Isaya 9 - Bibilia Ilagano Lya Kale 2015

Twabyalīlilwe Ng'wana

¹ Gwike ū kūlī we ūyo walī mu makoyī ī lilundu lītikala ho. Na ng'hana ī kale walī ayīponije mu magooke ī sī ya Zabuloni, nī ya Nafutali. Alīyo ū mu shikū ja kū būtongi akwigūngūhya ī Galilaya ya banhū ba mahanga, īyo īlī hīhī na nzīla ya kū nyanza, kū nkīlo gwa Yolodani.

² A banhū abo bakashimīzīlaga mu giiti baabonile isana itaale, alichene, isana lyabaakīlile abo wikalo wabo būlī mu nengeeji gwa lūfu!

³ Hū bebe walyongegije ī lihanga, wabongegije ū būyegi wabo a banhū; balī na būyegi no ū kū būtongi wako gīt'ūmo bakayegelaga mu magesa, ūmo banhū bakayegaga ng'wikanza lya kūgabanha shisonzwa.

⁴ Nguno ūmo īkajīla mu lūshikū lwa kūpyenwa kwa Bamidiani, h'ūmo walībīnzagūlīlile ī lijoki Īlo lyalī nigo ndito kūbo, ū ngamba ūyo gwalī gūbasheedekegije kū mabega gabo, nū nang'ha gwa nuhya wabo.

⁵ Būlī shilatū sha nshilikale Īsho shatūmama mu būlūgū, nī shizwalo pyī īsho shabīta kūgalagajiwa mu mininga, shikūtūūlwa ng'wigelè lya kūpemvwa; shikūbiza ng'hwi ja kūbachiwa mu moto.

⁶ Nguno a bise twabyalīlilwe ng'wana, twinhilwe ng'wana ngosha, ū būsugi būkūlembeela h'ibega lyakwe. Ī lina lyakwe akwitanwa Wa Makaya, Nganikīji Wawiza, Mulungu wa Nguzu, Siswe wa Welelo bose, Ntemi wa Mhola.

⁷ Ū kūkūla kwa būsugi bokwe nī mhola shitūbiza na ngelelo. Akwigasha h'isumbī lya būtemi lya ng'wa Daūdi, abize nsugi wa būtemi wakwe. Akūbūguzuhya na kūbūhandīkīīja mu būlekanya bo wīmà na būtūngīlīja, kūfuma ikanza lyenīlo na kūshisha welelo na walelo. Ū wilu bo ng'wa SEEBA wa mabità būkūgwīta ū mhayo gwenūyū.

Būpelanu bo ng'wa SEEBA kū Baisilaeli

⁸ Ū Seeba wantūmīlile ū Yakobo mhayo gwa kūng'hama, na ng'hana gūkūng'wikīīla ū Isilaeli.

⁹ Pye a banhū bakūgūmana, pyī ū Efulaimu na a bana Samalia, abo mu būdoshi na wikumīlīja wa ng'holò jabo bakayombaga gīkī,

¹⁰ “A madafaali gaaholomokile, alīyo a bise tūkūzenga na mawe gagūūnagūlīlwe chiza; Ī mikūyū yagwile, aliyo tūkūhamba mikoola a ha ng'wanya gwayo.”

¹¹ Alīyo ū SEEBA wabaguzuhije a banishi ba ng'wa Lezini babapyene, wabasagije a banishi babo babadumīle.

¹² Ī kīya balīko Baalamu, Ī ng'weli Bafilisiti; pye a bose benaba bīyasamīlile milomo yabo ī Isilaeli kwīlya. Alīyo nūūlū īkī īlī gīko ī mihayo, ū būpelanu bokwe būtaalī ū kwīnga, nū nkono gwakwe ataalī agūgoloolile.

¹³ Nguno a banhū bataalī ū kūnshokela ūyo wabatūlile, hangī bataalī gete ū kwandya ū kūnkooba ū SEEBA wa mabità.

¹⁴ Hūna lūūlū ū SEEBA akūgwīnja ū ntwe ū mu Isilaeli mu lūshikū lūmò, nū nkīla akūgūtīna, na a matambī ga ming'hwa pye na a madete.

¹⁵ A banamhala a bakūjiwa hū gwene ū ntwe, lelo a bahangi abo bakalangaga būlomolomo, a bene h'ū nkīla.

¹⁶ Nguno a batongeeji ba banhū benaba h'a bahubya babo; nabo a batongeelwa bakajimīīlaga.

¹⁷ Hūna lūūlū ū Seeba atūbayegela a badinha babo, nūūlū atūbachīla shigango a bapīna na a bachīlwa babo, nguno būlī ng'wene wabūbi, hangī ataamanile Mulungu; nīyo būlī nomo gūkayombaga ya malofu dūhū. Alīyo nūūlū īkī īlī gīko ī mihayo, ū būpelanu bokwe būtaalī ū kwīnga, nū nkono gwakwe ataalī agūgoloolile.

¹⁸ Nguno ū būbi būkūligimaga gītī moto; būkūnogotejaga magwaata na ming'hwa, būkūlyaga mapoolu magiitu, boyūdundumūka winungile ng'wigūlya gītī ng'hīngī ya lyochi.

¹⁹ Ī sī īkūpemvwa kūlwa būpelanu bo ng'wa SEEBA wa mabità, a banhū hū bakūbiza shipembo sha kūgūbakīja ū moto; nīyo atigela wa kūnsaatwa ng'wiye; būlī ng'wene lwakwe lwakwe.

²⁰ Ū kū lwandī lwa nkono gwa būlyo bakūpuganhīla no, alīyo batigūta nūūlū hado; nū kū gwa lūmoso h'ūmo balīīle, ndūhū ū kwigeja na hado yaya. Būlī munhū akwilya nyama nkono gwakwe wei ng'wenekīlī.

²¹ Ū Manase akūnsakamīla Efulaimu, nū Efulaimu ansakamīle ū Manase. Hūna ū mu būbīlī wabo gīko bakūng'wihuutīīla ū Yuda. Alīyo nūūlū īkī īlī gīko ī mihayo, ū būpelanu bokwe būtaalī ū kwīnga, nū nkono gwakwe ataalī agūgoloolile.