwinha sha kūng'wiwa, liita ibīlī ja divai; ī ng'ondi ī yene īkūbiza na liita īmò na lobo ya divai; alīyo ī ng'ondi ī songi ī jene būlī yene īkūbiza na liita īmò ya divai. Ī shitambò shenīshi shikūyūfunyiwa būlī ng'weji ū mu myeji ya ng'waka ngima.

¹⁵ Na ngulyati ya mbūli īkūfunyiwa ībize shitambò sha būkenaagūji, īkūfunyiwa hamò nī shitambò sha kūpemva īsho shikafunyiagwa būlī lūshikū, nī shakwinha shaho ī sha kūng'wiwa.

Shigukulu sha Pasaka

¹⁶ Ū mu lūshikū lw'ikūmi n'inè ng'weji gwa kwandya, īkūbiza ho pasaka ya ng'wa SEEBA.

¹⁷ Ū lūshikū lw'ikūmi n'itanò lūkūbiza lwa kwandya shigukulu; kwandīja lūshikū lwenūlo mukūlya migatī ītī na shibimbya, ikanza lya shikū mpungatī.

¹⁸ Ū mu lūshikū lwa kwandya lwenūlo bizagi na kwibilinga kwela, nī milimo ī ya shikū jose yaya ū kwīta.

¹⁹ Alīyo ū SEEBA mfunījagi shitambò sha kūpemva mu moto, nzagamba songi ibīlī, ng'ondi īmò na ng'ondi songi mpungatī jitī na shilingo; būlī yene ya ng'waka gūmò.

²⁰ Ūlū ūlīyīfunya ī nzagamba, būlī yene īfunyiwe hamò na shakwinha sha būsu, kilo idatū ja būsu būnogu būsangije maguta; ī ng'ondi ībize na kilo ibīlī.

²¹ Ī ng'ondi ī songi būlī yene kilo īmò.

²² Ūkūfunya na ngulyati īmò ya mbūli, ībize shitambò sha būkenaagūji, kūbeeja isangī kūlwa nguno ying'we.

²³ Ī shitambò shenīshi shikūfunyiwa hamò nī shitambò sha kūpemva īsho shikafunyiagwa būlī lūshikū dilū.

²⁴ Mukwīta gīko nū kū shilīwa īsho shikapembagwa mu moto, shabiza sha kwenha ng'waso gwawiza kūlī SEEBA; nasho mukūshifunya būlī lūshikū, kūshisha ikanza lya shikū mpungatī. Ī shenīshi nasho shikūfunyiwa hamò nī shitambò sha kūpemva īsho shikafunyiagwa būlī lūshikū, nī shakwinha shaho ī sha kūng'wiwa.

²⁵ Hanuma a ha lūshikū lwa mpungatī mukūbiza na kwibilinga kwela; a henaho yaya hangī ū kwīta ī milīmo ying'we īyo mukīītaga na kale.

Shigukulu sha mifungo

²⁶ Ū mu lūshikū lwa kwenha matwajo ga kwandya, ūlū mulīmfunīja ū SEEBA ī shakwinha sha shilīwa shipya, ū mu shikū ja shigukulu sha mifungo, bizagi na kwibilinga kwela, na yaya ū kwīta ī milīmo yaho na kale.

²⁷ Mukūfunya nzagamba ibīlī songi, ng'ondī īmò na ng'ondi songi mpungatī, ja ng'waka gūmò būlī yene; jikūbiza shitambò sha kūpemva, sha kwenha ng'waso gwawiza kūlī SEEBA.

²⁸ Ūlū mulīfunya ī nzagamba, būlī yene īfunyiwe hamò na shakwinha sha būsu, kilo idatū ja būsu būnogu būsangije maguta; ī ng'ondi kilo ibīlī.

²⁹ Ī ng'ondi ī songi būlī yene kilo īmò.

³⁰ Na mbūli īmò ngulyati, mukwīfunya ībize shitambò sha būkenaagūji, kūbeeja isangī kūlwa nguno ying'we.

³¹ Ī shitambò shenīshi shikūfunyiwa hamò nī shitambò sha kūng'wiwa īsho shikafunyiagwa hamò nasho; hama shikūfunyiwa hamò nī shitambò sha kūpemva īsho shikafunyiagwa būlī lūshikū, nī shakwinha shaho ī sha būsu. Pyī ī mitugo jenījo jibize jitī na shilingo.