Kūbala 15 - Bibilia Ilagano Lya Kale 2015

Shakwinha sha mbika na mbika

¹ Ū SEEBA ūng'wīla ū Musa,

² Lūngalūngaga nabo a Baisilaeli ūbawīle gīkī, “Ūlū ng'wingīla ū mu sī īyo nalīng'winha kūbiza wikalo wing'we,

³ hūna ng'ūhaya kūmfunīja ū SEEBA shitambò sha kūpemva kūfuma mu madaale ga ng'ombe nūūlū ga ng'holo, kūlwa shitambò sha ng'waso gwawiza sha kūnyeja SEEBA; shose shose īsho mulafunye, ni shibizage shakwinha sha kūpemva nūūlū shitambò, shibize shilīfunyiwa kūlwa nguno ya mhayo nebe nūūlū shailīfunyiwa kūlwa wiyaabī, nūūlū kūlwa shigukulu shilebe,

⁴ ūyo alenha shakwinha shakwe īkūng'wigeleelwa kwenha na shakwinha sha būsu ū kūlī SEEBA. Īkūbiza īmò ya ng'wikūmi ya efa ya būsu būnogu būsangije maguta mageehu ga shipimo sha lobo ya hini.

⁵ Būlī ng'holo īyo yūfunyiwa kūlwa shakwinha sha kūpemva nūūlū kūlwa shitambò, mukūbeeja lobo ya hini ya divai, īfunyiwe kūbiza shakwina sha kūng'wiwa.

⁶ Ūlū ng'ondi īlīfunyiwa kūbiza shitambò, mukūbeeja shakwinha sha būsu, ibīlī ja ikūmi ja efa ja būsu būnogu būsangije maguta, ga shipimo sha selusi ya hini,

⁷ na selusi ya hini ya divai kūlwa shakwinha sha kūng'wiwa. Ī shenīshi shifunyagi gītī shakwinha sha ng'waso gwawiza gwa kūnyeja SEEBA.

⁸ Alīyo ūlū ūlīmfunīja SEEBA nzagamba kūbiza shitambò shako sha kūpemva, nūūlū shakwinha, nūūlū shakwinha kūlwa nguno ya mhayo nebe, nūūlū shitambò sha būsangī,

⁹ ūlū ūlīyenha ī nzagamba, enhaga na shakwinha sha būsu, idatū ja ng'wikūmi ja efa ja būsu būnogu būsangije na nusu ya hini ya maguta.

¹⁰ “Ūkwena na nusu ya hini ya divai kūbiza shakwinha sha kūng'wiwa. Ī shenīshi shikūbiza shakwinha sha kūfunyiwa mu nzīla ya moto, shakwinha sha ng'waso gwawiza sha kūnyeja SEEBA.

¹¹ Būlī nzagamba nūūlū ng'ondi, ībize ng'holo nūūlū mbūli, ūlū īlīfunyiwa īkūbeejiwa mu nzīla yenīyī.

¹² Nūūlū jūbiza jilī ningī no, nahene būlī yene shiigelile yītīlwe gīko.

¹³ Pye a Baisilaeli a baana byalwa, būlī ng'wene ūyo wenha shakwinha sha kūbeejiwa mu nzīla ya moto, gīkī shibize shakwinha sha ng'waso gwawiza gwa kūnyeja SEEBA, shing'wigeleelilwe ayīte ī mihayo yenīyī mu gīko.

¹⁴ Hama ū kū shikū ja kū būtongi, ūlū nobeji nūūlū munhū ūngī ose ose ūyo akwikalaga ning'we ūhaya kūfunya shakwinha mu nzīla ya moto kūbiza sha ng'waso gwawiza sha kūnyeja SEEBA, nū ng'wene shing'wigeleelilwe wīte gīt'ūmo mukwītīlaga a bing'we.

¹⁵ Ī shilagīlo īsho shimusugile a bing'we, na a bageni abo bakwikalaga hamò ning'we shibasuge shenīsho; a katongeelele kenaka king'we ka shikū jose nū mu shibyalīlwe īsho shiliza. Ū kū būtongi bo ng'wa SEEBA, a bing'we na a bageni mutikīlile.

¹⁶ Shilagīlo sha mbika īmò na kahelele ka mbika īmò kakūtūmama ū kū bing'we nū kū bageni abo bakwikalaga hamò ning'we.”

¹⁷ Ū SEEBA ūng'wīla ū Musa hangī gīkī,

¹⁸ Lūngalūnga nabo a Baisilaeli ūbawīle, “Ūlū ng'wingīla ū mu sī īyo nalīmutwala,

¹⁹ hūna lyūshika ikanza lya kwandya kūlya ī shilīwa shaamo, funyagi ibbudīka ilebe lībize shakwinha kūlī SEEBA.

²⁰ Ū kūfuma ū mu shilīwa īsho mulagese kwandya ū mu sī yenīyo, beejagi keki mumfunīje SEEBA gītī shakwinha sha kūfuma ha lūbūūga lwa kūtūlīla būsīga wing'we.

²¹ Ū mu shibyalīlwe shing'we ī shose, mukūmfunīja ū SEEBA ī shakwinha shenīshi kūfuma ū mu shakūlya sha kwandya sha mu malaale ging'we.

Shitambo kūlwa būkenaagūji mu būtūūmana

²² “Na lūūlū ūlū ng'ūkenaagūla mu būtūūmana, ng'ūūgwa mu būhūbi wa kūlemeelwa kwīshikīlīja ī mihayo yenīyī, īyo SEEBA wanagīlile Musa,

²³ nūūlū mu shilagīlo shose shose īsho SEEBA wang'winha mu nzīla ya ng'wa Musa kwandīja lwise lwene, aho ū SEEBA akang'winha ī shilagīlo shenīsho gīkī shibize sha kūshinga ho kūshisha kū shibyalīlwe īsho shiliza,

²⁴ ū mhayo gwenūyū ūlū gūbiza gwītagwa mu būtūmana, na a banhū a bose būbiza batadeebile, a henaho pye a banhū bakūsangīla kūfunya nzagamba īmò songi, ya shitambò sha kūpemva, ībize shakwinha sha ng'waso gwawiza kūlī SEEBA. Īkūfunyiwa hamò nī shakwinha shayo ī sha būsu nī sha kūng'wiwa, īsho shihelilwe; hamò na mbūli ng'hosha ya shitambò sha būkenaagūji.

²⁵ Ū ngabīji akūbeeja isangī kūlwa nguno ya Baisilaeli bose, na bakūlekejiwa; nguno ū mhayo gwenūyo gwītwa mu būtūmana; nī shakwinha sha kūfunyiwa kūlwa būhūbi wabo bakūbiza beenhaga ū kūlī SEEBA, būshifunya mu nzīla ya moto, pye nī shitambò sha būkenaagūji bakūbiza baafunyaga.

²⁶ Pye a banhū bakūlekejiwa, a Baisilaeli a bose na a bageni abo bakwikalaga mubo; bakūlekejiwa nguno pye a bose baalī basangīji ū mu būhūbi wa būtūūmana wenūbo.

²⁷ Alīyo ūlū munhū ūmò ūkenaagūla mu būtūmana, akwenha mbūli ng'hīma ya ng'waka gūmò kūlwa nguno ya shitambò sha būkenaagūji.

²⁸ Ū ngabīji akūmeegeja isangī kūlī SEEBA ū ng'hūbi ng'wenūyo, ūyo wakenaagūlile mu būtūmana; na lūūlū ūlū ūmala kūbeegejiwa isangī, akūbiza walekejiagwa.

²⁹ “Ī shilagīlo shenīshi shikūtūmama kū banhū bose abo bakūhūba mu būtūūmana, babize baana byalwa ba mu Isilaeli, nūūlū bageni.

³⁰ Alīyo ū munhū ūlū wīta mhayo gwabūbi bo makaala, ū wa gīko akūbiza wandalahaga SEEBA, abize ng'wana byalwa nūūlū ngeni ū mu sī. Ū ng'wenūyo akūkomanyiwa alekaanyiwe na a banhū bakwe.

³¹ Ū munhū ng'wenūyo shiigelile akomanyiwe wīnjiwe gete ū mu banhū bakwe. Ū būbi wenūbo būkūng'wikalīla, nguno wagūdalahaga ū mhayo go ng'wa SEEBA, ūshikenaagūla nī shilagīlo shakwe.”

Kūbūlagwa kwa nkenaagūji wa sabato

³² A Baisilaeli aho bataalī ng'witogolo, ngosha nebe akabonwa alīsoleela ng'hwi mu lūshikū lwa Sabato.

³³ Abo bakamona alīsoleela ng'hwi bakang'wenha ū kwibità lya Baisilaeli; kūlī Musa na Alooni.

³⁴ Ūtūūlwa ha sīlīlī ya būlang'hani nguno gwalī gūtaalī ū kūmanīīka chiza ūyo shiigelile wītīlwe.

³⁵ Hūna ū SEEBA ūng'wīla ū Musa, “Ū munhū ng'wenūyo shing'wigeleelilwe kūcha. Pye a banhū bakūmfunya hanze ya ng'hambī bakamponde mawe kūshisha ache.”

³⁶ Na ng'hana a banhū būmfunya hanze ya ng'hambī, būkamponda mawe kūshisha ūcha, gīt'ūmo SEEBA walī wanagīīlīla ū Musa.

Masune ga kū shizwalo

³⁷ Ū SEEBA ūng'wīla ū Musa,

³⁸ Lūngalūngaga nabo a Baisilaeli ūbawīle gīkī, “Ū mu shibyalīlwe shing'we īsho shiliza, mukūyūsumīīla masune ū kū mhelo ja shizwalo shing'we. Būlī isune lībize na lūgoye lwa langi ya būlulu.

³⁹ A masune genaya ūlū ng'wagalola gakūyūng'wizūkīja pyī ī shilagīlo sha ng'wa SEEBA; gīkī mushimīzīle musho, mutizūyūjaananījiwa na mihayo yīngī na yīngī īyo mukwībonaga, nūūlū mukūyiganikaga mu ng'holò jing'we.

⁴⁰ Ū mu gīko mukwizūkwa ū kūshimīzīla ū mu shilagalo shane ī shose, na mukūbiza beela kūlī Mulungu wing'we.

⁴¹ Ū nene nalī SEEBA Mulungu wing'we, ūyo akang'wīnja mu sī ya Misili kūbiza Mulungu wing'we. Ū nene nalī SEEBA Mulungu wing'we.”