Isaya 54 - Bibilia Ilagano Lya Kale 2015

Ikūjo lya Sayuni līlī mu nzīla

¹ Īmbaga bebe ngūmba, ūyo ūtaalī kūbyala, hīlīīlaga kwīmba; yoganyaga kūlwa būyegi bebe ūyo ūtaalī kūlung'wa būsūngū, nguno a baana ba nkīma ūyo walekwa balī bingī kūtinda a ba nkīma ūyo atoolilwe, SEEBA alīhaya.

² Īgalīhyage ī gwalugwa ya ha ng'wako; gagoloolage jigi a matundubaali g'iheema lyako gagalīhe, lekaga ū kwinogolelwa; jilīhyage ī ngoye j'iheema, jikomage gete ī mambo jidaame.

³ Nguno ūkūgalīha no ū kū lwandī lwa būlyo nū lwa lūmoso, a babyalwa bako bakūpeeja mahanga, bigashe boi ū mu mizengo īyo īlalekwe buyīkī.

⁴ Lekaga ū kogoha, ūtūgooka; yaya ū kūzwangana, ūtūpondwa soni; ūkūgīība a magooke ga ha walūki wako; nū wibengelejiwa ūbo wītīlagwa kūlwa kūchīlwa ngoshi wako.

⁵ Nguno ū Meeja wako hū ngoshi wako ū bebe, SEEBA wa mabità ī lina lyakwe; ū Ng'wela wa Isilaeli hū ng'wene ū Nkomooji wako, ūyo akitanagwa Mulungu wa sī yose.

⁶ Ū SEEBA alīkwitana ūnshokele we, bebe ūyo ūbange gītī nkīma alī na būpīna mu moyo kūlwa kūlekwa na ngoshi, gītī nkīma watoolwa ataalī ndo, hūna ūleng'wa ūpeejiwa, alīhaya Mulungu wako.

⁷ Nguno nakakūleka ng'wikanza iguhī, alīyo kūlwa shigongo shane shitaale nakūkwenha, ūnishokele hangī.

⁸ Kūlwa kūnisaayīcha nūpelana, naalī nibisa ūtizūnibona ū būshū wane, alīyo kūlwa shigongo shane sha welelo na weleo, nakūkūsaatwa, alīhaya SEEBA, ū Nkomoji wako.

⁹ Nguno ū kūlī nene ū mhayo gwenūyū gūlī gīt'ūmo īkajīla mu shikū ja ng'wa Noa, aho nakilahīla gīkī ī sī ītalalibījiwa minzī g'ihūma hangī gītī mu shikū ja ng'wa Noa. Alilūūlū, ū nene nilahīlile gīkī ū bebe natūkūpelanīla hangī, nūūlū natūkūhama na būkalī.

¹⁰ Ī ngūlū ī nhaale nī ndo nūūlū jikasambaala, alīyo ū būtogwa wane būtaale no ū kūlī bebe, būtīko kūshila; nī lilagane lyane lya mhola lītīko ū kwīnga, alīhaya SEEBA ūyo akūsaatilwe.

¹¹ Bebe ūyo ūluhile, ūkūhuuyembelagwa miyaga mitaale, hangī ūtaalī kwifuujiwa, nakūkūzenga na mawe ga mpango ntaale, ū nsingi gwako nakūgūzenga gwa mawe ga safilo.

¹² Ī numba jako ī ndīhu nakūjīīta ja mawe ga lubi, ī mibita yako īkūbiza ya mawe mang'weku; nī ndugu jako ī jose ja mawe ga mpango taale.

¹³ A baana bako akūbalanga SEEBA pye a bose, nīyo ī mhola ya babyalwa bako Īkūbiza nhaale no.

¹⁴ Ūkūbiza na nguzu wīmīīle kūlwa būtūngīlīja; a biboneeji ūkūbiza kūle nabo, shitilonga sha kūkūdetemya; hama ī lyogohya lītūkūpandīka.

¹⁵ Ūlū ūbūkīlwa na ose ose, ū gwenūyo gūkūbiza gūtī nīmo gwane; nīyo hangī ūyo ūkūūbūkīla akūgwa ū kū būtongi wako.

¹⁶ Ū nene hū nalī Nseemi wakwe ū nsuji wa chūma, ūyo akafuulīlījaga moto gwa makala gwaligima, wasula shilanga sha kwītīla milīmo yakwe; nū nkenaagūji nalī Nseemi wakwe nene, nang'hwe aje akwītaga ī mibi.

¹⁷ Shilanga shose shose īsho shūsulwa kūlwa kūkūdumīla bebe shitūbyedecha mhayo. Nūūlū wigela wa kūgaagaana kūkūbūūla mu mhayo nebe, ūkūngwisha. Ū gwenūyū hū ngabo gwa wingīji wa batūmami ba ng'wa SEEBA; h'ī mbika īyo nakatūmamīlaga kūbagunīja, alīhaya SEEBA.