Isaya 65 - Bibilia Ilagano Lya Kale 2015

Nsango na būpīji

¹ Niyoolekije ū kū banhū abo batanikoobile, baanipandīkile abo batanigīsīlīgije. Ī lihanga īlo lītaalī kūnitana lina lyane naalīwīlile gīkī, “Nalīho aha, nalīho aha.”

² Nakūdīīlaga līīmi ji nambile makono gane kūbitana banhū bashitiigwa, abo bakashimīzīlaga mu nzīla jitī jawiza, na kūlondeela maganiko gabo,

³ banhū abo bakaniikolooshaga gwa gwa gwa nguno ya kwīta yabūbi mu būtongi wane, kūlwa kūfunya shitambò mu migūnda, na kūzuukīja būbbani ha myalīlo ya madafaali;

⁴ abo bakigashaga kū mashigila, na kūkeeyula bakwītaga mihayo ya mbisīla kwenūko; balī ba nyama ja ngulubī; ba nungū jitamalaga misoji ya nyama ja shinhū ja malofu,

⁵ abo bakayombaga gīkī, “Bebe gelelaga kūle, ūtizegeela aha, ū nene nalī ng'wela no ū kūlī bebe!” A banhū benabo balī lyochi mu mūūlū gane; moto gūtajimaga.

⁶ Ū kū būtongi wane gūlīho gwandīkilwe gīkī, Natikala nahuumūlile sele, alīyo nakūlīpa mu būshikanu bose, nakūbalīpīla ya kūbaminya

⁷ kūlwa shibi shabo nī sha bakūlūngenji babo, alīhaya SEEBA. Nguno ya kūzuukīja būbbani mu ngūlū, na bakūnisondagūlaga bigashaga mu ngūlū ndo. Nakūbagelekela ya kūbaminya kūlenganīla nī shītīle shabo Ī sha kale.

⁸ Ū SEEBA alīhaya gīkī, “Ūmo banhū bakabonelaga minzī ga mizabibu mu shiseme hūna biwīla, ‘Yaya ūkūgiita, gataalī masoga,’ h'ūmo nakwītīla nū nene ū kū batūmami bane; natūbakenaagūla a bose.

⁹ Nakūpandīka shibyalīlwe kūfuma ū mulī Yakobo, nū mulī Yuda bakwilonga abo bakūbiza na wingīji ū mu ngūlū jane; a basolwa bane hū bene bakūsuga mo, a batūmami bane bakwikala ng'wenūmo.

¹⁰ Alīyo ī mbūga ya Shaloni īkūbiza madīīmīlo ga madaale ga mbūli na ng'holo. A malago ga Akoli gakūbiza matūūgījo ga madaale ga ng'ombe ja banhū bane abo bakanikoobaga.

¹¹ Alīyo a bing'we abo mukūnekaga ū SEEBA, abo mukūlwībaga ū lūgūlū lwane lwela, ng'wayūgolanya meza kūlwa Būchooji, na kūsangīlīja walwa mu mabbakuli mung'we mukūhelaga ya ha būtongi.

¹² Nakūmuhelela gwa kūbūlagwa, nīyo pye a bose mukūsagalajiwa kūlwa kūsīnzwa; nguno naahīlīka no alīyo ndūhū ū kūniidīka, nayomba no alīyo biya ū kūnidegeleka. Īyo ng'wītaga ū mu būtongi wane yalī mibi no, ng'walī ng'wasola kwīta īyo natītogilwe.”

¹³ Alilūūlū, ū Seeba MULUNGU alīhaya gīkī, “A batūmami bane bakūlya, alīyo a bing'we mukūminyiwa nzala; a batūmami bane bakūng'wa, alīyo a bing'we mukūminyiwa notà, a batūmami bane bakūyega, alīyo a bing'we mukūgwīlwa magooke.

¹⁴ A batūmami bane bakwīmba na būyegi wa kūfuma mu ng'holò jabo, alīyo a bing'we mukūlīla nguno ya kūsaatwa kūlwa būpīma wa mu ng'holò jing'we, mūkūūhūlūūla ng'hūngū kūlwa kūgwa ng'holò.

¹⁵ Ī lina ling'we mukūlīleka sagala a basolwa bane bayūlitūmīla mu nzīla y'izumo; hama ū Seeba MULUNGU akūmubūlaga a bing'we, alīyo a batūmami bakwe akūbinha lina līngī.

¹⁶ Hūna būlī ng'wene ūyo ūhaya mihayo ya kwenha ū mu sī, akwīta gīko mu lina lya ng'wa Mulungu nsanyiwa; ūyo ūtūmamīla shilahīlo ū mu sī, akwilahīla mulī Mulungu nsanyiwa. Nguno a makoye ayo gaabīta gakūbiza gībilwe, hangī gibisile ū kū būtongi wane.”

Igūlū ipya na sī mhya

¹⁷ Managi gīkī nalīseema igūlū ipya na sī mhya; Ī mihayo ya kale ītalizūkīlwa hangī, nūūlū ū mu maganiko ītiza.

¹⁸ Alīyo zalabanaga, hangī ūyege welelo na welelo kūlwa mhayo ūyo nalīgūseema, nguno ī Yelusalemu nalīyīseema lībize ipandī lya kūyeja, na a banhū baamo babize bayegu.

¹⁹ Nakwīyegela ī Yelusalemu, na a banhū bane bakūnizalabanya. Ī lilaka lya ng'hūngū na kūlīla lītaligwiwa mo hangī na hado yaya.

²⁰ Atilonga mo ng'wana ng'weleele wa kwikala mpanga kakanza kaguhī dūhū; nūūlū namhala wa kūcha atakalīkije būlamu wa shikū jakwe; nguno ūyo ucha alī na myaka igana akūbalwa gīkī ng'wana ū ng'wenūyo; alīyo ūyo ūlemeelwa kūshika ha myaka igana ū mu būlamu wakwe, akūbalwa gīkī azumilwe.

²¹ Bakūyūzenga ī numba bikala mo boi benekīlī, nī migūnda ya mizabibu bakūyūlīma baagalya boi a matwajo gaamo.

²² Batūzenga numba ja kwikalīlwa na banhū bangī, nūūlū batūlīma migūnda ī shilīwa shiyūliwa na banhū bangī. Nguno ūmo jilī shikū ja būlamu wa ntī, ni shikū ja banhū bane jikūbiza gīko. A basolwa bane bakwīlūmba makanza malīhu ī milīmo ya makono gabo.

²³ Batūtūmama milīmo ya kūcha mpandagīlo, nūūlū batūbyala baana ba kūshilīla mu makoye; nguno bakūbiza būbyīle wa banhū abo SEEBA abīīlūkīlile jakwe; a boi benekīlī, na a baana babo.

²⁴ Ū nene nakūyūbashokeja ūmo kūlī kūlīla kwabo nūūlū aho bataalī kūnīlomba, hangī nakūyūbigwa nūūlū aho bataalī bakūyombaga.

²⁵ Ī mhūge nū ng'wana wa ng'holo shikūyūdīīma hamò, ī shimba nayo īkūlya maswa gītī nzīkū ya ng'ombe; ī nzoka ī yene ī shilīwa shayo lūkūbiza lūbuubu. Shitigela shose shose sha kūgulaja nūūlū kūkenaagūla ū mu lūgūlū lwane lwela pyī ū lose, alīhaya SEEBA.