Kūbala 25 - Bibilia Ilagano Lya Kale 2015

Baisilaeli kūgwa mu būkenaagūji

¹ A Baisilaeli aho balī Shitimu, a bagosha bandya būjingi na bakīma ba Bamoabu.

² A bakīma benabo bakayūbaduta kūja kūlya shigukulu sha shikolo shafunyiagwa shitambò kū bamulungu babo. Bakayūja baakalya, kwimanīla bandya na kūyūbalamya a bamulungu benabo.

³ A Baisilaeli bisangīja mu būlamya, wa kūnamya mulungu wa Bamoabu witanagwa Baali-peoli. Ū mhayo gwenūyo gūkampelanya ū SEEBA, ūbapelanīla no.

⁴ Na lūūlū ū SEEBA ūng'wīla ū Musa, “Pye a batongeeji ba banhū benaba basolage ūbabūlage, ūbaningeleje kū būtongi bo ng'wa SEEBA; ū mu gīko būkūshila ū būpelanu bo ng'wa SEEBA, būbīngīle a Baisilaeli.”

⁵ Hūna ū Musa ūbawīla a balamuji ba banhū, “Būlī ūmò wing'we ababūlage abo bisangīgije mu būlamya wa kūnamya Baali-peoli.”

⁶ Kwimanīla ngosha ūmò Ng'wisilaeli wenha nkīma, ūmò wa Bamidiani; ūng'wingīja mu numba ya ng'wawe, hape hape kū būtongi bo ng'wa Musa. Nī libità ī lyose līlolile; nīyo pye a banhū baalī kū būtongi w'iheema lya kwibilingīla bakūlīlaga!

⁷ Walīho Finehasi, ng'witūnja o ng'wa Elieza, ng'witūnja wa ngabīji Alooni. Ū sūmba ng'wenūyo aho wagūbona ū mhayo gwenūyo wīnga a ha libilinga, ūsola ichimu mu nkono;

⁸ ūnlondeela ū Ng'wisilaeli ng'wenūyo ū ng'wiheema. Ūshikīla kūlīponeja ī lichimu, ūbatūnganīja būbīlī wabo, ū ngosha ū Ng'wisilaeli, nū nkīma ū muna Midiani. Hūna ī likūla lyooya, booya ū kūcha a Baisilaeli.

⁹ Alīyo abo bakacha ū ng'wikūla lyenīlo baalī shihūmbī makūmi abīlī na shinè.

¹⁰ Ū SEEBA ūng'wīla ū Musa gīkī,

¹¹ “Ū Finehasi ū ng'witūnja o ng'wa Elieza, ng'witūnja wa ngabīji Alooni wabūnyama ū būpelanu wane ū kū Baisilaeli, natizūbamala kūlwa nguno ya wilu wane. Wīta wilu gītūbo nalī nabo nene ha gatī gatī yabo kūlwa nguno y'ikūjo lyane.

¹² Na lūūlū ng'wīlage gīkī, nalībeeja ilagane lyane lya mhola a ha gatī yane nū wei.

¹³ Ū wei nī shibyalīlwe shakwe bakūbiza n'ilagane lya būgabīji wa kūshinga shikū ja būja na būja; nguno walī wīta wil'kūlwa ikūjo lya ng'wa Mulungu wakwe, ūbīītīla isangī a Baisilaeli.”

¹⁴ Ī lina lya Ng'wisilaeli ūyo akabūlagwa hamò na nkīma wa Bamidiani walī Zimli ng'witūnja o ng'wa Salū, ūmò wa batongeeji mu lūganda lo Simioni.

¹⁵ Ī lina lya nkīma ū muna Midiani ūyo akabūlagwa walī Kozibi, nshīke o ng'wa Zulu, nsugi wa mu lūganda lūmò lwa Bamidiani.

¹⁶ Ū SEEBA ūng'wīla ū Musa gīkī,

¹⁷ “Bakalaganagi gete a Bamidiani, a benabo banishi bing'we; babūlagagi.

¹⁸ Nguno bang'wītīlile masala būmugwasha, būmudutīla mu kalamīje kabo, ūmo yaīlile mihayo ya Peoli; na mu mihayo gītī ya ng'wa Kozibi, ū nshīke wa nsugi ūmò wa Bamidiani, ū nkīma ūyo walī wabūlagilwe ng'wikanza ly'ikūla īlo līkamugwīla kūlwa mihayo ya Peoli.”