Isaya 60 - Bibilia Ilagano Lya Kale 2015

Ikūjo lya Sayuni

¹ Būūkaga, wandye kwaaka, nguno ī lisana lyako lyashikaga; nī likūjo lya ng'wa SEEBA lyakwikīīlaga.

² Nguno ī sī īkūkundīkījiwa giiti, giiti sha gamha shikūbikalīla a banhū. Alīyo ū SEEBA akūkwakīla ū bebe, Ī likūjo lyakwe līkwigengeleka ū mulī bebe.

³ Mahanga gakwiza ū kwisana lyako, na batemi ū kwisana lya kūgūngūmūka kwako.

⁴ Būūchaga a miso gako wilalangīje hose hose ūbone; bose pye balibilinga bize kūlī bebe, a bitūnja bako baliza kwīngīīla kūle, a bashīke bako bakwenhwa babūūchiwe mu makono.

⁵ Ūlū ūbona ūkūng'weka ng'weka na kūzalabana, ī ng'holò yako īkūyūtūla, hangī īkūgalīha kūlwa būyegi; nguno ī sabo īyo īkabītījiagwa mu nyanza ūkwenhelwa bebe, ū būsabi wa mahanga būkwenhwa kūlī bebe.

⁶ Madaale ga ngamīla gakokala ū mu sī yako, mūūga ja ngamīla jikūfuma Midiani na Efa. Nū kūfuma ī Sheba bakwiza, nabo babūūkije zahabu na būbbani pye a bose, bakūnkumūcha na kūnkumīlīja SEEBA.

⁷ Pye a madaale ga Kedaali gakūbiligwa genhwe kūlī bebe, hūna ī ng'ondi ja Nebayoti jikūbiza jako ja kūtūmamīla, jikwanukūlwa kūlwa kūyūfunyiwa shitambò a ha ng'walīlò gwane; hanuma ī numba yane nakwīyīta Ībize n'ikūjo itaale.

⁸ Shikolo kī īsho shiliza shikūhūūmaga gītī malunde shenīshi, īsho shihuutaga gītī mhunda ījile kū chanjo shayo?

⁹ Na a majinga ganiisagīlilwe nene; Ī meli ja Talishishi jikūbiza ja kwandya kūbenha a bintūnja bako kūfuma ī kūle; bakwiza na feza na zahabu jabo, kūlwa kūlīkūja ī lina lya ng'wa SEEBA Mulungu wako, ū Ng'wela wa Isilaeli, nguno wakūgūngūhije.

¹⁰ Banhū babisa bakūjizenga hangī Ī ndugu jako, na a batemi babo bakūkūtūmamīla; nūūlū īkī ūkanipelanya nūkūchaanagūla manasu, alīyo īkī nalī na būtogwa naakūchīlile shigongo.

¹¹ Ī mibita yako īkūlugūka ilalī, Ītūlugalwa ī līīmi nūūlū ī būjikū; a banhū na a batemi babo bayitonja mabità mabità balīkwenhela sabo kūfuma kū mahanga.

¹² Nguno ūlū ihanga nūūlū būtemi būlema kūkūtūmamīla ū bebe, būkūkenaagūlwa būshile ho gete.

¹³ Ī likūjo lya Lebanoni līkwenhwa kūlī bebe; ī mitī yamo gītī nzule, nyenzeyenze nū manga, yose yenīyī īkwenhwa kūlwa kūgaliila ipandī lyane lyela na kūlītūūlīla būlenji; hūna ī lipandī lya kūtūūla mhambala jane nakūlyīta lībize n'ikūjo.

¹⁴ A baana ba baluhya bako bakwiza biname kū būtongi wako; pye abo baakwibengelejaga bakwinama kū mhambala jako, bakūkwitana ūlī Nzengo go ng'wa SEEBA, Sayuni ya Ng'wela wa Isilaeli.

¹⁵ Nūūlū īkī ūlekilwe hangī ndūhū ūyo akūtogilwe, hama atīho nūūlū wa kūbīta ū mulī bebe, nakūkwīta ūbize ikūjo lya welelo bose, na mbūūkī ya būyegi kūlwa shibyalīlwe shose.

¹⁶ Ūkūgong'ha a mabeelè ga mahanga, mbeele ja mu makūlū ga batemi jikūkūlang'hana. Hūna ūkwitegeleja gīkī ū nene SEEBA hū nalī Mpīja wako na Nkomoji wako; hū nene wa būdūla bose, nene Mulungu o ng'wa Yakobo.

¹⁷ A ha ng'wanya gwa shaba nakūkwenhela zahabu, na feza a ha ng'wanya gwa chūma. Hama a ha ng'wanya gwa mantī, nakūkwenhela shaba, a ha ng'wanya gwa mawe chūma. Hūna ī mhola nakwīyīta kūbiza h'ū nsugi wako; lelo ū būtūngīlīja nakūwīta kūbiza ntongeeji wako.

¹⁸ Ū wiboneeji būtigwiwa nūūlū hado ū mu sī yako; ū mu mbīmbī jako gatilonga mo makoye nūūlū būkenaagūku, alīyo ī ndugu jako ūkūjiilīka Būpīji, Ī mibita yako ūkūyilīka Būkumīlīja.

¹⁹ Ū būng'weku wa līīmi ūtūbūsendamīla kūlw'isana lya kūkūtwimīla, nūūlū ū būpe wa ng'weji ū ng'wikanza lya būjikū; nguno ū SEEBA akūbiza Isana lyako lya welelo na welelo.

²⁰ Ū bebe ī līīmi lyako lītīko kūgwa, nū ng'weji gwako gūtooya ū kwela. Ū SEEBA akūbiza Isana lyako lya welelo na welelo, nī shikū jako ja būpīna jikūshila.

²¹ A banhū bako pye a bose bakūbiza batūngīlīja, bakwīdima ī sī ībize yabo ilalī; a benaba bal'itambī lya ntī gwa kūhamba nene, nīmo gwa makono gane ng'wenekīlī, kūlwa koolecha ikūjo lyane.

²² Ū ndo wa bado ū mu bing'we akūbiza kaya nhaale, ū lūganda ū lūdoololo lūkūbiza ihanga lya nguzu. Ū nene nalī SEEBA; ū mhayo gwenūyū nakūgwīta ng'wikanza lyago.