Kūbala 26 - Bibilia Ilagano Lya Kale 2015

Baisilaeli kūbalwa hangī

¹ Aho lyabīta ī likūla lyenīlo, ū SEEBA ūlūngalūnga nū Musa hamò nū Elieza, ū ng'witūnja wa ngabīji Alooni; ūbawīla gīkī,

² “Babalagi hangī a Baisilaeli, būlī bene mu ng'anda jabo; kwandīja ba myaka makūmi abīlī na kūja kwigūlya. Pye abo badūgije kwingīla ng'wibità lya Baisilaeli lya kūlwa būlūgū.”

³ Ū mu shikū jenījo baalī batūūla ng'hambī mu mbūga ya Moabu, bbihī na mongo gwa Yolodani, bilola na Yeliko, ū nzengo ūyo gwalī ū kū ntambūko gwa mongo. Na lūūlū ū Musa nū ngabīji Elieza būlūngalūnga nabo a Baisilaeli būhaya gīkī,

⁴ “Babalagi pye a bagosha, kwandīja ba myaka makūmi abīlī na kūja kū būtongi, gīt'ūmo SEEBA wanagīīlaga Musa.” A Baisilaeli abo bakīnga mu sī ya Misili baalī aba:

Kūbalwa banhū mu ng'anda

⁵ Ū mu shibyalīlwe sha ng'wa Lubeni, ū ng'witūnja wa kwandya o ng'wa Isilaeli baalīmo: Ba kaya ya ng'wa Hanoki, ba mpanda go ng'wa Hanoki; ba kaya ya ng'wa Palū, ba mpanda go ng'wa Palū.

⁶ Ba kaya ya ng'wa Hezeloni, ba mpanda go ng'wa Hezeloni; ba kaya ya ng'wa Kalīmi, ba mpanda go ng'wa Kalīmi.

⁷ A benaba hū baalī ba kaya ja mu lūganda lwa ng'wa Lubeni. Aho babalwa būshika shihūmbī makūmi anè na shidatū, na magana mpungatī na makūmi adatū.

⁸ Ū ng'witūnja o ng'wa Palū walī Eliabu.

⁹ Ū Eliabu nang'hwe walī na bitūnja ba Namūli, Dasani na Abilamu. A ba Abilamu nū Dasani hū abo baalī bamò ba batongeeji abo bakangomela Musa na Alooni; baalī igele līmò na a balondeeji ba ng'wa Koola, aho bakangomela SEEBA.

¹⁰ A banhū benabo sī īkītandūka yūbamila, pye nū Koola; bangī būbūlagwa moto ūyo gūkabakenaagūla banhū magana abīlī na makūmi atanò (250). A banhū benabo bakabiza būlolelo kūlwa kūbalanga a banhū.

¹¹ Gwike ī kaya ya ng'wa Koola ītashilile pyī ī yose.

¹² Ū mu shibyalīlwe sha ng'wa Simioni, ū kūlondeela kaya jabo baalīmo: Ba kaya ya ng'wa Nemūli, ba mpanda go ng'wa Nemūli ba kaya ya ng'wa Jamini, ba mpanda go ng'wa Jamini; ba kaya ya ng'wa Jakini, ba mpanda go ng'wa Jakini.

¹³ Ba kaya ya ng'wa Zeela, ba mpanda go ng'wa Zeela; ba kaya ya ng'wa Shauli, ba mpanda go ng'wa Shauli.

¹⁴ A benaba hū baalī ba kaya ja mu lūganda lwa ng'wa Simioni. Baalī bagosha shihūmbī makūmi abīlī na shibīlī, na magana abīlī.

¹⁵ Ū mu shibyalīlwe sha ng'wa Gadi, ū kūlondeela kaya jabo baalīmo: Ba kaya ya ng'wa Zefoni, ba mpanda go ng'wa Zefoni; ba kaya ya ng'wa Hagi, ba mpanda go ng'wa Hagi; ba kaya ya ng'wa Shuni, ba mpanda go ng'wa Shuni.

¹⁶ Ba kaya ya ng'wa Ozini, ba mpanda go ng'wa Ozini; ba kaya ya ng'wa Eeli, ba mpanda go ng'wa Eeli.

¹⁷ Ba kaya ya ng'wa Aloodi, ba mpanda go ng'wa Aloodi; ba kaya ya ng'wa Aleeli, ba mpanda go ng'wa Aleeli.

¹⁸ A benaba hū baalī ba kaya ja mu lūganda lwa ng'wa Gadi. Abo bakabalwa baalī shihūmbī makūmi anè, na magana atanò.

¹⁹ Eeli na Onani baalī bitūnja ba ng'wa Yuda, alīyo bakachīla Kanani.

²⁰ Ū mu shibyalīlwe sha ng'wa Yuda, ū kūlondeela kaya jabo baalīmo: Ba kaya ya ng'wa Sheela, ba mpanda go ng'wa Sheela; ba kaya ya ng'wa Pelezi, ba mpanda go ng'wa Pelezi; ba kaya ya ng'wa Zeela, ba mpandū go ng'wa Zeela.

²¹ Ū mu shibyalīlwe sha ng'wa Pelezi baalīmo aba: Ba kaya ya ng'wa Hezeloni, ba mpanda go ng'wa Hezeloni; ba kaya ya ng'wa Hamuli, ba mpanda go ng'wa Hamuli.

²² A benaba baalī ba kaya ja mu lūganda lwa ng'wa Yuda. Abo bakabalwa baalī shihūmbī makūmi mpungatī na shitandatū, na magana atanò.

²³ Ū mu shibyalīlwe sha ng'wa Isakaali, ū kūlondeela kaya jabo baalīmo: Ba kaya ya ng'wa Toola, ba mpanda go ng'wa Toola; ba kaya ya ng'wa Pua, ba mpanda go ng'wa Pua.

²⁴ Ba kaya ya ng'wa Yashubu, ba mpanda go ng'wa Yashubu; ba kaya ya ng'wa Shimuloni, ba mpanda go ng'wa Shimuloni.

²⁵ A benaba baalī ba kaya ja mu lūganda lwa ng'wa Isakaali. Abo bakabalwa baalī banhū shihūmbī makūmi atandatū na shinè, na magana adatū.

²⁶ Ū mu shibyalīlwe sha ng'wa Zabuloni, ū kūlondeela kaya jabo baalīmo: Ba kaya ya ng'wa Seleedi, ba mpanda go ng'wa Seleedi; ba kaya ya ng'wa Eloni, ba mpanda go ng'wa Eloni; ba kaya ya ng'wa Yahileeli, ba mpanda go ng'wa Yahileeli.

²⁷ A benaba baalī ba kaya ja mu lūganda lwa ng'wa Zabuloni. Abo bakabalwa baalī shihūmbī makūmi atandatū, na magana atanò.

²⁸ A ba shibyalīlwe sha ng'wa Yosefu, ū kūlondeela kaya jabo baabalagwa kūbītīla mulī Manase na Efulaimu; baalīmo aba:

²⁹ Ū mu shibyalīlwe sha ng'wa Manase baalīmo: Ba kaya ya ng'wa Makili, ba mpanda go ng'wa Makili (ū Makili walī ise o ng'wa Gileadi). Ba kaya ya ng'wa Gileadi, ba mpanda go ng'wa Gileadi.

³⁰ Ū mu shibyalīlwe sha ng'wa Gileadi, baalīmo: Ba kaya ya ng'wa Yezeli, ba mpanda go ng'wa Yezeli; ba kaya ya ng'wa Heleki, ba mpanda go ng'wa Heleki.

³¹ Ba kaya ya ng'wa Asilieli, ba mpanda go ng'wa Asilieli; ba kaya ya ng'wa Shekemu, ba mpanda go ng'wa Shekemu.

³² Ba kaya ya ng'wa Shemida, ba mpanda go ng'wa Shemida; ba kaya ya ng'wa Hefa, ba mpanda go ng'wa Hefa.

³³ Ū ng'witūnja o ng'wa Hefa witanagwa Zelofehadi, ū ng'wene atapandīkile bitūnja. Walī na bashīke dūhū, a mina gabo bitanagwa, Mahala, Noa, Hogla, Milika, na Tīzīlas.

³⁴ A benaba baalī ba kaya ja mu lūganda lwa ng'wa Manase. Abo bakabalwa bakashika shihūmbī makūmi atanò na shibīlī, na magana mpungatī.

³⁵ Ū mu shibyalīlwe sha ng'wa Efulaimu, ū kūlondeela kaya jabo baalīmo: Ba kaya ya ng'wa Shūtela, ba mpanda go ng'wa Shūtela; ba kaya ya ng'wa Bekeli, ba mpanda go ng'wa Bekeli; ba kaya ya ng'wa Tahani, ba mpanda gwa Tahani.

³⁶ Ū mu shibyalīlwe sha ng'wa Shūtela baalīmo: Ba kaya ya ng'wa Elani, ba mpanda go ng'wa Elani.

³⁷ A benaba baalī ba kaya ja mu lūganda lwa ng'wa Efulaimu. Abo bakabalwa bakashika shihūmbī makūmi adatū na shibīlī, na magana atanò. Pye a benaba baalī ba kaya ja mu lūganda lo Yosefu, ū kūlondeela kaya jabo.

³⁸ Ū mu shibyalīlwe sha ng'wa Benjamini, ū kūlondeela kaya jabo baalīmo: Ba kaya ya ng'wa Bela, ba mpanda go ng'wa Bela; ba kaya ya ng'wa Ashibeli, ba mpanda go ng'wa Ashibeli; ba kaya ya ng'wa Ahilamu, ba mpanda go ng'wa Ahilamu.

³⁹ Ba kaya ya ng'wa Shufamu, ba mpanda go ng'wa Shufamu; ba kaya ya ng'wa Hufamu, ba mpanda go ng'wa Hufamu.

⁴⁰ Ū mu shibyalīlwe sha ng'wa Bela kūbītīla mulī Alidi na Naamani baalīmo aba: Ba kaya ya ng'wa Alidi, ba mpanda go ng'wa Alidi; ba kaya ya ng'wa Naamani, ba mpanda go ng'wa Naamani.

⁴¹ A benaba baalī ba kūfuma mu kaya ja lūganda lwa ng'wa Benjamini. Abo bakabalwa baalī shihūmbī makūmi anè na shitanò, na magana atandatū.

⁴² Ū mu shibyalīlwe sha ng'wa Dani, ū kūlondeela kaya jabo baalīmo: Ba kaya ya ng'wa Shuhamu, ba mpanda go ng'wa Shuhamu. A benaba baalī ba kūfuma mu kaya ja lūganda lwa ng'wa Dani.

⁴³ A bose baalī ba mpanda go ng'wa Shuhamu. A bose abo bakabalwa baalī shihūmbī makūmi atandatū na shinè, na magana anè.

⁴⁴ Ū mu shibyalīlwe sha ng'wa Asheli, ū kūlondeela kaya jabo baalīmo: Ba kaya ya ng'wa Imna, ba mpanda go ng'wa Imna; ba kaya ya ng'wa Ishivi, ba mpanda go ng'wa Ishivi; ba kaya ya ng'wa Beliya, ba mpanda go ng'wa Beliya.

⁴⁵ Ū mu shibyalīlwe sha ng'wa Beliya, baalīmo: Ba kaya ya ng'wa Hebeeli, ba mpanda go ng'wa Hebeeli; ba kaya ya ng'wa Malikieli, ba mpanda go ng'wa Malikieli.

⁴⁶ Ū Asheli walī na shīke wakwe witanagwa Seela.

⁴⁷ A benaba baalī ba kūfuma mu kaya ja lūganda lwa ng'wa Asheli. Abo bakabalwa baalī shihūmbī makūmi atanò na shidatū, na magana anè.

⁴⁸ Ū mu shibyalīlwe sha ng'wa Nafutali, ū kūlondeela kaya jabo baalī: Ba kaya ya ng'wa Yahazeeli, ba mpanda go ng'wa Yahazeeli; ba kaya ya ng'wa Guni, ba mpanda go ng'wa Guni.

⁴⁹ Ba kaya ya ng'wa Yezeeli, ba mpanda go ng'wa Yezeeli; ba kaya ya ng'wa Shilemu, ba mpanda go ng'wa Shilemu.

⁵⁰ A benaba baalī ba kūfuma mu kaya ja lūganda lwa ng'wa Nafutali. Abo bakabalwa baalī shihūmbī makūmi anè na shitanò, na magana anè.

⁵¹ A bagosha a bose Baisilaeli, baalī shihūmbī magana atandatū na umò, na magana mpungatī na makūmi adatū.

Kūgabanhyiwa kwa sī

⁵² Ū SEEBA ūng'wīla ū Musa gīkī,

⁵³ “Būlī bene bakūtīnīlwa sī yabo kūlenganīla na wingī wa mina ga banhū, ībize wingīji wabo.

⁵⁴ Ūlū bingī a banhū, nī sī bapandīke nhaale, a bageehu nabo basole ndo. Būlī beena bakwanukūla ū wingīji wabo, kūlenganīla na a babo bandīkagwa.

⁵⁵ Alīyo shiigelile ī sī īgabanhyiwe mu kwesa mbale; bakūyūpandīka ū wingīji wabo kūlondeela mina ga bakūlūgenji ba ng'anda jabo.

⁵⁶ Ū wingīji būkūgabanhyiwa kū ng'anda jose, nhaale na ndo kūlenganīla na kagwīle ka mbale.”

Kūbalwa kwa Balawī

⁵⁷ A Balawī abo bakabalwa, ū kūlondeela numba jabo baalī aba: Ba numba ya ng'wa Gelishomu, ba mpanda go ng'wa Gelishomu; ba numba ya ng'wa Kohati, ba mpanda go ng'wa Kohati; ba numba ya ng'wa Melali, ba mpanda go ng'wa Melali.

⁵⁸ Na a baaba baalī ba mu kaya ja Balawī: Ba mpanda go ng'wa Libīni, ba mpanda go ng'wa Hebuloni, ba mpanda go ng'wa Mahili, ba mpanda go ng'wa Mushi, ba mpanda go ng'wa Koola, Ū Kohati hū walī nkūlūgenjiwabo ng'wa Amulamu.

⁵⁹ Ī lina lya nke o ng'wa Amulamu lyalī Yokebedi, wa shibyalīlwe sha ng'wa Lawī; walī wabyalīlwa mu sī ya Misili. Ū nkīma ng'wenūyo akamyalīla ū Amulamu ba Alooni na Musa, nū ilūmbū lyabo ū Miliamu.

⁶⁰ Ū Alooni walī ise wa ba Nadabu, Abihu, Elieza na Itamaali.

⁶¹ Alīyo a ba Nadabu nū Abihu bakacha kūlwa nguno bakatūmamīla moto ngeni, kūfunya shakwinha kū būtongi bo ng'wa SEEBA.

⁶² A Balawī a bagosha pye bakabalwa, kwandīja ba ng'weji gūmò kūja kū būtongi, būshika shihūmbī makūmi abīlī na shidatū. A bene batabalilwe ū ng'wisaabu lya Baisilaeli a bangī, nguno a boi batanukūlile wingīji hamò nabo.

⁶³ A benaba hū bene abo bakabalwa na Musa hamò na ngabīji Elieza, aho baababalaga a Baisilaeli balī mu mbūga ya Moabu, ikanza lyene bapangile bbihī na mongo gwa Yolodani bilola na Yeliko ū nzengo ūyo gwalī ū kū ntambūko gwa mongo.

⁶⁴ Ū mu benaba walī atīmo nūūlū ūmò ū mu bose abo baalī baabalwa na Musa hamò na Alooni aho baalī bataalī ng'witogolo lya Sinai.

⁶⁵ Nguno ū SEEBA walī wabawīla a Baisilaeli benabo gīkī bakūshila kūcha balī ng'witogolo. Na ng'hana atasaagile nūūlū ūmò wabo, ūlū atī Kelebu ng'witūnja o ng'wa Yefune, na Yoshwa ng'witūnja o ng'wa Nuni dūhū.