Kūbala 1 - Bibilia Ilagano Lya Kale 2015

Banhū kūbalwa

¹ Aho balī ng'witogolo lya Sinai mu ng'waka gwabo gwa kabīlī kūfuma ikanza lya kwīnga Misili, lūshikū lwa kwandya ng'weji gwa kabīlī, ū SEEBA ūlūngalūnga nū Musa ng'wiheema lya kwibilingīla, ūng'wīla gīkī,

² “Babalage pye a Baisilaeli kūlenganīla nū mumo jilī ī ng'anda jabo, nī numba jabo; būlī munhū ūng'wandīke mu lina lyakwe wei ng'wenekīlī.

³ Ū bebe nū Alooni mukūbabala pye a Baisilaeli a bagosha mu mabità gabo, abo bashikile kūja kū būlūgū, kwandīja ba myaka makūmi abīlī na kūja kwigūlya.

⁴ Būlī lūganda ilonge mo ngosha ūmò wa kūmugunanha, na būlī ng'wene abize ntongeeji ū mu numba ya ng'wawe.

⁵ A mina ga banhū abo bakūmugunanha gaya: ‘Ū mu lūganda lwa ng'wa Lubeni akūbiza Elizuli ng'wana Shedeuli.

⁶ Ū lwa ng'wa Simioni, Shelumieli ng'wana Zulishadai;

⁷ Ū lwa ng'wa Yuda, Nashoni ng'wana Aminadabu;

⁸ Ū lwa ng'wa Isakaali, Netaneli ng'wana Zuali;

⁹ Ū lwa ng'wa Zabuloni, Eliabu ng'wana Heloni;

¹⁰ Ū mu bitūnja ba ng'wa Yosefu, ū kūfuma ū mu lūganda lwa ng'wa Efulaimu, Elishama ng'wana Amihudi; Ū lwa ng'wa Manase, Gamalieli ng'wana Pedazuli;

¹¹ Ū mu lūganda lwa ng'wa Benajamini, Abidani ng'wana Gidioni;

¹² Ū mulī Dani, Ahiezeli ng'wana Amishadai;

¹³ Ū mulī Asheli, Pagieli ng'wana Okilani;

¹⁴ Ū mulī Gadi, Eliasafu ng'wana Deūli;

¹⁵ Ū mulī Nafutali, Ahila ng'wana Enani.’”

¹⁶ A benaba h'abo bakasolwa kūfuma ū ng'wibità ī lyose; hū bene abo baalī batongeeji ba ng'anda ja bakūlūgenji babo, batongeeji ū mu ndūgū ja bakūlūgenji babo.

Ng'anda na būtaale wajo

¹⁷ Ū Musa nū Alooni būbasola a banhū benabo, abo mina gabo gakahayiwa.

¹⁸ Hūna ū mu lūshikū lo kwandya lwenūlo ū mu ng'weji gwa kabīlī, būbitana pye a banhū bikuminga. A banhū boolechaga ī shibyalīlwe shabo mu nzīla ya ndūgū jabo, na mu kwihela kwa mina ga bakūlūgenji babo. A bagosha ba kwandīja ha myaka makūmi abīlī na kūja kū būtongi, a bene bandīkwa būlī ng'wene lina lyakwe,

¹⁹ gīt'ūmo SEEBA walī wanagīīlīla ū Musa; hūna lūūlū ūbabala ū ng'witogolo lya Sinai.

²⁰ Ū kūfuma ū mu shibyalīlwe sha ng'wa Lubeni ū ng'witūnja wa kwandya kūbyalwa na Isilaeli: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa, būlī ng'wene lina lyakwe; kūlenganīla nī ndūgū ja bakūlūgenji babo, na a bataale ba ng'anda jabo.

²¹ Ūbūkūmi wabo ū mu lūganda lwa ng'wa Lubeni: Baalī shihūmbī makūmi anè na shitandatū, na magana atanò.

²² Ū kūfuma ū mu shibyalīlwe sha ng'wa Simioni: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

²³ Ūbūkūmi wabo ū mu lūganda lwa ng'wa Simioni: Baalī shihūmbī makūmi atanò na kenda na magana adatū.

²⁴ Ū kūfuma ū mu shibyalīlwe sha ng'wa Gadi: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

²⁵ Ūbūkūmi wabo ū mu lūganda lwa ng'wa Gadi Baalī shihūmbī makūmi anè na shitanò, na magana atandatū na makūmi atanò.

²⁶ Ū kūfuma ū mu shibyalīlwe sha ng'wa Yuda: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

²⁷ Ūbūkūmi wabo ū mu lūganda lwa ng'wa Yuda: Baalī shihūmbī makūmi mpungatī na shinè, na magana atandatū.

²⁸ Ū kūfuma ū mu shibyalīlwe sha ng'wa Isakaali: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

²⁹ Ūbūkūmi wabo ū mu lūganda lwa ng'wa Isakaali: Baalī shihūmbī makūmi atanò na shinè, na magana anè.

³⁰ Ū kūfuma ū mu shibyalīlwe sha ng'wa Zabuloni: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū, bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

³¹ Ūbūkūmi wabo ū mu lūganda lwa ng'wa Zabuloni: Baalī shihūmbī makūmi atanò na mpungatī, na magana anè.

³² Ū kūfuma ū mu bitūnja ba ng'wa Yosefu, ū kūfuma ū mu shibyalīlwe sha ng'wa Efulaimu: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

³³ Ūbūkūmi wabo ū mu lūganda lwa ng'wa Efulaimu: Baalī shihūmbī makūmi anè, na magana atanò.

³⁴ Ū kūfuma ū mu shibyalīlwe sha ng'wa Manase: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

³⁵ Ūbūkūmi wabo ū mu lūganda lwa ng'wa Manase: Baalī shihūmbī makūmi adatū na shibīlī, na magana abīlī.

³⁶ Ū kūfuma ū mu shibyalīlwe sha ng'wa Benjamini: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

³⁷ Ūbūkūmi wabo ū mu lūganda lwa ng'wa Benjamini: Baalī shihūmbī makūmi adatū na shitanò, na magana anè.

³⁸ Ū kūfuma ū mu shibyalīlwe sha ng'wa Dani: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

³⁹ Ūbūkūmi wabo ū mu lūganda lwa ng'wa Dani: Baalī shihūmbī makūmi atandatū na shibīlī, na magana mpungatī.

⁴⁰ Ū kūfuma ū mu shibyalīlwe sha ng'wa Asheli: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

⁴¹ Ūbūkūmi wabo ū mu lūganda lwa ng'wa Asheli: Baalī shihūmbī makūmi anè na shimò, na magana atanò.

⁴² Ū kūfuma ū mu shibyalīlwe sha ng'wa Nafutali: A bagosha pye, kwandīja a ba myaka makūmi abīlī na kūja kwigūlya, abo baalī badūgije kūja kū būlūgū bakandīkwa būlī ng'wene lina lyakwe; kūlenganīla nī numba ja bakūlūgenji babo, na a bataale ba ng'anda jabo.

⁴³ Ūbūkūmi wabo ū mu lūganda lwa ng'wa Nafutali: Baalī shihūmbī makūmi atanò na shidatū, na magana anè.

⁴⁴ A benaba h'a bagosha abo bakabalwa na Musa na Alooni, hamò na batongeeji Ikūmi na babīlī ba Baisilaeli, būlī ng'wene kūfuma mu lūganda lwakwe.

⁴⁵ Pye a Baisilaeli: Kwandīja ba myaka makūmi abīlī na kūja kwigūlya, abo baalī badūgije kūlwa būlūgū bakabalwa, būlī ng'wene mu lūganda lo ng'wawe.

⁴⁶ Ūbūkūmi wabo abose būkashika shihūmbī magana atandatū na shidatū, na magana atanò na makūmi atanò.

Balawī batabalilwe

⁴⁷ Gwike ī numba ja Balawī jitabalilwe aho balībalwa a bangī.

⁴⁸ Nguno ū SEEBA walī wang'wīla ū Musa gīkī,

⁴⁹ “Yaya ū kūbabala a ba numba ya ng'wa Lawī, nūūlū kūbasangīja ū mu kūbalwa kwa Baisilaeli a bangī.

⁵⁰ Alīyo a Balawī batūūlage ha nīmo gwa kūlīlang'hana ī liheema, īlo līlī wikalo w'isandīko lya būkaanīji; bayūshilang'hana pyī ī shiseme shalyo, nī shikolo shaamo ī shingī. A benabo bakūyūlībūūcha ī liheema, nī shiseme shalyo pyī ī shose; a boi hū bakūbiza balang'hani baalyo, nī ng'hambī jabo bakūjiyūtūūla kūlīpīndīlīja.

⁵¹ Būl'ikanza ūlū līlīsaamiwa ī liheema, a Balawī hū a babūūcha baalyo, nūūlū līlīīmīlīchiwa, a benabo hū bene a ba kūlyīmīlīcha. Ūngī ose ose ūyo wegeela ho akūbūlagwa.

⁵² A Baisilaeli bakūyūjitūūla ī ng'hambī jabo kūkūūbīlīja ng'anda jabo. Būlī bene na ng'hambī yabo, na lūbembeela lwabo.

⁵³ Alīyo a Balawī a bene bakūyūtūūla ī ng'hambī jabo kūlīpīndīlīja ī liheema, īlo līlī wikalo wa isandīko lya būkaanīji. Ū mu kwīta gīko, ī libita lya Baisilaeli lītūgwīlwa nsango. A Balawī hū bene abo bakūbiza balang'hani b'iheema, īlo līlī wikalo w'isandīko lya būkaanīji.”

⁵⁴ A Baisilaeli bakīīta pyī ī yose gīt'ūmo SEEBA walī wanagīīla Musa.