Isaya 66 - Bibilia Ilagano Lya Kale 2015

Būlamulwa na kwisagīlwa

¹ Ū SEEBA alīhaya, “Ī ligūlū līlī Isumbī lyane lya būtemi, Ī sī yene būtūūlo wa mhambala jane. Numho mukūnizengela halī lūūlū Ī numba yane? Nī lipandī lyane lya kwifuulīla līlī halī?”

² Gūtī nkono gwane ūyo gwashibeeja pyī ī shenishi, hūna shūbiza ho? Alīhaya SEEBA. Ū munhū ūyū h'ūyo nakūnkūja: Ū wa moyo gūzunije kūlekana na būbi, na akadetemaga kūlwa mhayo gwane.

³ Alīyo ūyo ūsendamīla shitambò sha nzagamba, atikīla na mūlagi wa munhū, ūyo ūfunya shitambò sha ng'holo, atikīla na nsīnzi wa mvwa, nūūlū ū wa kūfunya shitambò sha būsu alī gītī akūfunyaga shitambò sha mininga ga ngulubī; nū wa kūzuukīja shitambò sha būbbani atikīlile na namya wa shiikolile. A benaba basolile kūja na nzīla jabo, ū būpanga wabo būkayegelaga mu mihayo ya malofu.

⁴ Alilūūlū, nū nene nakūbasolela nzīla ja kūbalūbya; īyo bīyogohile h'īyo nakūbenhela. Nguno aho naahīlīkaga atigelile wa kūniidīka, na a haho nayombaga walī atīho wa kūnidegeleka. Īyo bīītaga ū mu būtongi wane yalī mibi no, baalī basola kwīta īyo natītogilwe.

⁵ Bing'we abo mukadetemaga kūlwa mhayo gwane, gwigwagi ū mhayo go ng'wa SEEBA: A baana ba ng'wing'we abo bamukolilwe, na bamusūngūlile kūlwa nguno ya lina lyane, bakwiwīlaga gīkī, “Ka nahene n'akūjiagwe shi ū SEEBA tūbūbone ū būyegi wing'we!” Alīyo bakūgooka dūhū.

⁶ Gūdegelekagi ū nundumo ūyo gūlīfuma mu nzengo, muligwe ī lilaka īlo līlīngīīla ū mu hekalu! Ilaka lya ng'wa SEEBA, a banishi bakwe alībenhela shilīpīlo mu yose īyo ībigeleelilwe.

⁷ Mhayo ngeni ūyū, nkīma kūbyala ataalī kūlung'wa būsūngū; kūbyala ng'wana ngosha nūūlū kūlījiwa būsūngū yaya.

⁸ Nani ūyo wabīta kūgwigwa ū mhayo gwenūyū? Nanī wīyilolekeja ī mihayo yenīyī? Ī sī īdūgije kwītwa īfunye būbyīle mu lūshikū lūmò? Ihanga igima līdūgije kūbyalwa ng'wikanza iguhī dūhū? Alīyo h'īyo yang'wilongelile ū Sayuni, nguno aho wandya dūhū ū kūlung'wa ū būsūngū haho na haho ūbabyala baana bakwe.

⁹ Ū nene nashishe ng'wikanza lya kūbyala hama nalemeelwe ū kwitūūja? Alīhaya SEEBA. Ū nene ūyo nakashishaga ng'wikanza lya kubyala, hū nīlugale hangī ī nda ya būbyīle? Mulungu wako alīyomba.

¹⁰ Bing'we bose abo muntogilwe ū Yelusalemu, yegagi nang'hwe muzalabane kūlwa nguno yakwe. Bose abo mukūmpīnīhalīlaga yegagi no no no hamò nang'hwe.

¹¹ Nguno mukong'ha kūshisha ng'wigeje, a mabeelè ga kūfuma mu mbeele jakwe gakūmulūngūja. Mukong'ha no mushilūmbe ī shizeeze īsho shikūhūūma kūfuma ng'wikūjo lyakwe itaale.

¹² Nguno ū SEEBA alīhaya: Ū ng'wenūyo nakūng'wenhela mhola ningī gīt'ihūūma; nū būsabi wa mahanga būkūnseesekelela gītī mongo gwataalaga. Akūyūng'onhya wang'wibala na kū ngongo, na a ha matango gakwe akūnkīlīja.

¹³ Ūmo munhū akalūngūgījiagwa na nina, nū nene nakumulūngūja gīko; na ng'hana ū mu Yelusalemu mukūlūngūjiwa.

¹⁴ Ūlū ng'wībona ī yenīyī ī ng'holò jing'we jikūyega, nī mibīlī ying'we īkūfuluma gītī maswa; hūna ū nkono go ng'wa SEEBA gūkūmanīīka gīkī gūlī hamò nabo a batūmami bakwe; alīyo ū būkalī bokwe būkūmanīīka gīkī būlī higūlya ya banishi bakwe.

¹⁵ Ū SEEBA akwiza na moto. A magogoteni gakwe gabange gītī nyaga gwa nshūūlūlū; akwiza awite ū būpelanu wakwe mu būkalī būtaale, na a kahamīle kakwe mu ndali ja moto.

¹⁶ Nguno ū SEEBA akwiza na moto, hamò na līlūshū lyakwe; kwiza kūbagwisīja nsango pye a banhū; nīyo bakūkwīla abo akūbabūlaga ū SEEBA.

¹⁷ Abo bakikomanyaga gīkī babize beela alīyo hangī hūna bandya kūja kū migūnda bakūnondeelaga ūyo alī ha gatī ya balī ba nyama ja ngulubī na ngoso, na ja mashiinū gangī ga malofu, bakūkalīka pyī ng'wikanza līmò, alīhaya SEEBA.

¹⁸ Hūna lūūlū kūlwa nguno ya shītīle shabo na a maganiko gabo, nū nene nalī bbihī kwiza, nababilinge a banhū ba mahanga gose na ndīmi jose; na ng'hana bakwiza balībone ī likūjo lyane.

¹⁹ Hūna nakūtūūla shimanīkījo ū mubo, bamò ba babo balasaage nakūbatūma kūja kū mahanga; kūja Talishishi, Libya, Ludi (banhū abo bakumūkile mu mhayo gwa būlasi); kūja Tubali, Javani, na kū majinga ga kūle, ūko bataalī kūlwigwa ū lūkumo lwane nūūlū ū kūlībona ī līkūjo lyane. Bakūja bakūlīkumūchaga ī likūjo lyane ū mu mahanga,

²⁰ na a badūgū bing'we pye a bose babenhe Yelusalemu, kū lūgūlū lwane lwela; babize gītī shakwinha sheela kūlī SEEBA. Bakūbenha badamhīlile falasa, bamò mu magogoteni na matololi; bangī ha nzobe na ngamīla, alīhaya SEEBA. Bakūbenha gīt'ūmo Baisilaeli bakenhelaga shakwinha sha būsu kū hekalu ya ng'wa SEEBA mu shiseme sheela.

²¹ Bamò babo nakūbatūūla ha nīmo gwa būgabīji, na bangī kūbiza Balawī, alīhaya SEEBA.

²² Nalībeeja igūlū ipya na sī mhya, alīhaya SEEBA. Ūmo shilī sha kūshinga ho ū kū būtongi wane ī shenīsho, nī lina ling'we nī lya shibyalīlwe shing'we līkūbiza lya kūshinga ho.

²³ Kwīngīīla būfuma ng'weji kūshisha būfuma ng'weji, na kwīngīīla sabato kūshisha sabato, banhū bose pye bakwiza biname kū būtongi wane, alīhaya SEEBA.

²⁴ Hama bakūja ī hanze ya nzengo kwīlola ī mibimba ya banhū abo baalī banigomelile; nguno ī ngino ja kūbalya jitūshila, nū moto gwa kūbanogoteja gūtūjima; nīyo bakūbiza būsoso wabūbi no ū kū banhū pye a bose.