Isaya 59 - Bibilia Ilagano Lya Kale 2015

Shibi, kūtambūūla na kūkomoolwa

¹ Managi gīkī ū nkono go ng'wa SEEBA gūtī nguhī gīkī nose gūlemeelwe ū kūpīja, nūūlū ū gūtū gwakwe gūtachibile gīkī gūlemeelwe ū kwigwa.

² Alīyo ū būbi wing'we h'ūbo būtūūlile lyoma a ha gatī ying'we nū Mulungu wing'we; Ī shibi shing'we shibubisile ū būshū wakwe ū kū bing'we, nose atūdūla ū kūng'wigwa.

³ Nguno a makono ging'we gadabbalanhile mininga ga banhū, ī nzwala jing'we najo jisosohalile kūlwa būkenaagūji; nī milomo ying'we ītogilwe kūhaya būlomolomo, nī ndīmi jing'we kūfunya ya malofu.

⁴ Atīho ūyo akahayaga īgoloolile, nūūlū mu mabanza atīho ūyo akīmīīlaga ha ng'hana; basendamīlile mihayo midūhū na kūmanūyomba būlomolomo; bakabūūchaga nda ja malofu, babyala mayanga.

⁵ Bakagomejaga magī ga ng'hoboko, bakashibanyaga lūnhandī lwa ndugali; Ūyo ūgalya a magī gabo akachaaga, ūlū lyūbeleka nūlūū līmò īkafumaga mo nzoka.

⁶ A malūnhandī gabo batūdūla ū kūgitunga gītī shizwalo; īsho bakashibeejaga batūdūla kūshitūmamīla nūūlū kwifīkīja. Ī milimo yabo ya malofu no, nū mu makono gabo shilīmo shītīle sha wiboneeji būtaale.

⁷ A magūlū gabo mangū kūpeela kūja kū yabūbi, bangu kūja kwita mininga ga banhū batī na shilingo. A maganiko gabo gakikalaga mu yabūbi dūhū; būlī hene aho būbīta bakalekaga makoye na būkenaagūku.

⁸ Ī shimīzīle ya mhola batīmanile, ū mu nzīla jabo gūtīmo ūyo gūgoloolile; baajikwīgīja kuluba no. Ū wa kūbitīla ū mu nzīla jenījo atīko kwīmana ī mhola.

⁹ Hūna lūūlū īyo ītūngīlīgije tūlī nayo kūle no a bise; nū būtūngīlīja būtaalī ū kūtūpandīka. Ūlū twihamba kwisagīlwa isana, twisanga tūlī mu giiti dūhū; nūūlū gīkī hamo tūkūbona kang'wanga nūūlū ka malīngīīla, alīyo ī shimīzīle yise ītaalī ya mu giiti sha gamha.

¹⁰ Tūkūsīngījaga mu ndugu twayūja tūkūbbaabbaashaga na makono gītī tūlī babboku; twayūja tūkwīkoobaga ī nzīla yise gītī tūtī na miso. Tūkwipamaga nūūlū līīmi ntwe gatī gītī mhīndī ya kabungubungu; ū kū banhū ba nguzu a bise tūtikīlile na bafu.

¹¹ Bose pyī tūkūng'oolaga gītī ndūba jikūlīlaga būpīna, tūkūlīlaga gītī ng'hūūlū jikūdaayaga. Tūkwisagīlagwa kūbona būtūngīlīja, alīyo būtīho; ūlū twisagīlwa būpīji, nū wene būlī kūle.

¹² Nguno ū būhūbi wise būtaale no ū kū būtongi wako, nī shibi shise shikūtūkaanīlaga; ū būhūbi wise būlī hamò nise, nū būsobya wise tūbumanile,

¹³ tūlī na būkenaagūji na wibonya kūlwa kūnema bo mbisīla ū SEEBA, kūng'winhīla ngongo ū Mulungu wise, kūhela ya wiboneeji na būgomi, na kūhaya būlomolomo ūbo tūkwiganikaga mu ng'holò jise.

¹⁴ Nose ū būlamuji wa wīmà būlongeja kūjimīīla, nū būtūngīlīja botūseneegelile; Ī ng'hana nayo yashilile ū mu makūūwa gise, Ī nhūngwa ja wīmà jitūdūlaga ū kwingīla.

¹⁵ Ndūhū a ha kwīpandīkīla ī ng'hana, hama munhū ose ose ūyo ūlekana na yabūbi wandya kūhīīgwà. Hūna lūūlū ū SEEBA ūgūbona ū mhayo gwenūyū, gūkīja ū kūnyeja, nguno walī būtīmo ū būtūngīlīja.

¹⁶ Akabona gīkī atīho nūūlū wa ngota, ūgekemala ū kūbona gīkī ndūhū nombeji nūūlū ūmò; hūna lūūlū ūtūmamīla nkono gwakwe wei ng'wenekīlī, gūng'wenhela būpīji kūlwa nguno yakwe; ū būtūngīlīja wakwe būng'handīkīīja.

¹⁷ Akazwala būtūngīlīja gītī kūzwala shizwalo sha chūma sha kū shikuba, n'ihima lya būpīji ūtūūla ū kū ntwe gwake; hūna ūzwalīla na shizwalo sha kūmalīla shiilī; hanuma ūlola wifatanya na wilu gītī shizwalo.

¹⁸ Akūbalīpa kūlenganīla nū mumo shilī ī shītīle shabo, abo batantogilwe bakūbūbona ū būpelanu bokwe, a banishi bakwe akūbinha Īyo ībigeleelilwe; na a ba kū majinga akūbalīpa Īyo ībeelelile kūbiza yabo.

¹⁹ Hūna lūūlū kūfuma ng'weli a banhū bakūlyogoha ī lina lya ng'wa SEEBA, nī līkūjo lyakwe kwīngīīla kū būfuma līīmi. Nguno akwiza gītī ng'hūūmo gwa minzī ga mongo gwa nguzu, gakūhūūmiagwa lūhūhi lwa myūyī ya ng'wa SEEBA.

²⁰ “Ū Nkomooji akwiza ī Sayuni, ū kū banhū ba numba ya ng'wa Yakobo, abo bakūgalūkaga bashileka Ī shibi shabo.” Alīhaya SEEBA.

²¹ “Alīyo ū būlagane wane ū nene ū kūbo būlī gīkī, ū Moyo wane ūyo alī halī bebe, nī mihayo yane īyo naatūūlile munomo gwako, ītī ya kwīnga ū mu nomo gwako ū bebe, nū mu milomo ya baana bako, pyī nūūlū ū mu milomo ya babyalwa babo; kwandīja ikanza īlī kūja kū būtongi, na kūshisha welelo bose.” Alīhaya SEEBA.