Isaya 53 - Bibilia Ilagano Lya Kale 2015

¹ Nani akwīzunyaga īyo tūkwīhayaga? Nū nkono go ng'wa SEEBA goolechiwe kūlī nani?

² Nguno ū mu kakūlīle kakwe ū kū būtongi bo ng'wa SEEBA walī gītī itambī inagana, gītī nji gwa ntī mu sī ng'halamuku. Walī atī n'ihanga isoga nūūlū ly'ikūjo gīkī atūdute kūnola; nūūlū ī suso yakwe yalī ītī na wiza wa kūtwenheleja tūng'wikūmve

³ Walī ndalahwa na neng'wa kū banhū, munhū wa būpīna ūyo walī abūmanile nū būluhi. Walī adalahilwe gītī munhū ūyo banhū batatogilwe nūūlū kūnola dūhū, twalī tūtangwinhile ikūjo nūūlū hado.

⁴ Alīyo īlī ng'hana gīkī ū būgokolo wise akabūbūūcha wei; nī ndwala jise ūjīnja we. Gwike a bise twang'wisaabaga gīkī watūlilwe na Mulungu, waminyiwe na kūluhiwa na ng'wenūyo.

⁵ Alīyo akachimagūlwa kūlwa nguno ya būkenaagūji wise, ūgulajiwa kulwa būhūbi wise; ū nsango ūyo gūkatwenhela mhola a bise gūkang'wikalīla wei. Tūkūpījiagwa mu nzīla ya magulagīje gakwe.

⁶ Bose pyī tūlī gītī ng'holo jitalile, būlī ūmò wise alī mu nzīla yakwe wei ngwenekīlī; alīyo ū SEEBA akanseseja wei ū būhūbi wise pye a bose.

⁷ Akiboneelwa na kūluhiwa, alīyo ū wei atafunije ilaka lyakwe; akatwalwa gītī ng'holo kūjūsīnzwa, nīyo ūmo ng'holo īkikalīlaga sele kūlī munhū akwībbutīlaga booya, nū wei atafunije ilaka lyakwe.

⁸ Akiboneelwa ūtwalwa kūjūlamulwa. Nani ūyo adūgije kwīsomboola ī mihayo ya shibyalīlwe shakwe? Nguno akīnjiwa ū mu sī ya bapanga; akatūlwa kūlwa nguno ya būkenaagūji wa banhū bane.

⁹ Akagung'wa mu shigila hamò na bakenaagūji, ū mu kūcha kwakwe ūbalīlwa mu basabi, nūūlū īkī atītile nsambo gose gose; mhayo gwa būlomolomo gūtīlongile mu nomo gwakwe.

¹⁰ Alīyo ū SEEBA akayega ū kūngulaja, nū kūmītya mu kūsaatwa; hama nūūlū īkī ū SEEBA akamfunya kūbiza shitambò sha būkenaagūji, alīyo akūbūbona ū būbyile wakwe; Ī shikū ja būlamu wakwe jikūbiza ningī. Hūna īyo ayīhayile SEEBA Īkūbeelela ū mu nkono gwakwe.

¹¹ Hanuma ya henaho akūyega ū kūgabona a matwajo ga ng'wikanza lya kūluhiwa kwa būpanga wakwe. Kūlwa būmani na būtūngīlīja wakwe ū ntūmami wane, akūbīīta bingī babalīlwe būtūngīlīja; na akūbūbūūcha ū būhūbi wabo.

¹² Hūna lūūlū nakūng'winha ngabo hamò na bakūjiwa, na akūgabanha nding'wa hamò na banhū ba nguzu; kūlwa nguno akafunya būpanga wakwe kūshisha kūcha, ūbalanījiwa mu bakenaagūji; ūbūūcha shibi sha banhū bingī, ūbalombela bakenaagūji.