Isaya 55 - Bibilia Ilagano Lya Kale 2015

Kwitanwa abo balī na notà

¹ Alilūūlū bing'we, bose abo mulī na notà nzūgi kū minzī; na a bing'we abo mutī na hela nzūgi mugūle, mulye! Nzūgi mugūle divai na mabeelè, ītī kūlwa kūfunya hela nūūlū shikolo shose shose.

² Nibūlī ng'wikale mukwitagūlaga hela jing'we kū shikolo shitalyiagwa, na kūnoga kūtūmama milīmo ītīko kūng'wenhela solobo? Nidegelekagi ng'wigwe gete, mukūlya shitoolyo, ī ng'holò jingwe jikūbūlūmba ū wiza.

³ Tegagi matū, nzūgi kūlī nene, nigwaagi nene hū būkwikala mhola ū būpanga wing'we; nakūbeeja ning'we ilagane lya welelo na welelo, kūng'olekeja shigongo shane ī sha welelo bose, ūmo nang'wisagīgīja Daūdi.

⁴ Managi gīkī nantūūlile ho nene kūbiza nkanīīji kū banhū, ntongeeji na ntaale wa banhū.

⁵ Ū bebe ūkūgitana na mahanga ayo ūtagamanile, hama a mahanga nūūlū gatakūmanile gakwiza gakūkwabaabīlaga bo nhambo, nguno ya ng'wa SEEBA Mulungu wako, ū Ng'wela wa Isilaeli; nguno hū ng'wene wakūgūngūhije.

⁶ Nkoobagi ū SEEBA aho ataalī akwilongaga, ng'witanagi aho ataalī hihī.

⁷ Ū munhū wabūbi ni īngage ū mu nzīla jakwe, nū yūyo atī ntūgīlīja ū mu maganiko gakwe. Ni anshokelage SEEBA, akūnchīla shigongo; angalūkīle Mulungu wise, nguno akūnekeja pye gete.

⁸ “Nguno a maganiko gane gatī maganiko ging'we, nī nzīla jing'we jitī nzīla jane,” alīhaya SEEBA.

⁹ Nguno ūmo mapandī g'igūlū galī kwigūlya no no no kūtinda sī, nī nzīla jane h'ūmo jilī kwigūlya no kūtinda ī nzīla jing'we; pye na a maganiko gane, kūtinda a maganiko ging'we.

¹⁰ Hama hangī gīt'ūmo mbūla na seluji shikikaga kūfuma kwilunde, na shitashokaga ko, alīyo shikīdotyaga ī sī, shīgunanha kūzwisha īsho shikazwaga na kūshīta shifulume, shidūle kūng'winha mbīyū ū nīmi, na sha kūlya ū nchooji wa shilīwa,

¹¹ h'ūmo gūlī nū mhayo gwane, ūyo gūkafumaga mu nomo gwane, gūtīko kūnishokela dalali; alīyo gūkwīshikīlīja īyo nīhayile, gūkwībeeja īyo nalagūtūme kwībeeja.

¹² Mūkūfuma mulī na būyegi, na mukūtongeelwa mu mhola. Ī ngūlū ī nhaale nī ndo shikūhīlīīla kwīmba mīmbo ū kū būtongi wing'we, nī mītī ya mu matogolo īkūtūla ng'hūbi.

¹³ A ha ng'wanya gwa masaka ga ming'hwa īkūzwa mibanga, a ha ng'wanya gwa masanzu, gūkūzwa ntī gwa bonji; yose yenīyī īkūlekwa ībize shimanīkījo sha būja na būja kūlwa kūlīkumūcha lina lya ng'wa SEEBA.