Isaya 63 - Bibilia Ilagano Lya Kale 2015

Ng'waka gwa būkomoolwa

¹ Nani ūyo īngīīlile Edomu ng'wenūyū, ūyo alīfuma Bozila azwalile shizwalo shitemilwe būūza, ūyo akūgaadaga ng'wikūjo lya nguzu jakwe azwalile ng'hanjo y'ikūjo? “Nalī nene, ūyo nakayombaga mu būtūngīlīgija, nalī na būdūla mu kūpīja.”

² Nibūlī ī ng'hanjo yako yalalūkījaga gītī shizwalo sha mpandagīji wa mizabibu ng'wikamīlo?

³ Nīpandagīlile nene iyene Ī mizabibu ū ng'wikamīlo, ū kūfuma ū mu mahanga atilongile nūūlū ūmò wa kūbiza hamò nane. Nakabapandagīla kūlwa būpelanu wane, nūbatobanga kūlwa kūnisaayīcha; hūna a mininga gabo gītaamagūkīla ī myenda yane, h'ī chene pyī ī shizwalo shane shadabbalanhaga.

⁴ Nguno ū lūshiku lwa kūmala shiilī lwalī mu ng'holò yane, hama ū ng'waka gwane gwa būkomooji gwalī gwashika.

⁵ Nakilalangīja nakūlolaga wa kūnigunanha, natabonile nūūlū ūmò; nakagekemala ū kūbona gīkī walī atīho nūūlū ūmò ū wa kūnigunanha; hūna lūūlū nūtūmamīla nkono gwane nene ng'wenekīlī, gūnenhela būpīji kūlwa nguno yane; ū būpelanu wane būnihandīkīīja.

⁶ A mahanga nakagapandagīla kūlwa būpelanu wane; naalī nasaaya no, ū būkalī wane būbakola gītī walwa; nūgiitagūlīla hasī a mininga gabo.

Kūlūmba na kūlomba

⁷ Nakūbūhaya ū wiza ng'holò o ng'wa SEEBA; nakūngongoola kūlwa wiza bokwe, kūlenganīla nī yose īyo watwītīlile ū SEEBA. Alichene, yose īyo wabīītīlile banhū ba numba ya Isilaeli; kūlenganīla nī shigongo shakwe nū būtaale bo wiza bokwe.

⁸ Nguno akahaya gīkī, “A benaba banhū bane, baana abo batīko kūnilemba”; hūna ūbiza mpīja wabo.

⁹ Ū mu būluhi wabo waluhaga mo nang'hwe; alīyo ū malaika wakwe wabilongelaga wabapīja, wabakomoola kūlwa būtogwa na shigongo shakwe; ū mu shikū ja kale ī jose wabagūngūmūlaga na kūbabūūcha wei.

¹⁰ Gwike bakooya ū kūng'wigwa, būmpīnīhaja ū Moyo Ng'wela wakwe; hūna ūgalūka kūbiza ng'wanishi wabo; wei ng'wenekīlī ūbiza ng'wilwisha wabo.

¹¹ Hūna būjiizūkwa ī shikū ja kale, Ī ja ntūmami wakwe Musa na banhū bakwe, būhaya: Alī halī ūyo akabakīja nyanza banhū bakwe hamò na balang'hani babo? Alī halī ūyo akantūma Moyo Ng'wela wakwe gīkī ikale mubo,

¹² ūyo nkono gwakwe gw'ikūjo gwalī hamò na nkono gwa būlyo gwa ng'wa Musa, ūyo akatandūla nzīla mu minzī kū būtongi wabo, wibeegeja lūkumo lwa būja na būja,

¹³ ūyo akabatongeela kūshisha būkīla būjiba wa minzī mashimu? Batipamile, bakabīta gītī falasa Īkūpeelaga mu mbūga,

¹⁴ gītī ng'ombe jijile kū malago; ū Moyo o ng'wa SEEBA hū ng'wene akabifuuja. H'ūmo wabatongeelaga a banhū bako, wibeegeja lina ly'ikūjo.

Kūlomba kūchīlwa shigongo

¹⁵ Lolaga ī hasī, ūbone kūfuma ū ng'wigūlū ū kū wikalo wako wela na w'ikūjo. Būlī halī ū wilu wako nū būdūla wako? Ū būtogwa wako nī shigongo shako shihangījiwe shitūnipandīkaga ū nene.

¹⁶ Gwike ū bebe h'ūlī Sīswe, ū Abulahamu nūūlū akatūjimīīlwa, nū Isilaeli ūduuma kūtwitegelegija, alīyo ū bebe Eee SEEBA, ūlī Sīswe; kūfuma kale ūlī Nkomoji wise, Ī lyenīlo h'ī lina lyako.

¹⁷ Eee SEEBA, nibūlī ūkūtwenhelejaga kūtala twīnga ū mu nzīla jako, nī ng'holò jise ūkūjigang'hanajaga twaduuma ū kūkogoha? Shoshaga moyo kūlwa nguno ya batūmami bako, a banhū ba ng'anda ja wingīji wako.

¹⁸ Ī lipandī lyaako lyeela a banhū bako beela bikala nalyo ikanza iguhī no, Ī haha a banishi bise bakūlītobaga.

¹⁹ A bise tūlī bako kūfuma kale, alīyo a boi ūtaalī ū kūbasuga, bataalī kwitanīlwa kū lina lyako.