Isaya 64 - Bibilia Ilagano Lya Kale 2015

¹ Ni walītandūla ī ligūlū wike hasī, ī ngūlū jitingine ū kū būtongi wako!

² Ikaga ūlīmanīche ī lina lyako ū kū banishi bako; ūmo moto gūkabakījaga ng'hwi gaabīlīla minzī, na a mahanga gadeteme gīko ū kū būtongi wako.

³ Nguno aho ūkīīta mihayo ya kūdedebaja īyo twalī tūtayisagīlagwa, ūkika a hasī; Ī ngūlū jūyūdetema ū kū būtongi wako.

⁴ Kūfuma shikū ja kale atīho nūūlū ūmò ūyo wigwa, nūūlū kwitegeleja na gūtū gwakwe; hama lītīho liso īlo lyabīta kūmona Mulungu ose ose ūlū ūtī bebe dūhu, ūyo akīītaga mitaale kūlwa nguno ya banhū abo bakanindīīlaga.

⁵ Ū bebe ūkabeegeelaga abo bakīītaga ya būtūngīlīja mu būyegi; abo bakajizūkagwa ī nzīla jako. Alīyo aho tongeja kwīta shibi ūkapelana. Numho lūūlū tūkūpīla kinehe?

⁶ Bose pyī ūmo tūgelelile tūlī gītī shikolo shisoso, nī shītwa shise sha būtūngīlīja shibange gītī madaaso masoso; bose pyī tūkanyaalaga gītī idūūtū, Ī shibi shise shatūjana gītī kūja na nyaga.

⁷ Atīho ūyo akalitanaga ī lina lyako, nūūlū ūyo akateeganaga gīkī adimane nang'ho, nguno wabūbisile ū būshū wako tooye ū kūbūbona, watūlekanīgije tūshilīle mu būsobya wise.

⁸ Alīyo ū bebe Ee SEEBA, h'ūlī Sīswe, a bise tūl'ibūmba, ū bebe ūlī mūmbi, pye a bise tūlī nīmo gwa makono gako.

⁹ Ee SEEBA, lekaga ū kūtūpelanīla ūkīlanīje na kūkīlanīja, yaya ū kwikala ūshiizūkilwe ī shibi shise shikū ja welelo bose. Tūlolage tūlīkūlomba, nguno a bise bose tūlī banhū bako.

¹⁰ Ī mizengo yako myeela yagaalūkile kūbiza matogolo gatī na shose shose; nī Sayuni ī haha itogolo dūhū, Ī Yelusalemu nayo yabizile ipandī lya misaka.

¹¹ Ī numba yise neela na yawiza, ūmo bingīlaga bakūlūngeji bise kūkūgongoola yanogotejiwe moto; nī shikolo shise īsho shalī sha mpango ntaale kū bise Ī haha pyī shikenaagūkile.

¹² Ee SEEBA, ū mu yose yenīyī ūkūtwiloleela dūhū? Ūkūhuumūlīja dūhū ūtūleke tūluhe na kaluhīle kabūbi gīkī?