Kūbala 10 - Bibilia Ilagano Lya Kale 2015

Mhembe nhaale ja feza

¹ Ū SEEBA ūng'wīla ū Musa gīkī,

² “Sulaga mhembe ibīlī ja chūūma sha feza, ja kūyūfuulwa kūlwa kūbitana bikuminge hamò a banhū ū mu ng'hambī, na kūlwa kūbamanīīkīja ūlū lyashika ī likanza lya kūsambūla ng'hambī kwandya lūgendo.

³ Ūlū jūūlījiwa būbīlī wajo, pye a banhū bakwibilinga kū būtongi wako a ha nyango gwa kwingīla ng'wiheema lya kwibilingīla.

⁴ Alīyo ūlū yūūlīla īmò yajo, batongeeji dūhū, a bataale ba ng'anda ja Baisilaeli, hū abo bakwibilinga ū kū būtongi wako.

⁵ Ī mhembe ya kūbakomiga ūlū yūūlīla, a ba ng'hambī ja kū lwande lwa Kīīya bakwandya lūgendo.

⁶ Ūlū yūūlīla ya kabīlī, na a ba kū ng'hambī ja kū lwande lwa Dakama bandya ū lūgendo. Būl'ikanza lya kūhaya kwandya lūgendo īkūyūfuulwa mhembe ya kūbakomiga a banhū.

⁷ Ūlū ūlī na ng'hūmbū ja kūbakuminga pye a banhū, shiigelile jifuulwe ī mhembe, gwike jilīle kalīlīle kangī nako.

⁸ A bagabīji a bitūnja ba ng'wa Alooni hū beene bakūbiza bafuuji baajo ī mhembe jenījo. Ī shenīshi shilī shilagīlo shing'we hamò nī shibyalīlwe īsho shiliza kū būtongi.

⁹ Ūlū yūng'wigeleelwa kwilwisha būlūgū na ng'wanishi wing'we ūyo wizaga mu sī ying'we kūmudumīla, lījagi mhembe. A henaho ū SEEBA Mulungu wing'we akūng'wizūkwa na kūmuguna amupīje ū kū banishi bing'we.

¹⁰ Nū mu makanza ging'we ga būyegi, a ga shigukulu īsho muhelelilwe, hamò na ga kūyegela ng'weji mpya, īng'wigeleelilwe kūfuula mhembe a makanza ga kūfunya shitambò shing'we sha kūpemva na sha būsangī. Ū mu gīko shikūbiza shizūkījo ū kū būtongi bo ng'wa Mulungu wing'we. Ū nene nalī SEEBA Mulungu wing'we.”

Baisilaeli kwīnga Sinai

¹¹ Mu ng'waka gwa kabīlī nū ng'weji gwa kabīlī, mu lūshikū lwa makūmi abīlī ī lilunde lyūbūūka, lyīnga a h'iheema; īlo ū mu gatī yalyo līkikalaga isandīko lya būkaanīji.

¹² Hūna a Baisilaeli bīnga ū ng'witogolo lya Sinai, bandya lūgendo bajile ūko na ūko, nose ī lilunde lyūshika ng'witogolo lya Palani, lyūlembeela ng'wenūmo.

¹³ Ū lwenūūlo lūkabiza lūgendo lwa kwandya ū kūsambūla ī ng'hambī na kwandya kūshimīza, kūlwa kūlagīlwa na SEEBA mu nzīla ya ng'wa Musa.

¹⁴ A mabità ga ng'hambī ya lūganda lwa Yuda h'ayo gūtonga ū kwandya ū lūgendo, ha sīlīlī ya lūbembeela lwabo. Ū ntongeeji wabo walī Naashoni ng'witūnja o ng'wa Aminadabu.

¹⁵ Ū ntaale wa ibità lya lūganda lo Isakaali walī Netaneli ng'witūnja o ng'wa Zuali.

¹⁶ Hama ū ntaale wa ibità lya lūganda lo Zabuloni walī Eliabu ng'witūnja o ng'wa Heloni.

¹⁷ Hanuma ya henaho a ba numba ya ng'wa Gelishomu nī ya ng'wa Melali būlīsambūla ī lipandī lya kwikala būlībūūcha bandya lūgendo.

¹⁸ Hūna a mabità ga ng'hambī ya lūganda lwa Lubeni gūbūūka gajile, nago ha sīlīlī ya lūbembeela lwabo. Ū ntongeeji wabo walī Elizuuli ng'witūnja o ng'wa Shedeuli.

¹⁹ Ū ntaale wa ibità lya lūganda lo Simioni walī Shelumieli ng'witūnja o ng'wa Zulishadai.

²⁰ Ū ntaale wa ibità lya lūganda lo Gadi walī Eliasafu ng'witūnja o ng'wa Deūli.

²¹ Hanuma ya henaho a ba numba ya ng'wa Kohati nabo būbūūka, būshibūūcha ī shikolo ī sheela. Gwalī gūhelilwe gīkī ī lipandī lya kwikala lyīmīīle aho bataalī ū kūshika.

²² Hūna a mabità ga ng'hambī ya lūganda lwa Efulaimu gūūbūūka gajile, nago ha sīlīlī ya lūbembeela lwabo. Ū ntongeeji wabo walī Elishama ng'witūnja o ng'wa Amihudi.

²³ Ū ntaale wa ibità lya lūganda lo Manase walī Gamalieli ng'witūnja o ng'wa Pedazuli.

²⁴ Ū ntaale wa ibità lya lūganda lo Benjamini walī Abidani ng'witūnja o ng'wa Gidioni.

²⁵ Abo bakabiza ba kūmalīīja kūbūūka ū lūgendo, baalī ba ng'hambī ya ng'wa Dani, nabo ha sīlīlī ya lūbembeela lwabo. Ū ntongeeji wabo walī Ahiezeli ng'witūnja o ng'wa Amishadai.

²⁶ Ū ntaale wa ibità lya lūganda lo Asheli walī Pagieli ng'witūnja o ng'wa Okilani.

²⁷ Ū ntaale wa ibità lya lūganda lo Nafutali walī Ahila ng'witūnja o ng'wa Enani.

²⁸ A mabità ga Baisilaeli hū gihelelaga gīko ūlū būbūūka lūgendo.

²⁹ Ī likanza lyenīlo, ū Musa ūhooya na nkweelaye Hobabu, ng'wana Leūli, ūyo walī ise būkwi o ng'wa Musa; ūng'wīla, “Alilūūlū ī haha twabūūka kūja ū kwipandī īlo SEEBA watwisagīja alīhaya gīkī, ‘Nakūng'winha bing'we.’ Nzūgū hamò nise, tūkūja tūkakwītīle yawiza; nguno ū SEEBA wabisagīja mihayo misoga no a Baisilaeli.”

³⁰ Nang'hwe ūshosha, “Yaya natūdūla ū nene ū kūja ū kwenūko, nalīshoka kaya kū banhū bane.”

³¹ Nang'hwe ū Musa ūng'wīla, “Nalīkwikūmbīlīja yaya ūkūtūleka, nguno ūlīmanile ī litogolo lyenīlī, ū bebe hū ūkūbiza miso gise.

³² Ūlū wiza hamò nise, tūkūkwinha nang'ho shose shose ī shawiza īsho alatwinhe ū SEEBA.”

³³ Hūna bīnga a ha lūgūlū lwa ng'wa SEEBA, būshimīza bajile lūgendo lwa shikū idatū. Ū mu shikū īj'idatū jenījo, ī lisandīko lya būkaanījibo ng'wa SEEBA lyalī kū būtongi wabo, kūbakoobela ipandī lya kwifuula.

³⁴ Ī lilunde lya ng'wa SEEBA lyalī a higūlya yabo a makanza ga līīmi ūlū babūūka ū lūgendo kwīnga a ha ng'hambī.

³⁵ Būlī ikanza ūlū lyandya lūgendo ī lisandīko, ū Musa wahayaga, “SEEBA, būkaga! A banishi bako babbalasane; abo bakūkolilwe bapeele nhambo.”

³⁶ Hanuma būlī ikanza ūlū lyūtūūlwa kwifuula, wahayaga gīkī, “Shokaga SEEBA, wize ū kū mashihūmbī na mashihūmbī ga Baiesilaeli.”