Kūbala 20 - Bibilia Ilagano Lya Kale 2015

Minzī kūfuma ng'wiwe

¹ Ū mu ng'weji gwa kabīlī, a Baisilaeli bakashika ng'witogolo lya Zini, bikala ipandī lya Kadeeshi. Aho balī henaho ū Miliamu ūzumalīka ūjīkwa.

² Bahayūgayiwa minzī a banhū, būbikuunūkīla a ba Musa nū Alooni kūbahoogoja mihayo.

³ Bayūduguma balīhaya, “Yalī hambū hambū ūlū nise nitwachīla kū būtongi bo ng'wa SEEBA, aho bakacha a bichiswi!

⁴ Nibūlī mukabenha kū matogolo kūūnū a banhū ba ng'wa SEEBA? Kwiza kūtūbūlaga hamò nī mitugo jise?

⁵ Nibūlī mukatwīnja ī Misili kūtwenha kūūnū kū makoye gīkī? Ū kūūnū ndūhū na būsīga nūūlū mizeituni, nūūlū migūnda ya mizabibu; ndūhū nūūlū kī, nūūlū mitī ya makomamanga ītīho; na a minzī ga kūng'wa na a gene gatīho!”

⁶ Ū Musa nū Alooni bīnga a hibità lya banhū, būja kū nyango gwa iheema lya kwibilingīla, būūkagwa bachimīgije ū būshū hasī. Hūna ī likūjo lya ng'wa SEEBA lyiyoolecha.

⁷ Ū SEEBA ūng'wīla ū Musa gīkī,

⁸ “Gūsolage ū nang'ha, hūna ū bebe nū nkūlūyo ū Alooni mubakūminge hamò a banhū; hanuma ūshiyombye ī shiganga īsho, shipuumunhe a minzī gasho balolile. Gakwigela minzī kūfuma ū mu shiganga, ūbinhe a banhū, bapandīke sha kūng'wa hamò nī mitugo jabo.

⁹ Na lūūlū ū Musa ūgūsola ū nang'ha, wīnga nago ū kū būtongi bo ng'wa SEEBA gīt'ūmo walī wanagīīlīla.”

¹⁰ Ū Musa nū Alooni būbakuminga a banhū bbihī nī liwe lyenīlo, hūna ū Musa ūbawīla, “Alidegelekagi lūūlū bing'we balema kwigwa; ī gete hamo tūng'winhe minzī kūfuma ū mu shiganga īshi?”

¹¹ Hūna ū Musa ūgūnunja ng'wigūlya ū nkono gwakwe, ūshitūla ī shigana na nang'ha gwakwe ng'hangala ibīlī. Gūūpumunhīka minzī, a banhū būng'wa hamò nī mitugo jabo.

¹² Alīyo ū SEEBA ūbawīla a ba Musa nū Alooni, “A bing'we mutūūlingīja ī libità lyenīlī ū mu sī īyo nalībinha, nguno mutanisanije na kūninha ikūjo ū kū būtongi wa banhū bane a Baisilaeli gīkī nalī ng'wela.”

¹³ A minzī genayo hū gene ayo gaalī ga Meliba, ūko Baisilaeli bakandugumīla SEEBA, nang'hwe wiyoolecha ū kūbo gīkī alī ng'wela.

Baedomu kūbahangīja Baisilaeli

¹⁴ Ū mu shikū jenījo ū Musa ūtūma nhūng'wa kūlī ntemi wa Edomu alīhaya, “A ba numba ya ng'wana wa ng'wing'we Isilaeli balīhaya gīkī, ‘Ū bebe ūgadeebile a makoye ayo gaatūpandīka.

¹⁵ A bakūlūgenji bise bakaja Misili, būūkalobela, tūbiza ba kwenūko myaka mingī. Hanuma ya makanza a bana Misili bandya kūbaluhya a bakūlūgenji bise, pye na a bise.

¹⁶ Alīyo aho twanīlīīla ū SEEBA, ūtwigwa ū mu būlīji wise, ūtūma malaika kwiza kūtwīnja ū mu sī ya Misili. Ī haha tūlī ha Kadeeshi aha, nzengo ūyo gūbīmbīkanilwe nī sī yako.

¹⁷ Tūlīkūlomba ūtūzunīlīje tūbītīle ū mu sī yako. Ū mu migūnda ya shilīwa shako tūtūūbīta mo, nūūlū ū mu migūnda ya mizabibu, nūūlū minzī tūtūūng'wa kūfuma mu lwinzī lwako lose lose. Tūkūbīta ng'wikūūwa dūhū, tūtūūgalūka kūja kū būlyo nūūlū kū lūmoso, kūshisha tūbīte ū mu sī yako.’”

¹⁸ Alīyo a ba numba ya ng'wa Edomu būshosha, “Mutizūgima kūbīta ūmu; ūlū mulagaganīje, tūkūmusanga bo shilanga kwiza kūlwa ning'we dūhū.”

¹⁹ A Baisilaeli bibūūla hangī balīhaya, “A bise tūkūbīta ng'wikūūwa dūhū, nahene ī mitugo jise ūlū jūūng'wa minzī ging'we tūkūmulīpīla; nūūlū a bise benekīlī ūlū tūūgang'wa tūkūlīpa. A bise tūtogilwe kūbīta dūhū bo magūlū, tūtī na gūngī!”

²⁰ Būūshosha hangī balīhaya, “Yaya gete mutizūgema ū kūbīta.” Ī likanza lyenīlo a Baedomu būfuma na ibità itaale no, hangī lya nguzu; būbasanga a Baisilaeli kūjūūlwa nabo būlūgū.

²¹ Na lūūlū īkī a Baedomu bakalema gīkī batizūbīta ū mu sī yabo, a Baisilaeli būgalūka būbīngīla.

Alooni ūcha

²² Ī libità lya Baisilaeli ī lyose lyūbūūka lyīngile ī Kadeeshi, lyūja lyūkashika kū lūgūlū lwa Hooli.

²³ Aho balī ū kū lūgūlū lwa Hooli, a ha lūbīmbī lwa sī ya Baedomu, ū SEEBA ūbawīla a ba Musa nū Alooni gīkī,

²⁴ “Ū Alooni akūtwalwa kū banhū bakwe. Atingīla ū mu sī īyo nalībinha a Baisilaeli, nguno a bose būbīlī wing'we mukaleka ū kwīta īyo naalī naamulagīla kwīta ū kū minzī ga Meliba.

²⁵ Na lūūlū ū bebe nsolage ū Alooni nū ng'witūnja wakwe ū Elieza wize nabo kū lūgūlū lwa Hooli.

²⁶ Ūkūng'wīngīja ū Alooni ī shizwalo shakwe ūnzwalīkīje ng'witūnja wakwe Elieza; nguno ū Alooni akūtwalwa kū banhū bakwe, akūchīla ū kū lūgūlū lwenūlo.”

²⁷ Ū Musa wīta gīt'ūmo SEEBA akanagīīla, būja ū kū lūgūlū lwa Hooli, pye a banhū balolile.

²⁸ Ū Musa ūng'wīngīja ū Alooni ī shizwalo, ūnzwalīkīja ng'witūnja wakwe Elieza. Ū Alooni ūchīla mu lūgūlū ng'wenūmo.

²⁹ Ī libità lya Baisilaeli ī lyose aho baadeeba gīkī ū Alooni wazumalīkaga, ī numba ya ng'wa Isilaeli ī yose īkaanīla ikanza lya shikū makūmi adatū.