Isaya 52 - Bibilia Ilagano Lya Kale 2015

SEEBA akwīpīja ī Yelusalemu

¹ Mishaga, Ee Sayuni, mishaga! Manulaga nguzu jako. Ee Yelusalemu, nzengo ng'wela, zwalīlaga ī shizwalo shako sh'ikūjo. Ū mulī bebe atingīla hangī ose ose ūyo atasaalilwe, nūūlū wa malofu.

² Lūkomagūlage ū lūbuubu lwako; Ee Yelusalemu gūngūmūkaga, igasha nyagole. Bebe nshīke Sayuni ūyo ūlī mu būsese, ītīnage ī minyololo ū mu nhingo yako.

³ Nguno ū SEEBA alīhaya gīkī, “Ng'walī ng'wajinjiwa bo dalali, nū kūkomoolwa mukūkomoolwa bo ndūhū kūfunyiwa sabo.”

⁴ Nguno ū Seeba MULUNGU alīhaya gīkī, Ī kwandya a banhū bane baalī baja Misili kwikala kwenūko; hama ū mu shikū īji biboneelilwe na sī ya Ashulu.

⁵ “Numho lūūlū ī haha nalī na kī a henaha?” Alīhaya SEEBA. “Nguno a banhū bane bakūmanagūjanwa dalali dūhū, hūna abo bakūbasugaga baayikala bakuchomaga ng'wano kūlw'ibengwe.” Alīhaya SEEBA. “Hama gwa gwa gwa ī lina lyane līkūsondagūlagwa līīmi ji.

⁶ Hūna lūūlū, a banhū bane bakūlīmana ī lina lyane; Alichene, ū mu lūshikū lwenūlo bakwitegeleja gīkī hū nene ng'wenekīlī nalīhaya; Ee, nene ng'wenekīlī.”

⁷ Galī masoga shido a magūlū ga balomeeji ba Ng'hūlū Jawiza abo balī mu ngūlū, abo baliza kūlomeela mihayo ya nhola, a benhi ba Ng'hūlū Jawiza, na bakumūcha ba mihayo ya būpīji; abo bakwīwīlaga ī Sayuni gīkī, “Ū Mulungu wako h'ū nsugi!”

⁸ Alibadegelekage a balang'hani bako, balīyoganya na malaka gabo, pye a bose balīhoolanīja kūhamuka kūlwa būyegi, nguno boi balīkūbona na miso gabo ū kūshoka kwa ng'wa SEEBA ī Sayūni.

⁹ Bing'we makambagūkīle gose ga nzengo gwa Yelusalemu, hoolanījagi kwīmba n'ilaka lya būyegi, nguno ū SEEBA wabalūngūgije a banhū bakwe, wīkomoolile ī Yelusalemu.

¹⁰ Ū SEEBA wagūkundūlile ū nkono gwakwe ng'wela kū būtongi wa mahanga gose; nīyo pye a mapandī ga sī gakūbūbona ū būpījibo ng'wa Mulungu wise.

¹¹ Īngagi, īngagi, fumagi ū ng'wenūmo, mutizūkuumya shose shose ī shisoso. Fumagi ū mūlī we mubize beela, bing'we abo mulī babūūcha ba shiseme sha ng'wa SEEBA.

¹² Gwike mutīnga bo kwiyangūhīlīja, nūūlū mutīnga mukūpeelaga, nguno ū SEEBA akūja amutongeelile; ū Mulungu wa Isilaeli akūmulang'hana ū kū numa ying'we.

Kūluhiwa na kūgūngūhiwa kwa Ntūmami

¹³ Managi gīkī ū ntūmami wane akūtūmama mu būdeeba; akūgūngūhiwa akūjiwe, abize higūlya no no no.

¹⁴ Banhū bingī akabenheleja kūjinjimala kūlwa kūbipiwa ihanga lyakwe kūtinda munhū ūngī ose ose, nī suso ya būshū wakwe yūkenaagūlwa kūkīla suso ja banhū bangī,

¹⁵ h'ūmo akūgakamaagīja na mahanga mingī, na kūbenheleja batemi kūdedebala. Nguno bakūbona mihayo īyo baalī bataalī kūwīlwa, nī yīyo baalī bataalī kwīyigwa bakwīyitegeleja.