Kūbala 27 - Bibilia Ilagano Lya Kale 2015

Bashīke ba ng'wa Zelofehadi

¹ Baalīho bashīke ba ng'wa Zelofehadi, ng'witūnja o ng'wa Hefeeli, ng'witūnja o ng'wa Gileadi, ng'witūnja o ng'wa Makili, ng'witūnja o ng'wa Manase, wa lūganda lo Manase ng'witūnja o ng'wa Yosefu; a bashīke benabo bitanagwa ba Mahala, Noa, Hogla, Milika, na Tīzīla.

² Lwise lūmò bakiza a ha nyango gwa kwingīlīla ng'wiheema lya kwibilingīla, bīmīīla kū būtongi bo ng'wa Musa. Walīho nū ngabīji Elieza hamò na a banamhala, nī libità ī lyose. Būūhaya gīkī,

³ “Ū sīswe wachīla kwitogolo, alīyo atalekile ng'wana ngosha; gwike ū wei walī atī ūmò wa balondeeji ba ng'wa Koola abo bakalya gwīnda ya kūngomela SEEBA; ū wei waacha kūlwa nguno ya būkenaagūji būngī nabo.

⁴ Na lūūlū ī gīsī, nibūlī ī lina lya ng'wa sīswe līijmīīle gīko dūhū, shitange īkī walī atī na ng'wana ngosha? Twinhagi na a bise sabo, gīt'ūmo mulībinhīla a ba mu kaya ya ng'wise a bangī.”

⁵ Ū Musa ūgūshisha ū mhayo gwabo kū būtongi bo ng'wa SEEBA.

⁶ Nawe ū SEEBA ūng'wīla gīkī,

⁷ “Īyo balīyīhaya a bashīke ba ng'wa Zelofehadi ya ng'hana. Shikwigelile ūbinhe nabo sabo, nabo bapandīke wingīji ū mu kaya ng'wa saabo; binhagi ū wingījibo ng'wa saabo, būbize wabo.

⁸ Nīyo a Baisilaeli bawīlage gīkī, ‘Ūlū munhū ūcha alīyo atalekile ng'wana ngosha, ū wingīji wakwe ng'winhagi nshīke wakwe.

⁹ Ūlū atī na ng'wana nkīma, ū wingīji wakwe ng'winhagi ng'wana wa ng'wawe.

¹⁰ Ūlū atī na ng'wana wa ng'wawe, binhagi bakūlūye nūūlū bazunaye ba ng'wa ise.

¹¹ Ū ise ūlū walī atī na baana ba ng'wawe, ng'winhagi ndūgūye ose ose, wa bbihī ū mu lūganda lo ng'wawe, ū wingīji wenūbo būbize wakwe. Ī shenīshi shikūbiza shilagīlo sha Baisilaeli ū mu kaīle kaabo, gīt'ūmo SEEBA akanagīīla Musa.’”

Yoshwa ha nīmo go ng'wa Musa

¹² Ū SEEBA ūng'wīla ū Musa, “Linhaga ū mu lūgūlū lwa Abalimu ūlū, wīlole ī sī īyo naabinhile a Baisilaeli.

¹³ Ūlū ūmala ū kwībona nū bebe ūkūtwalwa kū banhū bako, gīt'ūmo nkūlūyo Alooni akīītīlwa.

¹⁴ Nguno a bing'we būbīlī wing'we mukaleka ū kūshishikīlī ī shilagīlo shane, aho bakagoma a banhū ng'witogolo lya Zini kūlwa nguno ya minzī. Mutaninhile ikūjo ū kū būtongi wabo, īlo līnigeleelilwe kūlwa wela wane.” (A minzī ayo gahayiagwa, gaalī a ga Meliba ū ng'witogolo lya Zini.)

¹⁵ Ū Musa ūng'wīla ū SEEBA gīkī,

¹⁶ “Ū SEEBA Mulungu wa myoyo ya banhū bose ni asolage munhū abize ntaale wabo a banhū benaba.

¹⁷ Munhū wa kūshimīza hamò nabo, na wa kūbatongeela ng'wikanza lya kūfuma nūūlū lya kwingīla. Ū mu gīko a banhū ba ng'wa SEEBA batūbiza gītī ng'holo jitī na ndīīmi.”

¹⁸ Hūna ū SEEBA ūng'wīla ū Musa, “Nsolage ū Yoshwa, ū ng'witūnja o ng'wa Nuni, ūntūūlīle nkono gwako; nguno ū munhū ng'wenūyo alī na nguzu ja ng'wa Moyo.

¹⁹ Ng'wenhage ūng'wīmīlīje kū būtongi bo ng'wa Elieza ū ngabīji, mu miso ga banhū bose; hūna ūntūūle a ha nīmo gwenūyo mu būtongi wa banhū bose.

²⁰ Ūkūng'winha nag'hwe ū būdūla ūbo ūlīnabo bebe; nang'hwe bayūng'wigwa a Baisilaeli a bose.

²¹ Ūlū alī na mhayo gwa kūbūūja kūlī SEEBA, akūyūgunanhwa na ngabīji Elieza; hū ng'wene akūyūmūūgīja mu nzīla ya Ulimu. Ū wei hamò na a Baisilaeli a bose bakwīta yose kūlwa shilagīlo shakwe; ūlū ūlagīla bafume bakūfuma, ūlū ūlagīla bashoke bakūshoka.”

²² Ū Musa wīta ng'hana gīt'ūmo SEEBA akanagīīlīla; ūnsola ū Yoshwa, ūng'wīmīlīja kū būtongi wa ngabīji Elieza, na a Baisilaeli a bose.

²³ Hūna ūntūūlīla makono gakwe, ūntūūla a ha nīmo gīt'ūmo SEEBA akalagīīlīla mu nzīla yakwe ū Musa.