Kūbala 22 - Bibilia Ilagano Lya Kale 2015

Balaka kūbogoha Baisilaeli

¹ Ū kwīnga a henaho a Baisilaeli būsegeja na kūngī, būshika kū sī ya Moabu, būtūūla ng'hambī yabo bbihī na mongo gwa Yolodani, ū kū ntambūko gwalīho nzengo gwa Yeliko.

² Walīho Balaaki ng'witūnja o ng'wa Zipooli, walī wībona pyī īyo Baisilaeli baalī babīītīla a Baamoli.

³ A Bamoabu baalī bogoha kīngī nasho, nguno a Baisilaeli baalī bingī no; nīyo a Bamoabu badetemaga dūhū bagayiagwa ū gwa kūbīītīla a Baisilaeli.

⁴ Na lūūlū a Bamoabu benabo būlūngalūnga na banhū balebe, bataale ba mu sī ya Midiani būbawīla, “Bing'we bababa, ī libità lya banhū lyenīlī līkūpyagūlīja pye gete ī shikolo īsho shilīmo ū mu sī jise jenīji, gīt'ūmo ng'ombe īkapyagūlīlaga maswa kū madīīmīlo.” Ū Balaaki ū ng'witūnja o ng'wa Zipooli hū walī ntemi wa Moabu ī shikū jenījo.

⁵ Na lūūlū ūtūma banhū kūjūng'witana Balaamu ng'witūnja o ng'wa Peoli; būshika ū kū sī yakwe, wikalaga Petooli bbihī na mongo. Ū Balaaki walī wabatūma alīhaya gīkī. “Bizile banhū bingī no kūfuma Misili, būhī na būhī wa banhū! Bīkundīkīgije pye gete ī sī; alīyo hū baapangile hihī nī sī yane.

⁶ Alilūūlū, nalīkūlomba wize ūbazume a banhū benaba, nguno balī na nguzu no; ū nene natī na būdūlū wa kūbīītīla mhayo gose gose. Hamo hū nakūdūla ū kūbapyena, nabapeeje ū mu sī yenīyī bīnge. Nguno namanile gīkī abo ūkabafuuhaga ū bebe bakapandīka mbango, na a babo ūkabazumaga bakagwīlagwa izumo.”

⁷ Na lūūlū a banamhala ba Moabu na a ba Midiani būja, būsola nī mheela ya kūfunya kūlwa būchūūja. Aho bashika ū kūlī Balaamu, būng'wīla īyo baalī bawīlwa nū Balaaki.

⁸ Nang'hwe ūbawīla, “Laalagi henaha ū būjikū wa lelo, nakūng'wenhela ū mhayo ūyo alaninhe ū SEEBA.” Ng'hana a bana ng'oma ba Moabu būlaala henaho.

⁹ Ū Mulungu wiza alīmūūja ū Balaamu, “A banhū abo balī ha ng'wako benaba, ba nani?”

¹⁰ Ū Balaamu ūnshokeja ū Mulungu ūhaya, “Balaaki ng'witūnja o ng'wa Zipooli wabatūmaga kūnenhela mhayo; balīhaya gīkī,

¹¹ ‘Bizile banhū kūfuma Missili, bingī no bīkundīkīgije pyī ī sī. Nzūgū ūbazume kūlwa nguno yane, hamo a henaho hū nakūbiza na būdūla wa kūlwa nabo nabapyene nabapeeje banīngīle.’”

¹² Alīyo ū Mulungu ūng'wīla ū Balaamu, “Ūtizūja nabo; yaya nū kūbazuma a banhū benabo, nguno a boi bafuuhilwe.”

¹³ A hantondo yaho, ū Balaamu ūmisha ūbawīla a bana ng'oma ba ng'wa Balaaki, “Bing'we jagi kū sī ying'we, nguno ū SEEBA wanilemejaga ū nene ū kūja hamò ning'we.”

¹⁴ Ng'hana a bana ng'oma ba Moabu būshoka ū kūlī Balaaki, būkang'wīla, “Ū Balaamu walemaga ū kwiza hamò nise.”

Mulungu kūnzunīlī Balaamu kūja

¹⁵ Ū Balaaki ūtūma bana ng'oma bangī, leelo a bene bingī kūtinda, nīyo bakūjiwa kūbaheeba a ba kwandya.

¹⁶ Aho bashika ū kūlī Balaamu būsomboola balīhaya, “Ū Balaaki ng'wana Zipooli alīhaya gīkī, Ūtizūūchaang'wa na mhayo gose gose, ūkaleka ū kwiza ū kūlī nene.

¹⁷ Nguno nakūkwinha mheela yawiza no; nīyo nakūkwītīla būlī mhayo ūyo ūlagūlombe. Bebe nzūgū dūhū ūbazume a banhū benaba.”

¹⁸ Alīyo ū Balaamu ūshosha alīhaya, “Ū Balaaki nūūlū akaninha ī numba yakwe y'ikūlū yokalile pa hela na zahabu, natīīko kwīta mhayo gose gose ūyo gūlī hanze ya shilagīlo sha ng'wa SEEBA Mulungu wane, nūūlū gūkabiza ntaale nūūlū ndo.

¹⁹ Alilūūlū, ning'we ikalagi aha ū būjikū wa lelo, gīt'ūmo bakīītīla a biching'wi. Nane nakūlola hangī ūmo alīniwīlīle ū SEEBA.”

²⁰ Ū būjikū wenūbo ū Mulungu wiza ū kūlī Balaamu, ūng'wīla gīkī, “Īkī bizaga a banhū benaba kūkwitana, jaga nabo; alīyo jaga ūkīīte ūmo nalīkūwīlīla dūhū.”

Balaamu kūyombiwa nzobe

²¹ Ū Balaamu aho wabūūka ī dilū ūtūūla liigasījo a ha nzobe yakwe, hūna ūbalondeela a bana ng'oma ba Moabu.

²² Ū Balaamu ūdamhīla nzobe yakwe ūbūūka ajile, hamò na batūmami bakwe babīlī. Alīyo ū Mulungu akasaya no aho wabūūka kūja; malaika o ng'wa SEEBA wīmīīla ū mu nzīla kūnchaama.

²³ Ī nzobe yakwe aho yamona ū malaika o ng'wa SEEBA wīmīīlaga ū mu nzīla alī na līlūshū līsopoolile ū mu shilaalo shalyo, yūgalūka yīnga ū mu nzīla yūbīta chawī. Ū Balaamu wītūla alīyīshosha ū mu nzīla.

²⁴ Ū malaika o ng'wa SEEBA ūsegeja ūja ha būtongi, ūkīmīīla hangī ū mu nzīla; lelo ha pine, ha gatī gatī ya migūnda ībīlī ya mizabinu, ī nzīla yūtingatwa ndugu būlī kwene.

²⁵ Ī nzobe aho yamona ū malaika o ng'wa SEEBA, yihadīkīja yūūbīta īlikilimbīja ū kū ndugu; ū Balaamu yūnkuluusūla ha ndugu ū gūgūlū, wītūla hangī.

²⁶ Ū malaika o ng'wa SEEBA ūja hangī ūkīmīīla h'ipandī līngī, lelo ipine lītī na ng'wanya gwa kūgalūka kūja kū būlyo nūūlū kū lūmoso.

²⁷ Ī nzobe yenīyo aho yamona ū malaika o ng'wa SEEBA, yūlaala hasī, ū Balaamu īdamhīlile gīko. Akapelana no, wītūla na nang'ha gwakwe.

²⁸ Hūna ū SEEBA ūyinha būdūla wa kūlūngalūnga ī nzobe yenīyo, yūnyombya ū Balaamu īlīmūūja, “Naakūkenyaga kī nose washisha ng'hangala idatū ūlīnitūla gīkī?”

²⁹ Nang'hwe ū Balaamu wīshokeja ī nzobe alīhaya, “Angū wanigemaga nyahala no ī lelo, nīyo ūlū ni nalī na lūshū mu nkono, ni naakūbūlaga ī haha yenīyī!”

³⁰ Nayo ī nzobe yūnshokeja ū Balaamu īlīhaya, “Ū nene natī nzobe yako īyo ūkadamhīlaga shikū jose kūshisha leelo īyī? Ī gīsī wanibona naakwītīlaga mhayo gūlī gīkī na kamò?” Nang'hwe ūshosha, “Yaya!”

Malaika kūng'hūgūla Balaamu

³¹ Hūna ū SEEBA ūgakundūlīla na a miso ga ng'wa Balaamu, ūmona ū malaika o ng'wa SEEBA īmīīlile ū mu nzīla nī līlūshū lyakwe alīsopoolile ū mu shilaalo shalyo. A henaho ūgwa achimīgije hasī ū būshū.

³² Ū malaika o ng'wa SEEBA ūmūūja, “Nibūlī nose washisha ng'hangala idatū, ūlīyītūla ī nzobe yako? Ū nene nizaga kūkūhangīja.

³³ Nguno ū lūgendo lwako lūtī lwawiza ū kū būtongi wane! Ī nzobe yashisha ng'hangala idatū īlīniiliga nguno yanibonaga, nīyo ūlū ni ītītile gīko ī haha ni namalaga kūkūbūlaga, ī yoi ni nīlekaga mhanga!”

³⁴ Ū Balaamu ūng'wīla ū malaika o ng'wa SEEBA, “Naahūbaga; naalī natamanile gīkī walī wīmīīlaga ū mu nzīla kūnihangīja. Na lūūlū īhaha ūlū ūtūtogagwa naje, leka nashoke.”

³⁵ Ū malaika o ng'wa SEEBA ūng'wīla, “Jaga nabo a banhū benaba, alīyo īyo nalakūwīle hū yene īyo ūkūyomba dūhū.” Na lūūlū ū Balaamu ūja nabo ng'hana a bana ng'oma ba ng'wa Balaaki.

Balaamu kūngeniha Balaaki

³⁶ Ū Balaaki aho wigwa gīkī aliza ū Balaamu, ūja kū nzengo gūmò gwaho gwa mu Moabu, kūnsūng'wanhīla kwenūko; gwalī hihī na mongo gwa Alinoni, kūūko na lūbīmbī lwa sī yakwe.

³⁷ Ū Balaaki ūng'wīla ū Balaamu, “Natatūmile banhū bize bakūwīle wangūhe ū kwiza? Hama nibūlī walī wadīīlile gīkī? Ū bebe ūliganika ū nene natadūgije ū kūkwinha mheela yawiza?”

³⁸ Nang'hwe ū Balaamu ūshosha alīhaya, “Ūūyū nashikaga ī haha, alīyo nahene nalī na būdūla wa kūyomba mhayo kī ū nene? Ū mhayo ūyo alagūtūūle ū Mulungu mu nomo gwane hū gwene ūyo nakūgūyomba.”

³⁹ Na lūūlū ū Balaamu ūnondeela ū Balaaki, būja būūkashika Kiliati-huzoti.

⁴⁰ Ū Balaaki ūfunya shitambò sha ng'ombe na ng'holo, ūng'winha nū Balaamu, na a bana ng'oma abo baalī hamò nang'hwe.

⁴¹ Ha ntondo dilū ū Balaaki ūja nang'hwe ū Balaamu ipandī lya Bamoti-baali; aho balī kwenūko ūbaloleela bamò ba Baisilaeli.