Kūbala 11 - Bibilia Ilagano Lya Kale 2015

Moto kūfuma kūlī SEEBA

¹ Ū mu shikū jenījo a banhū bandya kūduguma, kūlwa nguno ya makoye ayo gakabagwīla; ū SEEBA ūwigwa ū būdugumi wabo ūsaya no. Moto gwika kūfuma kūlī SEEBA gūūbakenaagūla bamò na bamò abo baalī kū mhelo mhelo ya ng'hambī.

² A banhū būnīlīīla ū Musa, nang'hwe ūnomba ū SEEBA, gūjima ū moto.

³ Na lūūlū ī lipandī lyenīlo litanwa gīkī Tabela, nguno moto gwa kūfuma kūlī SEEBA gūkaligima hagatī gatī yabo.

Eemanu ūmo īlī

⁴ Abo baalī bajananījiwa ū ng'wibità, bandya kūhahaalīla shakūlya sha mbika jingī na jingī. Na a Baisilaeli būtwalanījiwa, nabo bandya hangī kwilīja līja balīhaya, “Yee gītī ūlū ni twayūūpandīka na tūnyama twa kūlya!

⁵ Ī ndīlo ja Misili najo twajikūmbūlile no, nguno ū kwenūko twalūjilyaga ndūhū nūūlū kūjifunīja sabo; būyaga na limbe, ndūūgwa, tigiti, shitūngūlū na shitūngūlū sumu.

⁶ Tūkūbūlagwa namba, ali īkī nduhu shikolo shingī, ūlū ītī eemanu īji dūhū!”

⁷ Ī eemanu jalī jibange gītī mbeke ja būsīga waape, alīyo ūmo jabonelagwa jalī na langi gītī būgondo wa mitī.

⁸ Na lūūlū a banhū bajaga bakūjisoleelaga, hūna baajisha h'iwe, nūūlū baajipūūla ng'witūlī. Hanuma baajizugaga mu nungū nūūlū kūbeeja keki. Ū kūjilya ū mu nomo, jabizaga gītī munhū alīīlya shilīwa shizugīlilwe maguta ga mizeituni.

⁹ Ī eemanu jenījo jiyitaga a ha ng'hambī makanza gaa kūgwa lūme būjikū.

Musa kūnīlīīla SEEBA

¹⁰ Ū Musa ūbigwa pye a banhū bakūlīlaga, būlī bene ha ng'hambī yabo, ūkoya no ū mu ng'holò; ū SEEBA ū ng'wene būmpelanya no.

¹¹ Hūna ū Musa ūng'wīla ū SEEBA, “Nibūlī wang'wītīlile makoye mataale gīkī ū ntūmami wako? Naakūkenije mhayo kī ūyo gwakūsayīkije gīko, nose ūniseseja nene pye a makoye ga banhū benaba?

¹² Ū nene hū nakabatungīla nda a banhū benaba? Nūūlū ū nene hū nalī myaji wabo? Nibūlī ūkūniwīlaga nabalele mu nkono gwane, gītī neji wa ng'wana ng'weleele, nabatwale kū sī īyo bebe ng'wenekīlī wabisagīja bakūlūgenji babo, nīyo ūbilahīlīla, gīkī ūkūbinha?

¹³ Ī gīsī īkī bakwikalaga būnilīlīīla balīhaya, ‘Twinhage nyama ja kūlya’; ū nene nakūjipandīkīla halī ī nyama ja kūbalyisha pye a banhū benaba?

¹⁴ Natūdūla ū kūbabūūcha iyene a banhū a bose aba; ū nigo gūlī ndito no, gūlīnibuna.

¹⁵ Ūlū ūnanukūlile ū miso gako alīyo hangī hū ūlīnīītīla mihayo gītī yenīyī, īlī hambū hambū ūnibūlage wangū kūtinda kūnileka nabūbone ū būbi ūbo būlanigwīle.”

Ishosho lya ng'wa SEEBA

¹⁶ Hūna ū SEEBA ūng'wīla ū Musa, “Nenhelage banahala makūmi mpungatī kūfuma ū mu Baisilaeli, abo ūbamanile gīkī balī batongeeji na bataale ū mu banhū. Bawīlge bize ū kwiheema lya kwibilingīla, bize bimīīle hamò nang'ho koi.

¹⁷ Nakwika nize ho nayombe ning'we, hama ī nguzu ja ng'wa Moyo ījo jilī mulī bebe nakūjisola jimò nabinhe nabo ī nguzu ja ng'wa Moyo. Na lūūlū bakūbiza hamò nang'ho ū mu kūgūbūūcha ū nigo gwa kūbagunanha a banhū, ūtizikala ūgūbūūkije bebe iyene dūhū.”

¹⁸ Bawīlage a banhū, “Būlī ng'wene wiyeeje ng'wenekīlī kūlwa lūshikū lwa ntondo; nguno mukūlya nyama. Ū SEEBA wang'wigwile ūmo mukūlīlīlaga gīkī, ‘Yee gītī ūlū ni twayūūpandīka na tūnyama twa kūlya! Twalī hambū hambū aho twalī Misili!’ Na lūūlū ī haha ū SEEBA akūng'winha nyama ja kūlya.

¹⁹ Mutūūgelela kūjilya lūshikū lūmò dūhū, nūūlū shikū ibīlī nūūlū itanò, nūūlū ikūmi, nūūlū makūmi abīlī dūhū.

²⁰ Alīyo mukūjilya ng'weji ngima, kūshisha jimukole muyūjibbīzūka jafumīla na mu mūūlū ging'we; nguno ng'wanemile ū SEEBA ūyo alī hamò ning'we. Mukwikalaga ng'ūlīla mulīhaya gīkī, ‘Nibūlī tūkīnga ī Misili.’”

²¹ Ū Musa akang'wīla ū SEEBA, Ūlīhaya gīkī, “Nakūbinha nyama ja kūlya kūshisha ng'weji ngima gūshile; alīyo a bagosha dūhū abo badūgije kūshimīza na magūlū gabo bashikile shihūmbī magana atandatū!

²² A bahnhū benaba badūgije kūpandīka nyama ja kūbigela, nūūlū bakasīnzīlwa madaale na madaale ga ng'holo na ga ng'ombe? Nūūlū jikazuwa pyī ī ndīlo ja mu nyanza jikūbigela?”

²³ Nang'hwe ū SEEBA ūnshokeja ū Musa alīhaya, “Bebe ū nkono go ng'wa SEEBA gūlī nguhī no? Ūkwiloleela lūūlū, ūbone ūlū gīkī īyo nalīkūwīla nalīhaya dūhū, nūūlū nakūmushikīlīgīja.”

Banamhala makūmi mpungatī na babīlī

²⁴ Hūna ū Musa ūja ū kū banhū, ūūkabawīla īyo īkahayiwa na SEEBA. Ūsola banamhala makūmi mpugatī kūfuma mubo, wiza wīmīīla nabo kūlīpīndya ī liheema.

²⁵ Na ng'hana ū SEEBA wika mu shiikolile sh'ilunde, hamò na lyochi; ūsola nguzu jimò ja ng'wa Moyo kūfuma a halī Musa, ūbatūūlīla nabo a banamhala abo makūmi mpungatī ī nguzu ja ng'wa Moyo. Aho wabikalīla ū Moyo būhanga ikanza iguhī, gwike batagwītile hangī ū mhayo gwenūyo.

²⁶ Ū kū ng'hambī baalī basaaga bagosha babīlī, mina gabo Elidadi na Medadi; nabo a mina gabo gaalī gandīkwa hamò na a ga bichabo, gwike būleka ū kūja ū kwiheema. Alīyo na a boi akabikalīla ū Moyo, bandya kūhanga aho balī ū kū ng'hambī kwenūko.

²⁷ Ndinha nebe ūpeela ū kūlī Musa ūūkang'wīla, “A ba Elidadi nū Medadi balīhanga ū kū ng'hambī.”

²⁸ Ū Yoshwa, ū ngunanhibo ng'wa Musa kūfuma walūki bokwe ūyomba, “Baba Musa bahamage!”

²⁹ Nang'hwe ū Musa ūshosha alīhaya, “Bebe wanīītīla wilu shi ī gete? Ū nene ī ng'hūmbū jane jilī gīkī pye a banhū ba ng'wa SEEBA babize bahangi, na gīkī ū SEEBA abatūūlīle Moyo wakwe!”

³⁰ Hūna ū Musa na a banhamhala ba Baisilaeli būshoka ū kū ng'hambī.

Mulungu kūtūma nzūūlī

³¹ Kwimanīla ū SEEBA watūma lūyaga, lwiza lūkūlajaga nzūūlī kūfuma kū nyanza. Jiza jūūgwa jiyīpīndīlīgije pyī ī ng'hambī; jūlamatīla a hasī. Jiitūlīīla kūshisha gītī miita īmò ū kūja ū ng'wigūlya; ali ū bū kūle ū kūfuma a ha ng'hambī, pyī ī mhande jose jose, lūgendo lwa kūshimīza lūshikū lūgima.

³² Na lūūlū pye ū lūshikū lwenūlo nū būjikū waho, na a ha ntondo; a banhū baalī hanze bakūsoleelaga nzūūlī dūhū. Walī atīho nūūlū ūmò wa kūsola ha sīlīlī ya madebbe igana. Hūna būjanikīla pye a hose a ha ng'hambī bīpīndīlīja.

³³ Alīyo aho bataalī ū kūjimala ū kūjilya, ū būpelanubo ng'wa SEEBA būbapembekela a banhū, ūbagwisīja ikūla lyabūbi no.

³⁴ Na lūūlū ī lipandī lyenīlo līkitanwa lina lya Kibloti Hataava; nguno a henaho bakabajīīka a banhū abo baalī bikūmva shilīīwa shambika yīngī.

³⁵ A banhū bīnga ī Kibloti Hataava, būshimīza kūja Hazelooti, būūkikala kwenūko.