Kūbala 23 - Bibilia Ilagano Lya Kale 2015

Balaamu kūbafuuha Baisilaeli

¹ Ū Balaamu ūhaya, “Nizengelage myalīlo mpungatī aha, ūnipandīkīle na nzagamba mpungatī ja shitambò, hamò na ng'ondi mpungatī.”

² Ū Balaaki wīta gīt'ūmo akawīlīlwa nū Balaamu; hūna ū būbīlī wabo būfunya shitambò sha nzagamba na ng'ondi būlī ha ng'walīlo gwene.

³ Hanuma ū Balaamu ūng'wīla ū Balaaki, “Ikalaga henaha bbihī nī shitambò shako, naje ha mhūjo ho hado; hamo ū SEEBA akwiza kūhooya hamò nane. Mhayo gose gose ūyo alanoolekeje nakwiza nakūwīle.” Ng'hana ūja kwipandī lya iyene, ha kagūlya.

⁴ Ū Mulungu ūhooya nang'hwe hoi a henaho; ū Balaamu ūhaya, “Nabeejaga myalīlo mpungatī, na būlī ha ng'walīlo gwene nafunyaga nzagamba na ng'ondi kūlwa shitambò.”

⁵ Hūna ū SEEBA ūtūūla mhayo ū mu nomo go ng'wa Balaamu; ūhaya, “Shokaga ū kūlī Balaaki ūkang'wīnhe ī mihayo īyī.”

⁶ Ūshoka ng'hana ū kūlī Balaaki, ūnsanga wīmīīlaga hihī nī shitambò shakwe, hamò na a bana ng'oma ba Moabu.

⁷ Hūna ū Balaamu ūyomba ū mhayo ūyū alīhaya gīkī, “Ū Balaaki wanenhaga kūfuma Alaamu, ū ntemi wa Moabu wanīnjaga kū ngūlū ja kīya. Wanitanaga alīhaya, ‘Nzūgū ūnizumīle ū Yakobo; wize ūndūkagūle ū Isilaeli.’

⁸ Nakūdūla kinehe ū kūnzūma ūyo atazumilwe na Mulungu? Nakūdūla kinehe ū kūndūka ūyo atadūkilwe na Mulungu?

⁹ Nalīnoleela kūfuma mu ngūlū; nalīmona kūfuma kwigūlya ya ngūlū. A benabo balī banhū ba kwikala iyene gīko; batibalaga kūbiza na būsangī na mahanga gangī.

¹⁰ Nani adūgije kūlwisaaba ū lūbuubu lwa ng'wa Yakobo? Nūūlū ū wa kūbūbala dūhū ū būshiigo o ng'wa Isilaeli? Leke nache lūfu lwa ntūngīlīja, Ī ng'halīlo yane ībize gīt'ūmo īlī ya batūngīlīja.”

¹¹ Ū Balaaki ūng'wīla ū Balaamu, “Bebe wīta mhayo kī lūūlū ū gwenūyū? Ū nene naakwenhile kwiza kūnizumīla banishi bane, alīyo ndūhū ūyo wīta, ūlū ītī kūbafuuha dūhū!”

¹² Nang'hwe ūhaya, “Ītaniigeleelilwe kūgelela kūhaya dūhū īyo SEEBA watūūlaga mu nomo gwane?”

Balaamu na ja kabīlī

¹³ Hūna ū Balaaki ūng'wīla, “Tūjage na kwipandī līngī lūūlū ūko ūdūgije kūbabona; a hene ūtūbabona a bose, ūkūbabona bageehu babo dūhū. Na lūūlū ū kūfuma ū kwenūko ūnizumīle a banhū benabo.”

¹⁴ Hūna ūntwala kwilaale lya ng'wa Zofimu, būūkashika kū lūgūlū lwa Pisiga. Ūzenga myalīlo mpungatī, ūfunya na shitambò sha nzagamba na ng'ondi būlī ha ng'walīlo gwene.

¹⁵ Ū Balaamu ūng'wīla ū Balaaki, “Ikalaga henaha bbihī nī shitambò shako, naje ha mhūjo aho nakahooye na SEEBA.”

¹⁶ Ū SEEBA ūhooya nū Balaamu, ūtūūla mhayo ū mu nomo gwakwe; ūng'wīla, “Shokaga ū kūlī Balaaki ūkang'winhe ū mhayo ūyū.”

¹⁷ Ūshoka ng'hana ū kūlī Balaaki, ūnsanga wīmīīlaga hihī nī shitambò shakwe, hamò na a bana ng'oma ba Moabu. Ū Balaki ūmūūja, “Wahaya kinehe ū SEEBA?”

¹⁸ Ū Balaamu ūng'wīla ī mihayo īyī, “Balaaki būkaga ūdegeleke; nidegelekage ng'witūnja o ng'wa Zipooli.

¹⁹ Gīkī, ū Mulungu atī munhū kūshisha nose aloma lome; atī ng'witūnja o ng'wa mbatī, gīkī nose agalūche maganiko. Ī gīsī atayombaga hūna wīta? Atafunyaga kwisagīja washikīlīja?

²⁰ Nanukūlaga shilagīlo sha kūfuuha; wamalaga kwinha mbango, natī na mhayo gwa kūgalūcha!

²¹ Ū wei ataalī kūbona būkenaagūji ū mulī Yakobo; lītaalī kwilonga iyanga ū mulī Isilaeli. Ū SEEBA Mulungu wabo alī hamò nabo, Ūyo alī hamò nabo, ng'wene Ntemi w'ilaka lya būdūla.

²² Ū mu sī ya Misili akabīnja mo Mulungu, a banhū benabo balī na nguzu no, gītī ja mbogo.

²³ Ū Yakobo atī wa kūchaang'wa balogi, nūūlū bachūūja batūdūla ū kūnkenaagūja īyo ahelelilwe. Kwandīja haha a banhū bakūng'haya ū Isilaeli; bakwiwīla ī ya ng'wa Yakobo bakūhayaga gīkī, ‘Mulībona ūmo wītīlile ū Mulungu!’

²⁴ A benabo banhū bangī nabo, bakabūūkaga gītī shimba ng'hīma; balī na kazanzamukīle gītī ka shimba, Īyo ītalembeelaga kūshisha īlyī īsho yadimaga; kūshisha īgalambe pye a mininga ga shisho shadimagwa.”

Balaamu na ja kadatū

²⁵ Ū Balaaki ūng'wīla ū Balaamu, “Hambū hambū lekaga dūhū lūūlū ū kūbazuma, pye nū kūbafuuha ī ūleke!”

²⁶ Ū Balaamu ūnshokeja ūng'wīla, “Natakūmanije gīkī shiigelile nīīte ūmo SEEBA alahayīle?”

²⁷ Ū Balaaki ūng'wīla hangī, “Ī gete nzūgū nakūtwale na kūūnū, hamo ū SEEBA akūkūzunīlaja nose, ūnizumīle a banhū benaba ūlī kwenūko!”

²⁸ Ū Balaaki ūntwala ū Balaamu kwigūlya ya lūgūlū lwa Peoli, ūko baalī badūgije kūlola ū kū sīlīlī būlībona pyī ī litogolo.

²⁹ Hūna ū Balaamu ūng'wīla, “Nizengelage hangī myalīlo mpungatī a henaha, ūnilonjalongeje na nzagamba mpungatī, na ng'ondi mpungatī.”

³⁰ Ū Balaaki wīta ūmo akawīlwa nū Balaamu, ūfunya shitambò sha nzagamba būlī ha ng'walīlo gwene.