Kūbala 12 - Bibilia Ilagano Lya Kale 2015

Būdalahi bo ng'wa Miliamu na Alooni

¹ Ū Alooni nū Miliamu bandya kūng'haya kībi ū Musa kūlwa nguno ya nke wakwe īkī walī muna Kushi; nguno ū nkīma ūyo walī wantoola walī muna Kushi.

² Būyūhaya, “Ī gete, ū SEEBA akūyombaga kūbītīla mulī Musa dūhū shi? Ataalī ū kūyomba ū kūbītīla ū mu bise?” Ū SEEBA ūwigwa ū būng'unguuji wenūbo.

³ Alīyo ū munhū ng'wenūyo ū Musa, walī ng'widoohya no, kūtinda pye a banhū ba mu sī.

⁴ Ī likanza lyenīlo ū SEEBA ūbawīla a ba Musa nū Alooni, hamò nū Miliamu, “Nzūgi kūnū kwiheema lya kwibilingila būdatū wing'we.” Na ng'hana būfuma būdatū wabo gīko.

⁵ Hūna ū SEEBA wika mu ng'hīngī yilunde; wīmīīla a ha nyango gwiheema ūbitana a ba Alooni nū Miliamu, būbīlī wabo būja ha būtongi.

⁶ Nang'hwe ūbawīla, īdegelekagi chiza ī mihayo yane: Ūlū ng'hangi alīmo ū mu bing'we, nene SEEBA nakwimanīīcha kūlī we mu nzīla ya kwiyoolecha; nakūyomba na ng'hwe mu nzīla ya shilooti.

⁷ Alīyo ītī gīko ū kūlī ntūmami wane ū Musa; ū ng'wene nsanyiwa gete ū mu numba yane ī yose.

⁸ Ū ng'wenūyo nakayombaga nang'hwe būshū kū būshū; hape hape, ītī mu nzīla ya sumo. Ū wei akalībonaga ī lihanga lya ng'wa SEEBA. Alilūūlū nibūlī ng'walī ng'waleka kūcha minala ū kūng'hoogagūja mihayo ū ntūmami wane ū Musa?

Miliamu kūgwīlwa mbiji

⁹ Bakampelanya no ū SEEBA, wīnga ūbaleka ho.

¹⁰ Ī lilunde aho lyīnga a hiheema, kwimanīla ū Miliamu aho walī wīmīīla, ūgwīlwa mbiji; gūūkuulīka kībi ū mīlī gwakwe. Ū Alooni aho wangalūkīla ūmona alī na mbiji,

¹¹ ūng'wikūmbīlīja ū Musa alīhaya; “Baba ka yaya ūtizūbūdimīīla ū būkenaagūji wise ūbo twakwītīlaga, nguno ya būchilū wise.

¹² Ūtizūneka abize gītī achile; atizūbiza gītī ng'wana wabyalagwa kūfuma mu nda ya ng'wa nina, alīyo ū mīlī gwakwe ng'wila gūbolile!”

¹³ Ū Musa ūnīlīīla ū SEEBA alīhaya, “Mulungu nalīkwikūmbīlīja ūmpīje!”

¹⁴ Nang'hwe ū SEEBA ūhaya, “Ūlū ise ni wanswīlaga mate kū būshū, angū ni atagwīlilwe mhayo gw'igiisha minala shikū mpungatī? Nugalīlagi hanze ya ng'hambī shikū mpungatī, hanuma ya shikū jenījo akūshoshiwa hangī.”

¹⁵ Na lūūlū ū Miliamu ūlugalīlwa hanze ya ng'hambī ikanza lya shikū mpungatī; a banhū batasaamile a ha ng'hambī yenīyo kūshisha ūshoshiwa hangī.

¹⁶ Hanuma ya henaho a banhū bīnga ī Hazelooti, būūkatūūla ng'hambī ng'witogolo lya Palaani.