Isaya 6 - Bibilia Ilagano Lya Kale 2015

Isaya kūtūng'wa na SEEBA

¹ Ū mu ng'waka gwene ntemi Uzia akazumalīkīla, nakamona ū Seeba igashije h'isūmbī lya būtemi, higūlya no, na mu kūgūngūhiwa kūtaale no no no; ī ng'hanjo yakwe yalī yokala pa ū mu hekalu ī yose.

² A higūlya yakwe gaalīho maselafi, būlī lyene lyalī na manana atandatū: Abīlī gaalī gifīkīgije kū būshū, abīlī hangī gaalī gifīkīgije kū mhambala jago; hama hangī ay'abīlī gaalalīlaga.

³ Būlī lyene lyahamukaga kū bichalyo līlīhaya gīkī, “Ng'wela ng'wela, ng'wela, SEEBA wa mabità; ī sī pyī ī yose yokalile ikūjo lyakwe.”

⁴ Kūlwa nguno ya kūhamuka kw'ilaka lyago, ī ng'hīngī ja ha nyango jatinginaga kūfuma ngw'itina lyajo; nī hekalu īkookala lyochi.

⁵ Ū nene nūlīla nalīhaya, “Nashila būlī, naacha! Nguno nalī munhū wa nomo nsoso; hama nakikalaga hamò na banhū ba milomo misoso, alīyo a miso gane gamona ū Ntemi, ū SEEBA wa mabità.”

⁶ Hūna līmò lya maselafi lyūlala līnizīīlile, līlī n'ikala lya moto mu nkono gwalyo; līkalyīnja ha ng'walīlo lyūlībūūcha n'ibūūkījo lya moto.

⁷ Lyūshika lyūnikuumya nī likala lyenīlo kū nomo gwane, hūna lyūyomba; “Managa gīkī, īkī ī lyenīlī lyakūkuumya ū nomo gwako, ū būbi wako wīnjiagwa, nī shibi shako shalekejiagwa.”

⁸ Kwimanīla nigwa ilaka lya g'wa Seeba līlīhaya, “Nantūme nani, nani aje a ha ng'wanya gwise?” Hūna nūshosha, “Nalīho nene aha, nitūmage nene!”

⁹ Nang'hwe ūniwīla, jaga ūkabawīle a banhū benaba gīkī, “Ū kwigwa igwagi, alīyo mutitegeleja; nū kūlola lolagi, alīyo mutūbona.”

¹⁰ Ī ng'holò ja banhū benaba jīītage jibize ngūnu, na a matū gabo gadidohyage gaduume ū kwigwa; na a miso gabo gabbokujage. Ūlū ītī chene ni balībona na miso gabo, nū kwigwa ni baliigwa na matū gabo, nū mu ng'holò jabo ni bitegeleja, būgalūka, būpījiwa!

¹¹ Nane nūshosha, “Ee SEEBA, Kushisha nanali?” Nang'hwe ūhaya, “Kūshisha ī mizengo ībize misaka ītī na bikaji.” Kūshisha ī numba jibize mapagale gike ndūhū mo a banhū, na a malaale gatobangwe gakenaagūke gete;

¹² hama ū SEEBA abasaamye a banhū baje kūle, nī sī īlekanījiwe yikale buyīkī.

¹³ Nūūlū īkasaagīīla īmò ya ng'wikūmi dūhū, nī yene īkūkenaagūlwa hangī. Alīyo ūmo nzule nūūlū ntūndū gūkabbutīlagwa gwaleka ishikī, h'ūmo īlī nī mbīyū neela, ī lyenīlo ishikī mu sī.